LESON 32
Rwayom Bondie Pe Dirize!
Rwayom Bondie inn koumans regne dan lesiel an 1914. Sa mem lane-la, bann dernie tan inn koumanse, savedir ki bann gouvernman imin biento pou aret dirize. Kouma nou konn sa? Bann profesi ki ena dan Labib, seki pe pase dan lemond, ek kouma bann dimounn pe konport zot depi 1914, ed nou pou konpran sa. Ek se seki nou pou gete dan sa leson-la.
1. Ki bann profesi Labib montre?
Liv Daniel montre ki Rwayom Bondie ti pou koumans regne alafin enn lepok ki apel “set lane.” (Daniel 4:16, 17) Bann santenn lane apre, Zezi ti apel sa mem lepok-la ‘letan ki finn akord bann pep,’ ek li ti dir ki sa lepok-la pa ti ankor fini. (Lik 21:24) Kouma nou pou trouve, sa set lane-la ti fini an 1914.
2. Ki pe pase dan lemond ek kouma bann dimounn pe konport zot depi 1914?
Bann disip ti demann Zezi: “Ki sign pou montre to prezans ek lafin sa lemond-la?” (Matie 24:3, NW) Dan so repons, Zezi ti dir ki boukou kitsoz ti pou arive apre ki li ti pou koumans regne dan lesiel, antan ki Lerwa dan Rwayom Bondie. Parmi sa bann kitsoz-la, ena lager, lafaminn, ek tranbleman-de-ter. (Lir Matie 24:7.) Labib ti predir osi ki dan “bann dernie tan” ti pou ena “bann moman difisil” akoz fason ki bann dimounn ti pou konport zot. (2 Timote 3:1-5) Ek nou trouv bien tou sa bann kitsoz-la depi 1914.
3. Kifer lemond finn vinn pli pir depi ki Rwayom Bondie finn koumans regne?
Inpe apre ki Zezi ti vinn Lerwa dan Rwayom Bondie, li ti al lager kont Satan ek so bann demon dan lesiel. Ek Satan ti perdi sa lager-la. Labib dir ki “Satan . . . avek so bann anz ti perdi zot plas dan lesiel.” (Revelasion 12:9, 10, 12) Satan bien ankoler, parski li kone ki li pou detrir. Se akoz li ki ena sa kantite problem ek soufrans la lor later. Alor, nou konpran kifer sitiasion lor later bien pa bon! Me biento, Rwayom Bondie pou tir tou sa bann problem-la!
ANOU GET INPE PLIS
Nou pou gete kouma nou kone ki Rwayom Bondie inn koumans dirize an 1914. Nou pou get osi kouma nou kapav montre ki nou krwar ki Rwayom Bondie pe dirize azordi.
4. Bann profesi Labib ed nou pou ariv ziska 1914
Bondie ti fer Naboukodonozor, ki ti Lerwa Babilonn, gagn enn rev ki ti predir lavenir. Kan Daniel ti explik sa rev-la, li ti montre ki sa rev-la aplik avek regn Naboukodonozor ek Rwayom Bondie.—Lir Daniel 4:17. a
Lir Daniel 4:20-26, ek apre sa, servi sa tablo-la pou reponn sa bann kestion-la:
-
(A) Ki kitsoz Naboukodonozor ti trouve dan so rev?—Get verse 20 ek 21.
-
(B) Ki ti pou ariv sa pie-la?—Get verse 23.
-
(C) Ki ti pou arive alafin ‘sa set lane-la’?—Get verse 26.
Ki Lien Ena ant Pie dan Rev Naboukodonozor ek Rwayom Bondie?
PROFESI (Daniel 4:20-36)
Pe regne
(A) Enn extra gran pie
Aret regne
(B) “Koup sa pie-la,” ek les “set lane pase”
Rekoumans regne
(C) “To pou regagn to rwayom”
Dan premie fason ki sa profesi-la inn realize . . .
-
(D) Kisannla sa pie-la reprezante?—Get verse 22.
-
(E) Kouma so regn ti arete?—Lir Daniel 4:29-33.
-
(F) Ki ti ariv Naboukodonozor alafin ‘sa set lane-la’?—Lir Daniel 4:34-36.
PREMIE FASON KI SA PROFESI-LA REALIZE
Pe regne
(D) Naboukodonozor, Lerwa Babilonn
Aret regne
(E) Apre 606 A.N.L., Naboukodonozor perdi latet ek nepli kapav regne pandan set an
Rekoumans regne
(F) Naboukodonozor regagn so lespri ek rekoumans regne
Dan deziem fason ki sa profesi-la inn realize . . .
-
(G) Ki sa pie-la reprezante?—Lir 1 Kronik 29:23.
-
(H) Kouma zot regn ti arete? Kouma nou kone ki personn pa ti pe regne mem kan Zezi ti lor later?—Lir Lik 21:24.
-
(I) Kan ek kotsa sa regn-la ti rekoumanse?
DEZIEM FASON KI SA PROFESI-LA REALIZE
Pe regne
(G) Bann lerwa Izraelit ki reprezant regn Bondie
Aret regne
(H) Zerizalem detrir, ek bann lerwa Izraelit nepli regne pandan 2,520 an
Rekoumans regne
(I) Zezi koumans regne dan lesiel, antan ki Lerwa dan Rwayom Bondie
Ki sa set lane-la reprezante?
Sertin parti dan Labib kapav ed nou pou konpran lezot parti dan Labib. Par exanp, liv Revelasion dir ki trwa-z-an edmi egal 1,260 zour. (Revelasion 12:6, 14) Savedir ki dapre bann profesi Labib enn an egal 360 zour. Alor ‘sa set lane-la’ egal 2,520 zour. Parfwa dan Labib, enn zour reprezant enn an. (Ezekiel 4:6) Sa aplik ar set lane ki mansione dan liv Daniel, zot reprezant 2,520 an.
5. Lemond finn sanze depi 1914
Zezi ti predir kouma sitiasion dan lemond ti pou ete apre ki li ti pou vinn Lerwa. Lir Lik 21:9-11, ek apre sa, get sa kestion-la ansam:
-
Lekel parmi sa bann sitiasion-la ou finn trouve ouswa tande?
Lapot Pol ti dekrir kouma bann dimounn ti pou ete pandan bann dernie zour ki bann gouvernman imin ti pou dirize. Lir 2 Timote 3:1-5, ek apre sa, get sa kestion-la ansam:
-
Lekel parmi sa bann konportman-la ou pe trouve parmi bann dimounn azordi?
6. Montre ki ou krwar ki Rwayom Bondie pe dirize azordi
Lir Matie 24:3, 14, ek apre sa, get sa bann kestion-la ansam:
-
Ki travay inportan montre ki Rwayom Bondie pe dirize azordi?
-
Kouma ou kapav partisip dan sa travay-la?
Rwayom Bondie pe dirize azordi, ek biento li pou diriz lor later. Lir Ebre 10:24, 25, ek apre sa, get sa kestion-la ansam:
-
Ki kitsoz sakenn parmi nou bizin fer amezir ki nou trouv “zour Lesegner pe aprose”?
Ki ou ti pou fer si ou ti konn enn kitsoz ki kapav ed lezot ek sov zot lavi?
SERTIN KAPAV DEMANDE: “Kifer bann Temwin Zeova koz sa kantite-la lor 1914?”
-
Ki ou ti pou dir?
SEKI NOU’NN APRANN
Bann profesi Labib, ek sitiasion dan lemond montre ki Rwayom Bondie pe dirize azordi. Nou montre ki nou krwar ki sa Rwayom-la pe dirize azordi, kan nou pres lor sa Rwayom-la ek asiste bann renion.
Eski Ou Rapel?
-
Ki ti arive alafin set lane ki mansione dan liv Daniel?
-
Ki kitsoz konvink ou ki Rwayom Bondie inn koumans dirize an 1914?
-
Kouma ou kapav montre ki ou krwar ki Rwayom Bondie pe dirize azordi?
DEKOUVER
Gete ki bann istorien ek bann lezot dimounn dir konsernan bann sanzman ki finn ena dan lemond depi 1914.
« Depuis quand ce déclin brutal ? » (Leve!, Avril 2007, an Franse)
Gete kouma profesi ki ena dan Matie 24:14 finn sanz lavi enn dimounn.
Kouma nou kone ki profesi ki ena dan Daniel sapit 4 pe koz lor Rwayom Bondie?
“Kan Eski Rwayom Bondie Inn Koumans Dirize?—1e Parti” (Latour Degard, 1e Novam 2014)
Ki kitsoz montre ki “set lane” ki mansione dan Daniel sapit 4 inn fini an 1914?
a Get de dernie lartik dan parti Dekouver dan sa leson-la.
Ena Osi
KESTION KI POZE SOUVAN
Ki sa Inplike Etidie Labib Avek Bann Temwin Zeova?
Bann Temwin Zeova ofer bann letid Labib gratis, ek ou kapav servi ninport ki version Labib ki ou anvi. Santi ou lib pou invit bann manb ou fami ouswa bann kamarad ki ou anvi.
