KATAK 32
Aelõñ eo an Anij Ej Kiiõ Irooj im Tõl!
Aelõñ eo an Anij ear jino irooj im tõl ilañ ilo iiõ eo 1914. Eñin bar iien eo ear jino raan ko ãliktata in an armej ro tõl. Ewi wãween ad jel̦ã? Etale kanaan ko ilo Baibõl̦ im men ko rej wal̦o̦k ilo lal̦ in, ekoba l̦õmn̦ak im kõm̦m̦an ko an armej ro jãn kar iiõ eo 1914.
1. Kanaan ko ilo Baibõl̦ rej kaalikkar ta?
Ilo Baibõl̦ eo, bokin Daniel ear kaalikkar bwe Aelõñ eo an Anij enaaj jino irooj ilo jem̦l̦o̦kin juon iien me ej n̦aetan “jiljilimjuon iien ko.” (Daniel 4:16, 17) Elõñ bukwi iiõ ko tokãlik, Jesus ear kõnono kõn ejja iien in wõt ke ear kwal̦o̦k kõn “iien ko an ri-aelõñ ko,” im ear katakin bwe ejjañin jem̦l̦o̦k iien in. (Luk 21:24) Ãinwõt ad naaj etale, jiljilimjuon iien ko ear jem̦l̦o̦k ilo iiõ eo 1914.
2. Ta ko rej wal̦o̦k ilo lal̦ in im ewi wãween l̦õmn̦ak im kõm̦m̦an ko an armej jãn kar iiõ eo 1914?
Ri-kal̦oor ro an Jesus rar kajjitõk ippãn: “Ta kõkal̦l̦e eo enaaj kaalikkar bwe kwõj pãd im bwe epaak jem̦l̦o̦kin jukjukun pãd in?” (Matu 24:3) Jesus ear uwaake er ilo an kar kanaan kõn elõñ men ko me renaaj wal̦o̦k ãlikin an jino irooj ilañ ãinwõt Kiiñ eo an Aelõñ eo an Anij. Jet iaan men kein rej kitibuj tarin̦ae, ñũta, im m̦akũtkũt lal̦. (Riit Matu 24:7.) Baibõl̦ eo ear bar kanaan bwe l̦õmn̦ak im kõm̦m̦an ko an armej ro ilo “raan ko ãliktata” renaaj kõm̦m̦an bwe mour en ‘kanooj in nana im pen.’ (2 Timote 3:1-5) El̦apl̦o̦k ad loe wãween kein ilo lal̦ in ekoba ilo l̦õmn̦ak im kõm̦m̦an ko an armej ro jãn iiõ eo 1914 liktak.
3. Etke enanal̦o̦k men ko rej wal̦o̦k ilo lal̦ in jãn ke Aelõñ eo an Anij ear jino irooj?
Ejjabto jãn iien eo Jesus ear erom Kiiñ in Aelõñ eo an Anij, ear tarin̦aeik Setan im enjel̦ ro an renana ilo lañ. Setan ear jab bõk anjo̦ ilo tarin̦ae in. Baibõl̦ ej ba bwe, “kar jolal̦l̦o̦k [Setan] ñan lal̦ in im bareinwõt enjel̦ ro an n̦a ippãn.” (Revelesõn 12:9, 10, 12) Setan elukkuun illu kõnke ejel̦ã bwe naaj ko̦kkure e. Kõn men in, ej kõm̦m̦an bwe armej ro ipel̦aakin lal̦ in ren iioon apañ im eñtaan. Eñin unin jej lo an lukkuun nana men ko rej wal̦o̦k ilo lal̦ in! Aelõñ eo an Anij enaaj n̦amejal̦an aolep apañ kein.
KAM̦WILAL̦L̦O̦K AM̦ MEL̦EL̦E
Etale ewi wãween ad jel̦ã bwe Aelõñ eo an Anij ear jino irooj ilo 1914 eo im ta mel̦el̦ein men in ñan kõj.
4. Kanaan ko ilo Baibõl̦ rej kaalikkar bwe Aelõñ eo an Anij ear jino irooj ilo 1914 eo
Anij ear kõm̦m̦an bwe kiiñ eo an Babil̦on etan Nebukadnezar en ettõn̦ake ta eo enaaj wal̦o̦k ilju im jekl̦aj. Ettõn̦ak in im kõmel̦el̦e eo Daniel ear kwal̦o̦ke ej kaalikkar bwe ej jitõñl̦o̦k ñan tõl eo an Nebukadnezar im Aelõñ eo an Anij.—Riit Daniel 4:17. a
Riit Daniel 4:20-26, innem kõjerbale jaat eo ñan uwaaki kajjitõk kein:
-
(A) Ta eo Nebukadnezar ear loe ilo ettõn̦ak eo an?—Lale eoon 20 im 21.
-
(B) Ta eo enaaj kar wal̦o̦k ñan wõjke eo?—Lale eoon 23.
-
(C) Ta eo enaaj kar wal̦o̦k ilo jem̦l̦o̦kin “jiljilimjuon iien ko”?—Lale eoon 26.
Wãween an Ettõn̦ak in Wõjke eo Ekkejell̦o̦k ñan Aelõñ eo an Anij
KANAAN EO (Daniel 4:20-36)
Irooj ak tõl
(A) Juon wõjke kileplep
Ebõjrak an irooj ak tõl
(B) “Jeke wõjke eo,” im en “ãindein ium̦win jiljilimjuon iien ko”
Enaaj bar irooj ak tõl
(C) “Aelõñ eo am̦ enaaj jepl̦aakwaj”
Ilo iien eo kein kajuon ear jejjet kũtien kanaan in . . .
-
(D) Wõjke eo ear jutak kõn wõn? —Lale eoon 22.
-
(E) Ewi wãween an kar bõjrak an irooj ak tõl?—Riit Daniel 4:29-33.
-
(F) Ta eo ear wal̦o̦k ñan Nebukadnezar ilo jem̦l̦o̦kin “jiljilimjuon iien ko”?—Riit Daniel 4:34-36.
IIEN EO KEIN KAJUON EAR JEJJET KŨTIEN KANAAN IN
Irooj ak tõl
(D) Nebukadnezar, Kiiñ in Babil̦on
Ebõjrak an irooj ak tõl
(E) Ãlikin 606 B.C.E., Nebukadnezar ej jino an bwebwe im ejjab maroñ irooj ium̦win jimjuon iiõ ko
Enaaj bar irooj ak tõl
(F) Ejako an Nebukadnezar bwebwe im ej bar jino irooj
Ilo iien eo kein karuo ear jejjet kũtien kanaan in . . .
-
(G) Wõjke eo ear jutak kõn ta?—Riit 1 Kronikel 29:23.
-
(H) Ewi wãween an kar bõjrak aer irooj ak tõl? Ewi wãween ad jel̦ã bwe ear bõjrak wõt aer irooj ke Jesus ear pãd ijin ioon lal̦?—Riit Luk 21:24.
-
(I) Ia eo im ñããt eo Anij ear jitõñ bar juon ñan irooj im tõl?
IIEN EO KEIN KARUO EAR JEJJET KŨTIEN KANAAN IN
Irooj ak tõl
(G) Kiiñ in Israel ro me rej jutak kõn irooj im tõl eo an Anij
Ebõjrak an irooj ak tõl
(H) Kar ko̦kkure Jerusalem, im men in ear kabõjrak l̦ain in kiiñ ro an Israel ium̦win 2,520 iiõ ko
Enaaj bar irooj ak tõl
(I) Jesus ej jino irooj im tõl ilañ ãinwõt Kiiñ eo an Aelõñ eo an Anij
Ewi aetokin jiljilimjuon iien ko?
Jet m̦õttan ko ilo Baibõl̦ rej jipañ kõj ñan mel̦el̦e kõn m̦õttan ko jet. Ñan waanjoñak, ilo Baibõl̦, bokin Revelesõn ej ba bwe jilu jimattan iien ej mel̦el̦ein 1,260 raan ko. (Revelesõn 12:6, 14) Innem kõnke jiljilimjuon iien ko ej ruo alen l̦apl̦o̦k jãn nõm̦ba in, mel̦el̦ein bwe ej 2,520 raan ko. Ilo Baibõl̦ eo, jet iien juon raan ej jutak kõn juon iiõ. (Ezekiel 4:6) Eñin mel̦el̦ein jiljilimjuon iien ko me bokin Daniel ej kõnono kake—rej jutak kõn 2,520 iiõ ko.
5. Lal̦ in ear oktak jãn kar 1914 eo
Jesus ear kanaan kõn men ko renaaj wal̦o̦k ilo lal̦ in ãlikin an naaj erom Kiiñ. Riit Luk 21:9-11, innem bwebwenato kake kajjitõk in:
-
Ewi iaan men kein me Jesus ear kanaan kaki em̦õj am̦ loi ak roñ kake?
Rijjilõk Paul ear kõmel̦el̦e kõn ewi wãween nãj armej ro ilo raan ko ãliktata in an armej tõl. Riit 2 Timote 3:1-5, innem bwebwenato kake kajjitõk in:
-
Ewi iaan l̦õmn̦ak ak kõm̦m̦an kein em̦õj am̦ loi ippãn armej ro ilo raan kein?
6. An Aelõñ eo an Anij lrooj im tõl ej aikuj lujur kõj
Riit Matu 24:3, 14, innem bwebwenato kake kajjitõk kein:
-
Ta jerbal eo eaorõk me ej kaalikkar bwe Aelõñ eo an Anij ej kiiõ irooj im tõl?
-
Ewi wãween kwõmaroñ bõk kun̦aam̦ ilo jerbal in?
Aelõñ eo an Anij ej kiiõ irooj im tõl, im epaaktok iien eo enaaj irooj ioon aolepen lal̦ in. Riit Hibru 10:24, 25, innem bwebwenato kake kajjitõk in:
-
Ta eo kajjojo iaad ej aikuj kõm̦m̦ane ilo ad “jel̦ã bwe raan eo ej epaaktok”?
El̦aññe kwaar katak kõn juon men me emaroñ jipañ im lo̦mo̦o̦ren ro jet, ta eo kwõn kar em̦m̦akũt in kõm̦m̦ane?
JUON EMAROÑ KAJJITÕK: “Etke el̦ap an Ri-Kõnnaan ro an Jeova kõnono kõn iiõ eo 1914?”
-
Enaaj kar ta uwaak eo am̦?
TARLEP IN KATAK EO ILO TUKADU
Kanaan ko ilo Baibõl̦ im men ko rej wal̦o̦k ilo lal̦ in rej kaalikkar bwe Aelõñ eo an Anij ej kiiõ irooj im tõl. Jej kwal̦o̦k ad tõmak ilo Aelõñ in ikijjeen ad kwal̦o̦k naan kake im ilo ad kobal̦o̦k ilo iien kweilo̦k ko an eklejia.
Ãlij
-
Ta eo ear wal̦o̦k ilo jem̦l̦o̦kin jiljilimjuon iien ko me Baibõl̦ eo ilo bokin Daniel ear kanaan kake?
-
Ta eo ej kaalikkar ñan kwe bwe Aelõñ eo an Anij ear jino irooj im tõl ilo 1914 eo?
-
Ewi wãween kwõmaroñ kwal̦o̦k am̦ tõmak bwe Aelõñ eo ej irooj im tõl kiiõ?
KAL̦APL̦O̦K AM̦ MEL̦EL̦E
Lale ta eo armej rej ba ekoba ro rej ekkatak kõn bwebwenatoun armej, kõn oktak ko rar wal̦o̦k jãn kar 1914 eo.
Lale ewi wãween an kar kanaan eo ilo Matu 24:14 kar jelõte mour eo an juon em̦m̦aan.
“Ear L̦apl̦o̦k an Aorõk Iakiu Ippa jãn Jabdewõt Men!” (Naan in Keeañ No. 3 2017)
Ewi wãween ad jel̦ã bwe kanaan eo ilo Daniel jebta 4 ej jitõñl̦o̦k ñan Aelõñ eo an Anij?
“Ñããt eo Aelõñ eo an Anij Ear Jino Tõl? (Baat 1)” (Ad Jerbal ñan Anij, Oktoba 2014)
Ta eo ej kaalikkar bwe “jiljilimjuon iien ko” me Daniel jebta 4 ej kõnono kake ear jem̦l̦o̦k ilo iiõ eo 1914?
“Ñããt eo Aelõñ eo an Anij Ear Jino Tõl? (Baat 2)” (Ad Jerbal ñan Anij, Oktoba 2014)
a Etale katak ko ruo ãliktata ium̦win ijo ej ba “Kal̦apl̦o̦k Am̦ Mel̦el̦e” ilo katak in.
