EISHOMO 32
Obukama bwa Ruhanga Nibutegyeka Hati!
Obukama bwa Ruhanga bukatandika kutegyekyera omu iguru omuri 1914. Obwo nibwo n’ebiro by’emperu eby’obutegyeki bw’abantu byatandika. Nitukimanya tuta? Yetegyereze obunabi bwa Baibuli, embeera omu nsi, n’oku abantu batwire nibatwaza kuruga 1914.
1. Obunabi bwa Baibuli nibworeka ki?
Ekitabo kya Baibuli ekya Danieli nikyoreka ngu Obukama bwa Ruhanga bukaba nibwija kutandika kutegyeka aha muheru gw’obwire oburikwetwa ‘omwanya gw’emyaka mushanju.’ (Danieli 4:16, 17) Bwanyima y’ebyasha bingi, Yesu akagamba aha bwire obwo ‘nk’obusingye bw’amahanga,’ kandi akooreka ngu bukaba butakahendeire. (Luka 21:24) Nk’oku turikuza kureeba, omwanya gw’emyaka mushanju gukahendera omuri 1914.
2. Ni mbeera ki na mitwarize ki etwire neereebwa butunu kuruga 1914?
Abeegi ba Yesu bakamubuuza bati: Ni ‘kamanyiso ki ak’okwija kwawe, [n’ak’okuhendera kw’entebeekanisa] y’ensi egi?’ (Matayo 24:3) Yesu akabagarukamu arikubagambira ebintu bingi ebyabaire nibiija kubaho bwanyima y’okutandika kutegyeka omu iguru nk’Omugabe w’Obukama bwa Ruhanga. Ebintu ebi nibitwariramu entaro, eibura ry’eby’okurya, n’emitsitsa. (Shoma Matayo 24:7.) Kandi Baibuli ekagira ngu entwaza y’abantu omu ‘biro by’emperu’ ekaba neija kureetera embeera kuba ezigumire kwemera. (2 Timoseo 3:1-5) Embeera ezi n’emitwarize nk’egi bitwire biriho kuruga 1914.
3. Ahabw’enki embeera zeeyongyeire kuba mbi omu nsi kuruga obu Obukama bwa Ruhanga bwatandika kutegyeka?
Yesu aherize kuba Omugabe w’Obukama bwa Ruhanga, akarwana orutaro na Sitaane na baadaimoni. Omu rutaro orwo Sitaane akasingurwa. Baibuli neegira ngu ‘akanagwa aha nsi na baamaraika be.’ (Okushuuruurwa 12:9, 10, 12) Sitaane aine ekiniga kingi ahabw’okuba naamanya ngu naaza kucwekyerezibwa. N’ahabw’ekyo, Sitaane naareeta obusaasi n’okubonabona omu nsi yoona. Tikirikutangaaza kureeba ngu embeera omu nsi ni mbi munonga! Obukama bwa Ruhanga nibwija kwihaho oburemeezi obu.
SHWIJUMA GYE
Yetegyereze oku turikumanya ngu Obukama bwa Ruhanga bukatandika kutegyeka omuri 1914, n’oku eki kirikutukwataho.
4. Kurugiirira ahari Baibuli Obukama bwa Ruhanga bukatandika kutegyeka 1914
Ruhanga akareetera Omugabe Nebukadeneeza owa Babulooni eya ira kuroota ekirooto ky’obunabi. Ekirooto ekyo n’enshoboorora yaakyo ei Danieli yaahaire nibyoreka ngu kikaba nikikwata aha butegyeki bwa Nebukadeneeza hamwe n’Obukama bwa Ruhanga.—Shoma Danieli 4:17. a
Shoma Danieli 4:20-26, kandi okorese kyati kugarukamu ebibuuzo ebirikukurataho:
-
(A) Nebukadeneeza akareeba ki omu kirooto?—Reeba omushororongo 20 na 21.
-
(B) Niki ekyabaire nikiija kuhika aha muti?—Reeba omushororongo 23.
-
(C) Niki ekyabaire nikiija kubaho aha muheru ‘gw’omwanya gw’emyaka mushanju’?—Reeba omushororongo 26.
Oku Ekirooto ky’Omuti Kirikukwata aha Bukama bwa Ruhanga
OBUNABI (Danieli 4:20-36)
Obutegyeki
(A) Omuti muhango munonga
Obutegyeki kuteganisibwa
(B) ‘Tema ogwo muti,’ reero hahingureho ‘omwanya gw’emyaka mushanju’
Obutegyeki kugarurwaho
(C) ‘Obugabe bwawe nibwija’ kukugarurirwa
Okuhikiirira kw’okubanza okw’obunabi obu . . .
-
(D) Omuti gukaba nigujwekyera oha?—Reeba omushororongo 22.
-
(E) Obutegyeki bwe bukateganisibwa buta?—Shoma Danieli 4:29-33.
-
(F) Niki ekyahikire ahari Nebukadeneeza ‘omwanya gw’emyaka mushanju’ ku gwahendeire?—Shoma Danieli 4:34-36.
OKUHIKIIRIRA OKW’OKUBANZA
Obutegyeki
(D) Nebukadeneeza, Omugabe wa Babulooni
Obutegyeki kuteganisibwa
(E) Bwanyima ya 606 Y.A., Nebukadeneeza akagwa eiraro yaamara emyaka mushanju atarikutegyeka
Obutegyeki kugarurwaho
(F) Nebukadeneeza akakira eiraro yaagaruka omu butegyeki bwe
Okuhikiirira kwa kabiri okw’obunabi obu . . .
-
(G) Omuti gukaba nigujwekyera baahi?—Shoma 1 Obusingye 29:23.
-
(H) Obutegyeki bwabo bukateganisibwa buta? Nitumanya tuta ngu bakaba batarikutegyeka, obu Yesu yaabaire ari omu nsi?—Shoma Luka 21:24.
-
(I) Obutegyeki obu bukagarurwaho ryari kandi nkahi?
OKUHIKIIRIRA OKWA KABIRI
Obutegyeki
(G) Abagabe ba Israeli abaabaire nibajwekyera obutegyeki bwa Ruhanga
Obutegyeki kuteganisibwa
(H) Yerusaalemu ekacwekyerezibwa, kyateganisa orunyiriri rw’abagabe ba Israeli kumara emyaka 2,520
Obutegyeki kugarurwaho
(I) Yesu akatandika kutegyeka omu iguru nk’Omugabe
Omwanya gw’emyaka mushanju nigwingana ki?
Ebyahandiikirwe ebimwe nibituhwera kwetegyereza ebindi ebiri omu Baibuli. Nk’eky’okureeberaho, ekitabo ky’Okushuuruurwa nikigira ngu omwanya gw’emyaka eshatu n’ekicweka nigwingana ebiro 1,260. (Okushuuruurwa 12:6, 14) Ekirikumanyisa ngu noobazamu kabiri kutunga omwanya gw’emyaka mushanju, nari ebiro 2,520. Omu Baibuli, obumwe ekigambo ekiro nikiba nikijwekyera omwaka. (Ezekieli 4:6) Nikyo kimwe n’obunabi obw’emyaka mushanju oburi omu kitabo kya Danieli oburikujwekyera emyaka 2,520.
5. Ensi ekahinduka kuruga 1914
Yesu akagamba oku embeera zaabaire niziija kuba, yaaheza kuba Omugabe. Shoma Luka 21:9-11, kubaasa kugarukamu ekibuuzo eki:
-
Iwe ni mbeera ki ezi orikureeba nizibaho, nari ezi orikuhurira?
Entumwa Paulo akashoboorora oku abantu baabaire nibaija kuba nibatwaza omu biro by’emperu eby’obutegyeki bw’abantu. Shoma 2 Timoseo 3:1-5, kubaasa kugarukamu ekibuuzo eki:
-
Ni mitwarize ki ei orikukira kureeba omu bantu ebiro ebi?
6. Tushemereire kugira eki twakora kushagika Obukama bwa Ruhanga
Shoma Matayo 24:3, 14, kubaasa kugarukamu ebibuuzo ebi:
-
Ni murimo ki omukuru ogurikworeka ngu Obukama bwa Ruhanga buriyo nibutegyeka hati?
-
Noobaasa kwejumba ota omu murimo ogu?
Obukama bwa Ruhanga buriyo nibutegyeka hati, kandi buri haihi kutandika kutegyeka ensi omu bwijwire. Shoma Abaheburaayo 10:24, 25, kubaasa kugarukamu ekibuuzo eki:
-
Buri omwe ahariitwe aine kukora ki obu turikureeba ekiro ky’emperu kiri haihi kuhika?
Waamanya ekintu ekirikubaasa kuhwera abandi kandi kikabajuna, nikikuhiga kukora ki?
OMUNTU NAABAASA KUBUUZA ATI: “Ahabw’enki Abajurizi ba Yehova nibakira kugamba ahari 1914?”
-
Noobaasa kugarukamu ota?
OMU BUGUFU
Obunabi, ebyabaireho, n’embeera, nibihamya ngu Obukama bwa Ruhanga buriyo nibutegyeka hati. Nitworeka ngu nitwikiriza eki, turikububuuriraho, turikuza n’omu nteerane.
Okweijutsya
-
Hakabaho ki aha muheru gw’omwanya gw’emyaka mushanju eyaagambirweho omu kitabo kya Danieli?
-
Niki ekirikukuhamiza ngu Obukama bwa Ruhanga bukatandika kutegyeka omuri 1914?
-
Noobaasa kworeka ota ngu noikiriza ngu Obukama bwa Ruhanga buriyo nibutegyeka hati?
JUMBURA EBINDI
Yetegyereze eki ab’ebyafaayo n’abandi barikugamba aha mpinduka ezitwire niziba omu nsi kuruga 1914.
Shoma oreebe oku obunabi oburi omuri Matayo 24:14 bwakwatsire aha mushaija omwe.
“Nkaba Ninkunda Omuzaano gwa Baseball Kukira Ebindi Byona!” (Omunaara gw’Omurinzi Na. 3 2017)
Nitumanya tuta ngu obunabi oburi omu Danieli eshuura 4 nibukwata aha Bukama bwa Ruhanga?
Niki ekirikworeka ngu ‘omwanya gw’emyaka mushanju’ ogurikugambwaho omu Danieli eshuura 4 gukahendera omuri 1914?
a Reeba ebicweka bibiri ebirikuhereerukayo ahansi y’ekicweka Jumbura Ebindi omu ishomo eri.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
