ELONGESO 32

Ouhamba wa Huku Uli-ale Nokutumina!

OKUHIKISA

Ohamba Sesusi wahimbika okutumina keulu menima lyo 1914. Ononthiki mbahulilila nambo mbehimbika menima olio. Mahi otyipuka otyo tuetyinoñgonoka ñgeni? Ombimbiliya yapopia ovipuka vimwe ankho mavimoneka mouye tyina Sesusi amahimbika okutumina. Ngwe tyili viehimbika umwe okumoneka tundee menima lyo 1914.

1. Oityi Ombimbiliya yapopile-ale?

Omukanda wa Ndaniele, wapopia okuti ohamba Huku akoya itumine, mahimbika okutumina konthyulilo “yomivo epandu-vali.” (Daniel 4:16, 17) Etyi pahe Sesusi eya pano pohi, apopi umwe nawa-nawa okuti omivo epandu-vali ankho kavinelambe. Wapopile omuvo oo okuti “omuvo wanakwa wovilongo.” (Luka 21:24) Mahi apa kapii matulilongesa nawa atutale okuti omuvo oo, ovo Ndaniele na Sesusi vapopile, wapwa mo 1914.

2. Ovipuka patyi viamonaika mouye okutuka mo 1914?

Nthiki imwe, ovalongwa va Sesusi vemupulile okuti: “Tupopile, onalupi ovipuka ovio mavimoneka? Iya olipi enyingilikilo malilekesa okuti ove weyale, no lionthyulilo youye?” (Mateusi 24:3) Sesusi evepopila ovipuka ovinyingi ankho mavimoneka mouye tyina amehimbika okutumina keulu. Ovipuka vimwe apopile, watile makuya ovilwa, nondyala, novinimawe. (Tanga Mateusi 24:7.) Tupu Ombimbiliya yapopile okuti “kononthiki mbahulilila makukakala omivo vialema unene, viepuiya okukala.” Ovipuka ankho mavileme unene mokonda yovivi ovanthu valinga. (2 Timotiu 3:1-5) Ovipuka ovio aviho, viahimbika okumoneka umwe nawa mo 1914.

3. Oityi ovipuka vialemena unene okutuka apa Sesusi ahimbika okutumina?

Sesusi wati vala hikee kokutumina, alwisa ovo Satanasi novilulu. Ngwe ovo Satanasi novilulu viae avahaveteko ku Sesusi. Ombimbiliya yapopia Eliapu okuti: ‘Aliyumbwa mombuelo, no noandyu mbalio nambo mbayumbwa mombuelo kumwe nalio.’ (Eholololo 12:9, 10, 12) Pahe Satanasi wanumana unene mokonda utyii okuti apa katutu maipawa. Onyengo yae weyeta no movanthu. Otyo ovipuka mouye vialemena unene ñgaa! Mahi Ohamba Sesusi, wapopia okuti ovipuka aviho vitumonesa emone mevimaneko.

KUHANDE OKUNOÑGONOKA VALI?

Monoñgonoka oityi tutila umwe okuti Sesusi wakala Ohamba menima lyo 1914. Tupu motale etyi pahe onthwe tuesukisa okulinga.

4. Ombimbiliya yapopia okuti Sesusi ankho mahimbika okutumina mo 1914

Talei OVIDIU.

OVIDIU: Ohamba Sesusi Wahimbika Okutumina mo 1914 (5:02)

Nthiki imwe, Ohamba imwe yoko Mbambilonia ankho itiwa o Nambukondonosole, watele ondyoi. Mahi ondyoi yatyo, yatukile ku Siovaa. O Ndaniele vala wetyivilile okupimphulula etyi ipopia. Ankho ipopia etyi matyilingwa ohamba Nambukondonosole, netyi ha matyilingi Ouhamba wa Huku. — Tangei Daniel 4:17. a

Tangei Daniel 4:20-26. Tyina muamatange, tompholei omapulo aa eli pombuelo, otyo muendela kokulike naapa pokuati: “Oñgeni Ondyoi Yomuti Omunene Yelikuata Nouhamba wa Huku.”

(A) Ondyoi Nambukondonosole atele, wamuene-tyi? — Tala povelesikulu 20 no 21.
(B) Omuti ankho maulingwa ñgeni? — Tala povelesikulu 23.
(C) Tyina “omivo epandu-evali” viamapu, oityi ankho matyimoneka-po? — Tala povelesikulu 26.

Oñgeni Ondyoi Yomuti Omunene Yelikuata Nouhamba wa Huku

ETYI OMBIMBILIYA YAPOPIA (Daniel 4:20-36)

Omutumini

(A) Omuti umwe omunene

Omutumini, tyokutumina nkhele metyiyeke-po

(B) “Omuti utyokei-po” atee pakala “omivo epandu-vali”

Omutumini, tyokutumina metyikondokela vali

(C) “Mokondoka, otualako okutumina”

Apa tyalingwa tete . . .

(D) Omuti olie? — Tala povelesikulu 22.
(E) Oityi tyemulingisisa ayeke-po okutumina? — Tangei Daniel 4:29-33.
(F) Pahe etyi “omivo epandu-vali” viapwa, Nambukondonosole akala ñgeni? — Tangei Daniel 4:34-36.

APA TYALINGWA TETE

Omutumini

(D) Ohamba yoko Mbambilonia ankho itiwa o Nambukondonosole

Omutumini, tyokutumina nkhele metyiyeke-po

(E) Konyima yenima 606 P.K.E. Nambukondonosole avele komutwe, akala umwe omanima epandu-vali nii vala tyehetyivili vali okutumina

Omutumini, tyokutumina metyikondokela vali

(F) Nambukondonosole akala nawa, ahimbika vali okutumina

Apa tyalingwa tya vali . . .

(G) Omuti oityi? — Tangei 1 Crônicas 29:23.
(H) Onalupi vayekapo okutumina? Oityi tyilekesa okuti ovatumini ovo ankho kaveli nokutumina etyi Sesusi eli pano pohi? — Tangei Luka 21:24.
(I) Onalupi ankho mavahimbika okutumina iya mavatuminina-pi?

APA TYALINGWA TYA VALI

Omutumini

(G) Ono Hamba Huku apakele-ko vatumine ova Isilayeli

Omutumini, tyokutumina nkhele metyiyeke-po

(H) O Selusalei aihanyuako. Okutuka umwe opo, apakala omanima 2.520, otyo Huku ahapingiya-ko ohamba itumine vali ova Isilayeli

Omutumini, tyokutumina metyikondokela vali

(I) Sesusi, Ohamba Huku akoya, ahimbika okutumina keulu

Omivo epandu-vali, omanima eñgapi?

Ono tesitu mbumwe mbo Mbimbiliya mbutukuatesako okunoñgonoka ononkhuavo. Omukanda Eholololo wapopia okuti omivo vitatu nomeya, ononthiki mbakatuuka 1.260. (Eholololo 12:6, 14) Opo naina omivo epandu-vali, ononthiki mbuna 2.520. Pamwe Ombimbiliya ipopia onthiki ike, mahi muene-muene ili nokupopia enima. (Ezequiel 4:6) Ndaniele etyi apopia omivo epandu-vali, ankho una nokupopia omanima. Naina puetyi ati omivo epandu-vali, muene-muene ankho uli nokupopia omanima akatuuka 2.520.

5. Ouye wapiluluka unene okuhimbikila mo 1914

Talei OVIDIU.

OVIDIU: Ouye Wapiluluka Unene Okuhimbikila mo 1914 (1:10)

Sesusi wapopile etyi ouye ha maukakala tyina amakala Ohamba keulu. Tangei Luka 21:9-11, amutomphola epulo eli:

Ovipuka patyi viapopiwa mono velesikulu omo ove hamwe wamuene, okuti hatyo, hamwe weivile-ale okuti viamonaika kovilongo ovikwavo?

Omu apositolu Paulu wapopile ovipuka vimwe ovanthu mavalingi, atyimoneka umwe nawa okuti onthyulilo ili popepi. Tangei 2 Timotiu 3:1-5, amutomphola epulo eli:

Ovipuka ovio tuatanga apa, uhole okuvimona kovanthu?

6. Linga ovipuka mavilekesa okuti no ove utavela okuti Sesusi uli-ale nokutumina

Tangei Mateusi 24:3, 14, amutomphola omapulo aa:

Otyilinga patyi tyili nokulingwa hono, tyimoneka umwe nawa okuti Sesusi uli-ale nokutumina?
Oñgeni no ove upondola okuundapa motyilinga otyo?

Sesusi uli-ale nokutumina keulu, iya apa kapii mahimbika okutumina pano pohi. Tangei Ova Hebeleu 10:24, 25, amutomphola epulo eli:

Oityi tuna okulinga pahetyino tyina tueete okuti “onthiki [ya Sesusi yokutumina pano pohi] ikahi popepi”?

Ine ñgeno una etyi wii okuti tyihupisa omienyo vya vakwenyi, ñgeno walinga ñgeni?

INE HAMWE PAMONEKA OMUNTHU UMWE EKUPULU OKUTI: “Oityi Onombangi mba Siovaa vapopila unene enima lyo 1914?”

Ñgeno wemutiwi?

ETYI WELILONGESA

Welilongesa okuti Sesusi uli-ale nokutumina keulu. Otyo tutyitalela ku etyi Ombimbiliya yapopia, no ku etyi ouye ukahi. Wamona okuti omunthu wokutavela okuti Sesusi Ohamba keulu, ulongesa vakuavo Ombimbiliya, tupu wenda komaliongiyo.

Okupitulula

Oityi tyaenda-po etyi omivo epandu-vali Ndaniele apopile viapwa?
Oityi utila Sesusi wahimbika okutumina mo 1914?
Oityi omunthu wokutavela okuti Sesusi uli-ale nokutumina alinga?

Namana okulilongesa elongeso eli monthiki:

Hetekela okulinga ñgaa:

Linga ononkhono ukale etyi tyitiwa omuivisi opo no ove ulongese vakwenyi Ombimbiliya.

Ovikwavo:

Your other goal

KUHANDE OKUOVOLA VALI?

Ovanthu vamwe vokuatanga unene, vapopia okuti ouye wapiluluka unene okuhimbikila mo 1914. Mahi oityi tyapiluluka?

“Omuvo Onondunge Mbovanthu Mbapiluluka” (Pahukei!, Abril yo 2007)

Omukulu ou, etyi etyimona okuti etyi Sesusi apopile mu Mateusi 24:14 tyili nokulingwa, apiluluka, nae ahande okulinga atyiho Sesusi atumine. Tanga onthele ei utyitale.

“Ankho Ndyihole Vali o Beisebol Tyipona Ovipuka Aviho!” (Omutala Womulavi, No. 3 2017)