CHILAYIJO 32

Bushe bwaMwali Bumutonga!

LIJA

Bushe bwaMwali bwakatanga kutonga kudenga muna 1914. Mugole lyakalelyo ndopakatanga mazhuba okupejeleja obutongi bwabanhu. Tozuziba chini? Atiboneni zuprofeti zumomuBhayibhili nobunhu bwakatanga kuboneka kubanhu akale nozunu zumutikana penyika kuva muna1914.

1. Zuprofeti zumomuBhayibhili zunotondejani?

Ibhuku lyaDaniyeli lyakatondejela kuti Bushe bwaMwali bwalotanga kutonga panopela “misi ili 7.” (Daniyeli 4:16, 17) Jesu nebo wakalebeleka nonshaji yoyo “semisi yaamwe maluji,” akale wakalayija kuti unshaji yoyo awujakabanu wapela. (Luka 21:24) Sozwatichabona kuti misi ili 7 yeyi yakapela muna 1914.

2. Ndizupi zunu nobunu bwakatanga kuboneka kuva muna 1914?

Balayijwa baJesu bakombuza kuti: “Ngechipi chitondejelo chokuzha kwenu nechokupela kwenyika?” (Mateu 24:3) Jesu wakabashandula ebabuja zunu zunji zwalootikana yopo paalotanga kutonga saShe woBushe bwaMwali elikudenga. Zumwe zwadeni zunoshanganisila jihondo, inzhala nokudengunuka kwenyika. (Balani Mateu 24:7.) IBhaybhili lyakaleba kuchimbeli nobunu bwabanhu “mumazhuba okupejeleja” akale yozo zwalota kuti “ubenshaji unkukutu kulalama.” (2 Timoti 3:1-5) Zunu yozu zwakatanga kuboneka kasa kuva muna 1914.

3. Neni zunu zumubipisisa kuva pakatanga kutonga Bushe bwaMwali?

Jesu paakabigwa saShe woBushe bwaMwali, wakalwana ihondo kudenga naSatani namadimoni awe. Satani wakakomwa muhondo yadeni. IBhayibhili linoti “wakaposelwa penyika nebo nengilozi jije jakaposelwa pasi pamwempela naye.” (Zwakatondejelwa 12:9, 10, 12) Satani ulonyema kasa nokuti unoziba kuti uchoopalajwa. Ndiye umutisa kuti kube nokusheta nokulwajilwa penyika yose. Ndizo bubi bulizhele penyika! Bushe bwaMwali buchoopeja bukukutu bose.

FUNDA ZUNJI

Tokoloja kuti tozuziba chini kuti Bushe bwaMwali bwakatanga kutonga muna 1914 akale kuti tokwelela kutani.

4. Zuprofeti zweBhayihili zunotiswincha muna 1914

Yebani iVIDIYO.

IVIDIYO: Umbuso KaNkulunkulu Waqalisa Ukubusa Ngo 1914 (5:02)

Mwali wakata kuti Nebhukadineza She wokuBhabiloni elote zunu zwalotikana munelyamangwa. Zwakabhawunulwa naDaniyeli pezhulu pozunu zwakalotwa naNebhukadineza zwakatondejela yozo zwalotikana pezhulu pobushe bwaNebhukadineza noBushe bwaMwali.—Balani Daniyeli 4:17. a

Balani Daniyeli 4:20-26, akale shingisa ichati kushandula mibhuzo inotobela:

(A) Nebhukadineza wakabonani muloto lilye?—Linga vesi 20 na 21.
(B) Ini zwalotikana kunti?—Linga vesi 23.
(C) Ini zwalotikana palopela “misi ili 7”?—Linga vesi 26.

Unti wakalotwa unokwendelana chini noBushe bwaMwali

CHIPROFETI (Daniyeli 4:20-36)

Butongi

(A) Unti unkulwana

Butongi bunomiswa

(B) “Temani unti umbwele,” akale kujine “kupele misi ili 7”

Butongi bunobwilizwa

(C) “Bushe bubo buchoobwilizwa kunawi”

Pakazhajikijika chiprofeti yechi pokutanga . . .

(D) Unti wakabemilila ani?—Linga vesi 22.
(E) Butongi bubwe bwakama lini?—Balani Daniyeli 4:29-33.
(F) Ini zwakatikana kuna Nebhukadineza pakapela “misi ili 7”?—Balani Daniyeli 4:34-36.

KUZHAJIKIJIKA KWOKUTANGA

Butongi

(D) Nebhukadineza She wokuBhabhiloni

Butongi bunomiswa

(E) Pakapinda 606 B.C.E., Nebhukadineza wakatanga kupenga akale ajakatubula kutonga kwamakole ali 7

Butongi bunobwilizwa

(F) Indangalilo jaNebhukadineza jakabuya akotanga kutonga kabili

Pakazhajikijika chiprofeti yechi kwechibili . . .

(G) Unti wakabemilila ani?—Balani 1 Ndungulujo 29:23.
(H) Butongi bwabo bwakama lini? Tozuziba chini kuti abajakabetonga ponshaji Jesu elipenyika?—Balani Luka 21:24.
(I) Butongi yobu bwakabwilizwa lini akale kupi?

KUZHAJIKIJIKA KWECHIBILI

Butongi

(G) Mashe okuIsrayeli akabekamililila butongi bwaMwali

Butongi bunomiswa

(H) Kupalajwa kweJelusalema kunomisa kutonga kwamashe okuIsrayeli kwamakole 2 500

Butongi bunobwilizwa

(I) Jesu unotanga kutonga kudenga saShe woBushe bwaMwali

Milefu zwakata chini misi ili 7?

Mamwe mavesi amomuBhayibhili anotibhancha kuwhisisisa mamwe mavesi. Sonkwejaniso, ibhuku lyeBhayibhili lyaZwakatondejelwa linotibuja kuti misi mitatu nehafu inokwelana namazhuba 1 260. (Zwakatondejelwa 12:6, 14) Misi mitatu nehafu ilopetwa ilokwelana nemisi ili 7 inotiswincha pamazhuba 2 520. Panomwe nshaji iBhayibhili linoshingisa izhuba kumililila igole. (Ezekiyeli 4:6) Ndizwo misi ili 7 inolebwa nozwayo mubhuku lyaDaniyeli—imililila makole ali 2 520.

5. Zunu zwakachincha penyika kuva muna 1914

Yebani iVIDIYO.

IVIDIYO: Izinto Zitshintshe Kakhulu Emhlabeni Kusukela Ngo 1914 (1:10)

Jesu wakalebeleka nozozunu zwalotikana mushule abigwa kuba She. Balani Luka 21:9-11, akale kwejisani nombuzo yoyu:

Ndizupi zunu zwawumubona kana kuti zwawumuwha nozwazwo?

Umpositoli Paulo wakalebeleka nozokuti banhu banoba nobunu buli chini kumazhuba okupejeleja obutongi bwabanhu. Balani 2 Timoti 3:1-5, akale kwejisani nombuzo yoyu:

Unosobabona na banhu bakadayi mazhubano?

6. Kuziba kuti Bushe bwaMwali bumutonga zunotikutayija kuti titeni?

Balani Mateu 24:3, 14, akale kwejisani nemibhuzo yeyi:

Unshingoni ulokosha umutondeja kuti Bushe bwaMwali bumutonga?
Ini zwawungate kuti ushanganyile munshingo yoyu?

Bushe bwaMwali bwakatanga kutonga akale kwabapelyo kuti butonge inyika yose. Balani BaHebhelu 10:24, 25, akale kwejisani nombuzo yoyu:

Umwe nomwe wedu unokwelela kutani sezwo “tibona izhuba lisendela pelyo”?

Ungoziba chimwe chinu chinobhancha kana kuchija bamwe unokwelela kutani?

UMWE ANGABHUZA KUTI: “Neni baSumikiji baJehova begala belebeleka nozwa1914?”

Ungonshandula utini?

INI ZWAWAFUNDA

Zuprofeti zumomuBhayibhili nozunu zumutikana munyika zunotondeja kuti Bushe bwaMwali bumutonga. Totondejela kuti tozudimbwa yozu nokusuma indebo imbuya akale nokungwina mishangano yegubungano.

Kubwilulula

Ini zwakatikana pakapela misi ili 7 inolebelekwa nozwayo mubhuku lyaDaniyeli?
Ini zunota kuti ube nechokomende chokuti Bushe bwaMwali bwakatanga kutonga muna 1914?
Ungatondejela chini kuti unodimbwa kuti Bushe bwaMwali bumutonga feno?

Chilayijo chapela unsi wa:

Zwawungate

Kwelela kuba unshobeleli wendebo imbuya.

Zumwe zwawungade kuta:

Zumwe zwawungade kuta