ZIRLAI 32
Pathian Ramin Ro A Rêl Ta!
Pathian Ram chuan kum 1914 aṭang khân vânah ro a rêl ṭan tawh a. Chu chu mihringte rorêlna atâna ni hnuhnûng inṭanna a ni bawk. Engtin nge kan hriat? Kum 1914 aṭanga Bible hrilh lâwkna thleng famkim te, he khawvêla thilthleng te, leh mihringte rilru put hmangte chu i lo ngaihtuah ang u.
1. Bible hrilh lâwknain eng nge a târ lan?
Bible-a Daniela bu aṭangin Pathian Ram chuan “hun sarih” a tâwp hunah ro a rêl ṭan ang tih kan hria a. (Daniela 4:16, 17) Kum zabi tam tak a liam hnuah, Isua chuan chu hun tho chu “Jentailte nî” tiin a ko va, chu chu a la kin lo tih a zirtîr a ni. (Luka 21:24) Chu hun sarih chu kum 1914-ah a tâwp tih kan la hmu ang.
2. Kum 1914 aṭang khân khawvêlah eng nge thleng a, mihringte’n eng rilru nge an put?
Isua zirtîrte chuan: “I lo kal lehna leh khawvêl tâwpna chhinchhiahna chu eng nge ni ang?” tiin an zâwt a. (Matthaia 24:3) A chhânnaah Isua chuan Pathian Rama Lal anga vâna ro a rêl ṭan hnua thilthleng tûr tam tak a sawi lâwk a ni. Chûng zîngah chuan indona te, ṭâm te, leh lîrnghîngte a tel a. (Matthaia 24:7 chhiar rawh.) Bible chuan ‘ni hnuhnûnga’ mite rilru put hmang avângin, ‘hun khirh takahte’ kan nung dâwn tih a sawi lâwk bawk. (2 Timothea 3:1-5) Hêng dinhmunte leh rilru put hmangte hi a bîk takin kum 1914 aṭang khân a lang fiah zual a ni.
3. Engvângin nge Pathian Ramin ro a rêl ṭan aṭang khân khawvêl dinhmunte chu a chhiat lehzual?
Isua chuan Pathian Rama Lal a nih hnu lawkah, vâna awm Setana leh a ramhuaihote chu a do va, chu indonaah chuan Setana chu a tlâwm a ni. Bible chuan ani chu “leiah an paih a, a tirhkohte pawh an paih thla tel ve a,” tiin a sawi. (Thu Puan 12:9, 10, 12) Tihboral a ni dâwn tih a inhriat avângin, Setana chu a thinur hle a. Chuvângin, khawvêl pumah natna leh hrehawm tawrhna a thlentîr a ni. Khawvêl dinhmun a chhe hle pawh hi a mak lo ve! Mahse, Pathian Ram chuan hêng buaina zawng zawngte hi a rawn sût lêt vek ang.
ZIR BELHIN HMUH BELH RAWH
Kum 1914-ah Lalramin ro a rêl ṭan tih kan hriat dân leh chu chuan kan chunga nghawng a neih dân tûr chu bih chiang rawh.
4. Bible hun chhuina chuan kum 1914-ah Pathian Ramin ro a rêl ṭan tih a târ lang
Pathianin hmân lai Babulon Lal Nebukadnezzara chu hrilh lâwkna mumang a neihtîr a. Chu mumang leh Daniela hrilhfiahna chuan chu chu Nebukadnezzara rorêlna leh Pathian Ram atân a hman theih ve ve tih a târ lang.—Daniela 4:17 chhiar rawh. a
Daniela 4:20-26 chhiar la, a hnuaia zawhnate chhân nân chart hmang ang che u:
-
(A) Nebukadnezzara’n a mumangah eng nge a hmuh?—Châng 20 leh 21 en rawh.
-
(B) Thing chungah eng nge thleng ang?—Châng 23 en rawh.
-
(C) “Hun sarih” tâwpah eng thil nge thleng ang?—Châng 26 en rawh.
Mumanga Thing leh Pathian Ram A Inkûngkaih Dân
HRILH LAWKNA (Daniela 4:20-36)
Rorêlna
(A) Thing lian tak
Rorêlna a khaihlak
(B) “Thing chu kit la,” tichuan ‘hun sarih raltîr rawh’
Rorêlna tun din leh a ni
(C) “I ram chu i ta a ni [leh] ang”
He hrilh lâwkna thlen famkimna hmasa zâwkah . . .
-
(D) Thing chuan tu nge a entîr?—Châng 22 en rawh.
-
(E) Engtin nge a rorêlna chu a khaihlak?—Daniela 4:29-33 chhiar rawh.
-
(F) “Hun sarih” tâwpah Nebukadnezzara chungah eng nge thleng?—Daniela 4:34-36 chhiar rawh.
THLEN FAMKIMNA HMASA ZAWK
Rorêlna
(D) Babulon Lal Nebukadnezzara
Rorêlna a khaihlak
(E) B.C.E. 606 hnuah, Nebukadnezzara chu a â ta a, kum sarih chhûng ro a rêl thei lo
Rorêlna tun din leh a ni
(F) Nebukadnezzara chu a rilru a pângngai leh a, ro a rêl leh ṭan
He hrilh lâwkna thlen famkimna pahnihnaah . . .
-
(G) Thing chuan tu nge a entîr?—1 Chronicles 29:23 chhiar rawh.
-
(H) Engtin nge an rorêlna chu a khaihlak? Engtin nge Isua leia a awm lai khân a la khaihlak reng tih kan hriat?—Luka 21:24 chhiar rawh.
-
(I) Engtikah leh khawi hmunah nge he rorêlna hi din thar leh a nih?
THLEN FAMKIMNA PAHNIHNA
Rorêlna
(G) Pathian rorêlna aiawhtu Israel lalte
Rorêlna a khaihlak
(H) Jerusalem chu tihchhiat a ni a, Israel lal thlah kal zêl chu kum 2,520 chhûng a khaihlak
Rorêlna tun din leh a ni
(I) Pathian Rama Lal angin Isua’n vânah ro a rêl ṭan
Hun sarih chu engtia rei nge ni?
Bible châng ṭhenkhat chuan hmun dang daiha mite hre thiam tûrin min ṭanpui a. Entîr nân, Bible-a Thu Puan bu chuan hun thum leh a chanve chu ni 1,260 nên a intluk tih a sawi a. (Thu Puan 12:6, 14) Hun sarih chu chumi lêt hnih, a nih loh leh ni 2,520 a ni. A châng chuan Bible hian ni khat hi kum khat aiah a hmang ṭhîn a. (Ezekiela 4:6) Daniela bu-a kan hmuh hun sarih chu chutianga a nih chuan kum 2,520 sawina a ni.
5. Kum 1914 aṭangin khawvêl a inthlâk danglam
Isua chuan Lal a nih hnua khawvêl dinhmun tûr a sawi lâwk a. Luka 21:9-11 chhiarin, he zawhna hi sawiho vang che u:
-
Hêng dinhmunte zînga a eng hi nge i hmuh tawh a, i hriat tawh?
Tirhkoh Paula chuan mihring rorêlna ni hnuhnûnga mite rilru put hmang tûr chungchâng a sawi a. Timothea thawn hnih 3:1-5 chhiarin, he zawhna hi sawiho vang che u:
-
Tûn laia mite zîngah hetiang rilru put hmang neite hi i hmu ṭhîn em?
6. Pathian Ram rorêlna chuan min chêttîr tûr a ni
Matthaia 24:3, 14 chhiarin, hêng zawhnate sawiho vang che u:
-
Eng hna pawimawh takin nge Pathian Ramin ro a rêl ṭan tawh tih târ lang?
-
Engtin nge chu hnaah chuan i tel ve theih?
Pathian Ram chuan ro a rêl ṭan tawh a, he lei pum pui a thunun hun chu a hnai tawh hle. Hebrai 10:24, 25 chhiarin, he zawhna hi sawiho vang che u:
-
“Nî chu lo hnai telh telh a” kan hriat avângin eng nge kan tih ṭheuh vang?
Mi dangte ṭanpui thei tûr leh an nun chhanhim thei tûr thil i hriat chuan eng nge i tih ang?
MI ṬHENKHAT ZAWHNA: “Engvângin nge Jehova Thuhretute’n kum 1914 chungchâng an sawi ziah?”
-
Engtin nge i chhân ang?
KHAIKHAWMNA
Bible hrilh lâwkna, hun chhuina, leh khawvêl dinhmunte chuan Pathian Ramin ro a rêl ṭan tawh tih a târ lang a. Chumi kan rinzia chu mi dangte hnêna a chanchin hrilhin leh kohhran inkhâwmtea telin kan lantîr a ni.
Ennawnna
-
Daniela bua hrilh lâwkna hun sarih tâwpah eng nge thleng?
-
Kum 1914-ah Pathian Ramin ro a rêl ṭan tih engin nge rinnghehtîr che?
-
Chu Lalram chuan ro a rêl mêk tih i rinzia engtin nge i lantîr theih?
HRIAT BELH NAN
Hmân lai chanchin ziaktute leh mi dangte’n kum 1914 aṭanga khawvêl inthlâk danglam dân an sawi chu ngaihtuah rawh.
Matthaia 24:14-a hrilh lâwknain pa pakhat nun a nghawng dân chhiar rawh.
“Eng Dang Zawng Aiin Baseball Ka Ngaina!” (Vênnainsâng No. 2 2017)
Daniela bung 4-a chhinchhiah hrilh lâwkna hi Pathian Ram sawina a ni tih engtin nge kan hriat?
“Engtik Khân Nge Pathian Ramin Ro A Rêl Ṭan? (Ṭhen 1)” (Vênnainsâng thuziak)
Daniela bung 4-a târ lan “hun sarih” chu kum 1914-ah a tâwp tih engin nge târ lang?
“Engtik Khân Nge Pathian Ramin Ro A Rêl Ṭan? (Ṭhen 2)” (Vênnainsâng thuziak)
a He zirlaia, Hriat Belh Nân tih section- a a tâwpna thuziak pahnihte chu en rawh.