SAK 32
Wẽnnaam Rĩungã rĩm rɩta naam masã!
Wẽnnaam Rĩungã rĩm sɩnga naam rɩɩb saasẽ, yʋʋmd 1914. Yaa wakat kãng tɛk me la ninsaalbã naamã be a yaoolem wakate. Bõe n kɩt tɩ d mi rẽ? Bɩ d ges bãngr-goam nins sẽn be Biiblã pʋgẽ wã, n paas yɛl nins sẽn maand dũniyã zugã, la nebã yel-manesem sẽn yaa to-to yʋʋmd 1914 tɛka.
1. Bõe la bãngr-goam nins sẽn be Biiblã pʋgẽ wã wilgda?
Biiblã sebr ning b sẽn boond tɩ Dãniyɛll sebrã pʋgẽ, b goma wakat b sẽn boond tɩ “yʋʋm a yopoe” yelle, n wilg tɩ wakat kãng baasgẽ la Wẽnnaam Rĩungã rĩm na n sɩng a naamã rɩɩbo. (Dãniyɛll 4:16, 17) Yʋʋm kobs poore, a Zeezi goma wakat kãng yelle, n bool-a tɩ “bu-zẽmsã wakat b sẽn yãkã,” la a paas tɩ wakat kãng ra ket n nan pa sa ye. (Luk 21:24) Wa d sẽn na n yã wã, yʋʋm a yopoe wã saa yʋʋmd 1914.
2. Yʋʋmd 1914 tɛka, bõe n maand dũniyã gill zugu? Nebã yel-manesem me yaa wãn-wãna?
A Zeezi Karen-biisã sok-a lame yaa: “Bõe n na n yɩ bãnd n wilg tɩ yãmb waame, la tɩ yaa dũniyã saab wakate?” (Matiye 24:3) A Zeezi leoka sokrã, n togs-b bũmb wʋsg sẽn na n maane, a sã n wa sɩng a naamã rɩɩb saasẽ. Wala makre, a yeelame tɩ zaba, kom la tẽn-digimds na n zĩndame. (Karm-y Matiye 24:7.) B ra pĩnd n togsa Biiblã pʋgẽ me tɩ nebã yel-manesem sẽn na n yɩ to-to “yaoolem wakatã” na n kɩtame “tɩ vɩɩmã lebg toogo.” (2 Tɩmote 3:1-5) Woto fãa maneg n yaa vẽeneg yʋʋmd 1914 tɛka.
3. Bõe yĩng tɩ dũniyã yɛl tar kengre, Wẽnnaam Rĩungã rĩm sẽn sɩng a naamã rɩɩbã tɛka?
A Zeezi sẽn lebg Wẽnnaam Rĩungã rĩmã poor bilf bala, a zaba ne a Sʋɩtãan la a zĩn-dãmbã saasẽ. A Sʋɩtãan pa tõog zabrã ye. Ad b sẽn yeel Biiblã pʋgẽ: “B lob-a-la tẽngã zugu, la b naaga a malɛgsã me n lob tẽngã zugu.” (Vẽnegre 12:9, 12) A Sʋɩtãan sũurã pʋʋga wʋsgo, bala a miime tɩ b na n wa sãam-a lame. Rẽ n so t’a kɩt tɩ toog la namsg be tẽngã gill zugu. Rẽ sõngda tõnd tɩ d bãng dũniyã yɛlã sẽn maneg n kengã võore! Wẽnnaam Rĩungã na n wa welga zu-loe-kãensã fãa.
D BAO N BÃNG N PAASE
D ges bũmb ning sẽn kɩt tɩ d miẽ tɩ Wẽnnaam Rĩungã rĩm sɩnga naam rɩɩb yʋʋmd 1914, la rẽ sẽn nafd tõnd to-to wã.
4. Bãngr-goam n be Biiblã pʋgẽ n wilgdẽ tɩ Wẽnnaam Rĩungã rĩm sɩnga naam rɩɩb yʋʋmd 1914
Wẽnnaam kɩtame t’a Nebukadnezaar sẽn yɩ pĩnd wẽndẽ Babilon rĩmã zãms zãmsdo, n yã bũmb sẽn na n wa maan beoog-daare. Zãmsdã n paas a Dãniyɛll sẽn bilg-a to-to wã wilgdame tɩ ra na n pidsa a Nebukadnezaar naamã zugu, la Wẽnnaam Rĩungã zugu.—Karm-y Dãniyɛll 4:14. a
Karm-y Dãniyɛll 4:17-23, tɩ rẽ poor bɩ y tik bũmb nins sẽn be taablo-rãmbã zugã n leok sogsgã:
-
(A) Bõe la a Nebukadnezaar yã a zãmsdã pʋgẽ?—Ges-y vɛrse 20 ne 21.
-
(B) Bõe n na n paam tɩɩgã? —Ges-y vɛrse 23.
-
(D) “Yʋʋm a yopoe wã” baasgẽ, bõe n na n maane?—Ges-y vɛrse 26.
Zãmsdã tɩɩgã sẽn tar loees ning ne Wẽnnaam Rĩungã
BÃNGR-GOMDÃ (Dãniyɛll 4:17-33)
Naamã sasa
(A) Tɩ-bedre
Naamã saabo
(B) “Kɛ-y tɩɩgã n lubi,” la y bas-a “hal tɩ ta yʋʋm a yopoe”
Naamã lebs n luglame
(D) “B na n leb n lebsa yãmb y naamã”
Bãngr-gomdã pipi pidsgã pʋgẽ . . .
-
(E) Tɩɩgã makda ãnda?—Ges-y vɛrse 22.
-
(F) Wakat bʋg la a bas naamã rɩɩbo?—Karm-y Dãniyɛll 4:26-30.
-
(G) “Yʋʋm a yopoe wã” baasgẽ, bõe n paam a Nebukadnezaare?—Karm-y Dãniyɛll 4:31-33.
PIPI PIDSGU
Naamã sasa
(E) Babilon rĩm a Nebukadnezaare
Naamã saabo
(F) Yʋʋmd 606 S.D.Z.R. poore, a Nebukadnezaar lebga gãeenga, n pa tõog n dɩ naam yʋʋm a yopoe
Naamã lebs n luglame
(G) A Nebukadnezaar yamã lebg n waame, t’a le sɩng a naamã rɩɩbo
Bãngr-gomdã yiib-n-soab pidsgã pʋgẽ . . .
-
(H) Tɩɩgã makda ãnda?—Karm-y 1 Kibay 29:23.
-
(I) Wakat bʋg la b bas naamã rɩɩbo? Bõe n kɩt tɩ d miẽ tɩ b ra pa rɩt naam a Zeezi sẽn wa n be tẽngã zugã?—Karm-y Luk 21:24.
-
(K) Wakat bʋg la b lebs n lugl naamã, la yɩ yɛɛnẽ?
YIIB-N-SOAB PIDSGU
Naamã sasa
(H) Israyɛll rĩm-dãmbã sẽn da rɩt naam Wẽnnaam yʋʋr yĩngã
Naamã saabo
(I) B sãama Zerizalɛm. Rẽnd na maan yʋʋm 2 520, Israyɛll rĩm pa le rɩ naam ye
Naamã lebs n luglame
(K) A Zeezi lebga Wẽnnaam Rĩungã rĩma, n sɩng naam rɩɩb saasẽ
Yʋʋm a yopoe wã kaoosa wakat a wãna?
Biiblã zĩis kẽer sõngda tõnd tɩ d wʋm a zĩis a taab võore. Wala makre, Biiblã sebr ning b sẽn boond tɩ Vẽnegr sebrã pʋgẽ, b wilgame tɩ wakat [bɩ yʋʋm] a tãab la pʋɩ-sʋk yaa rasem 1260. (Vẽnegre 12:6, 14) Woto rat n yeelame tɩ Biiblã bãngr-goam pʋgẽ, yʋʋmd yaa rasem 360. Dẽnd yʋʋm a yopoe wã yaa rasem 2520. Sasa ninga, Biiblã pʋgẽ, gom-bil ning sẽn yaa “daarã” tõe n dat n yeelame tɩ yʋʋmde. (Ezekɩyɛll 4:6) Dẽnd yʋʋm [bɩ wakat] a yopoe wã yell b sẽn gomd Dãniyɛll sebrã pʋgẽ wã yaa yʋʋm 2520.
5. Dũniyã yɛl toeema yʋʋmd 1914 tɛka
A Zeezi ra pĩnd n togsa dũniyã yɛl sẽn na n yɩ to-to, a sã n wa sɩng a naamã rɩɩbo. Karm-y Luk 21:9-11, tɩ rẽ poor bɩ y leok sokrã:
-
Yel-kãensã sʋka, bʋs la yãmb ne, pa rẽ bɩ n wʋmd tɩ b gomd b yelle?
Tẽn-tʋmd a Poll ra bilga nebã yel-manesem sẽn na n yɩ to-to ninsaalbã naamã yaoolem wakatã. Karm-y 2 Tɩmote 3:1-5, tɩ rẽ poor bɩ y leok sokrã:
-
Yãmb neeme tɩ nebã yel-manesmã yaa woto rũndã-rũndã bɩ?
6. Wilg-y tɩ y kɩsa sɩd tɩ Wẽnnaam Rĩungã rĩm rɩta naam
Karm-y Matiye 24:3, 14, tɩ rẽ poor bɩ y leok sogsgã:
-
Tʋʋm-bʋg sẽn tar yõod wʋsg n wilgd tɩ Wẽnnaam Rĩungã rĩm rɩta naam masã?
-
Bõe la y tõe n maan n naag n tʋm tʋʋm-kãngã?
Wẽnnaam Rĩungã rĩmã rɩta naam masã. Wakat ning a sẽn na n wa soog tẽngã gillã kolgame. Karm-y Ebre-rãmb 10:24, 25, tɩ rẽ poor bɩ y leok sokrã:
-
Bõe la tõnd ned kam fãa segd n maane, d “sẽn ne tɩ daarã kolgdame wã yĩnga”?
NINA TÕE N SOKAME YAA: “Bõe yĩng t’a Zeova Kaset rãmbã gomd yʋʋmd 1914 yell wʋsgo?”
-
Y na n leokame tɩ bõe?
KƲMSGO
Biiblã bãngr-goamã, n paas dũniyã yɛl sẽn yaa to-to wã wilgdame tɩ Wẽnnaam Rĩungã rĩm rɩta naam masã. D sã n moond Rĩungã koe-noogã, la d kẽnd tigissã, d wilgdame tɩ d kɩsa sɩd ne rẽ.
Lebg-n-gese
-
Yʋʋm a yopoe wã yell b sẽn da pĩnd n gom Dãniyɛll sebrã pʋgẽ wã baasgẽ, bõe n maane?
-
Bõe n kɩt tɩ y kɩs sɩd tɩ Wẽnnaam Rĩungã rĩm sɩnga naam rɩɩb yʋʋmd 1914?
-
Bõe la y tõe n maan n wilg tɩ y kɩsa sɩd tɩ Wẽnnaam Rĩungã rĩm rɩta naam?
BŨMB A TAABA
Bũmb ning kʋdemdã yel-mitba, la neb a taab sẽn yeel dũniyã yɛlã sẽn toeem to-to yʋʋmd 1914 tɛkã wɛɛngẽ.
“Wakat bʋg la dũniyã yɛlã tiig n toeeme?”(Yʋʋmd 2007 Réveillez-vous ! wã)
Bãngr-gomd ning sẽn be Matiye 24:14 pʋgẽ wã sẽn naf rao a ye to-to.
“Mam da nonga beezbollã n yɩɩd bũmb fãa!” (Yʋʋmd 2017 Gũusg Gasgã N° a 3)
Bõe n kɩt tɩ d miẽ tɩ bãngr-gomd ning sẽn be Dãniyɛll sak a 4 pidsda Wẽnnaam Rĩungã zugu?
Bõe n wilgd tɩ “yʋʋm a yopoe wã” yell b sẽn gomd Dãniyɛll sak a 4 pʋgẽ wã saa yʋʋmd 1914?
a Ges-y yaoolem sõss a yiibã sẽn be “Bũmb a taaba” zĩigẽ wã.