LÈS 32
E Reino di Dios Ta Gobernando!
E Reino di Dios a kuminsá goberná den shelu na aña 1914. E aña ei mes, e último dianan di gobernashon humano a kuminsá. Kon nos por sa esei? Laga nos wak kiko Beibel a profetisá. Ademas, nos lo wak kon situashon na mundu i komportashon di hende ta desde 1914.
1. Kiko Beibel a profetisá?
E buki di Beibel Dánièl ta mustra ku e Reino di Dios a kuminsá goberná na final di un periodo ku Beibel ta yama “shete tempu.” (Dánièl 4:16, 17) Vários siglo despues, Hesus a referí na e periodo ei komo “e tempu stipulá di e nashonnan.” Ademas, e tempu ei, Hesus a bisa ku ainda e periodo ei no a terminá. (Lukas 21:24) Manera nos lo mira, e periodo di shete tempu ei a terminá na 1914.
2. Desde 1914, kiko ta pasando na mundu i kon hende ta komportá nan mes?
E disipelnan di Hesus a puntra Hesus: “Kiko lo ta e señal di bo presensia i di konklushon di e era akí?” (Mateo 24:3) Komo kontesta, Hesus a papia di vários suseso ku lo tuma lugá despues ku e kuminsá goberná den shelu komo Rei di e Reino di Dios. Por ehèmpel, Hesus a menshoná guera, skarsedat di kuminda i temblor. (Lesa Mateo 24:7.) Beibel a bisa tambe ku e manera ku hende ta komportá nan mes den “e último dianan” lo hasi bida “difísil.” (2 Timoteo 3:1-5) Desde 1914, e kosnan akí ta mas bisto ku nunka.
3. Dikon situashon na mundu a bira asina malu for di tempu ku e Reino di Dios a kuminsá goberná?
Poko despues ku Hesus a bira Rei di e Reino di Dios, el a bringa kontra Satanas i e demoñonan. Satanas a pèrdè e guera ei. Beibel ta bisa ku Satanas “a ser bentá abou riba tera i su angelnan a ser bentá abou huntu kuné.” (Revelashon 12:9, 10, 12) Satanas ta hopi rabiá pasobra e sa ku lo e ser destruí. P’esei, e ta kousa doló i sufrimentu riba henter tera. Esaki ta yuda nos komprondé dikon tin asina tantu maldat riba mundu. E Reino di Dios lo kaba ku tur maldat i resolvé tur e problemanan ku tin na mundu.
KIKO MAS NOS POR SIÑA?
Laga nos wak dikon nos por bisa ku e Reino di Dios a kuminsá goberná na 1914 i kon nos por demostrá ku nos ta kere ku e Reino di Dios ta gobernando.
4. Profesia di Beibel ta mustra ku e Reino di Dios a kuminsá goberná na 1914
Dios a laga Rei Nabukodónosor di Babilonia di antigwedat haña un soño ku a mustr’é kiko lo pasa den futuro. Den Beibel, nos por lesa tokante e soño akí i tokante e splikashon ku Dánièl a duna di e soño akí. Ta bisto ku e soño akí tabata tokante e gobernashon di Nabukodónosor i e Reino di Dios.—Lesa Dánièl 4:17. a
Lesa Dánièl 4:20-26. Despues, usa e tabèl pa kontestá e siguiente preguntanan:
-
(A) Kiko Nabukodónosor a mira den su soño?—Wak versíkulo 20 i 21.
-
(B) Kiko lo a pasa ku e palu?—Wak versíkulo 23.
-
(C) Kiko lo a sosodé ora “shete tempu” pasa?—Wak versíkulo 26.
Ki Relashon Tin Entre e Soño Tokante e Palu i e Reino di Dios?
E PROFESIA (Dánièl 4:20-36)
Gobernashon
(A) Un palu masha grandi
Gobernashon a ser interumpí
(B) “Kap e palu basha abou” i laga “shete tempu” pasa
Gobernashon a ser restablesé
(C) ‘Lo bo bolbe sinta riba bo trono’
Promé kumplimentu:
-
(D) Ken e palu a representá?—Wak versíkulo 22.
-
(E) Na ki tempu Nabukodónosor a stòp di goberná?—Lesa Dánièl 4:29-33.
-
(F) Kiko a pasa ku Nabukodónosor despues di “shete tempu”?—Lesa Dánièl 4:34-36.
PROMÉ KUMPLIMENTU
Gobernashon
(D) Nabukodónosor, Rei di Babilonia
Gobernashon a ser interumpí
(E) Despues di aña 606 promé ku Kristu, Nabukodónosor a bira loko i no por a goberná mas pa shete aña literal
Gobernashon a ser restablesé
(F) Nabukodónosor a rekobrá su sano huisio i a bolbe kuminsá goberná
Di dos kumplimentu:
-
(G) Ken e palu a representá?—Lesa 1 Krónikanan 29:23.
-
(H) Na ki tempu e reinan di Israel a stòp di goberná? Kon nos por sa ku e reinan akí no tabata goberná tempu ku Hesus tabata riba tera?—Lesa Lukas 21:24.
-
(I) Na ki tempu i na unda e gobernashon a ser restablesé?
DI DOS KUMPLIMENTU
Gobernashon
(G) E reinan di Israel ku a representá Dios su gobernashon
Gobernashon a ser interumpí
(H) Herúsalèm a ser destruí. E gobernashon di e reinan di Israel a ser interumpí pa 2.520 aña
Gobernashon a ser restablesé
(I) Hesus a kuminsá goberná den shelu komo Rei di e Reino di Dios
Kon largu shete tempu a dura?
Tin parti di Beibel ku por yuda nos komprondé otro parti di Beibel. Por ehèmpel, e buki di Beibel Revelashon ta bisa ku tres tempu i mei ta 1.260 dia. (Revelashon 12:6, 14) Shete tempu ta dos biaha e number ei, òf 2.520 dia. Tin biaha, Beibel ta usa un dia pa referí na un aña. (Ezekiel 4:6) Pues, e shete tempu den e buki Dánièl ta 2.520 aña.
5. Mundu a kambia desde 1914
Hesus a bisa kon situashon na mundu lo ta despues ku e bira Rei. Lesa Lukas 21:9-11. Despues, analisá e siguiente pregunta:
-
Kua di e kosnan ku e teksto akí ta menshoná bo a mira òf bo a tende di dje?
Apòstel Pablo a bisa kon hende lo ta den e último dianan. Lesa 2 Timoteo 3:1-5. Despues, analisá e siguiente pregunta:
-
Kua di e karakterístikanan akí bo a mira den hende?
6. Kon bo por demostrá ku bo ta kere ku e Reino di Dios ta gobernando?
Lesa Mateo 24:3, 14. Despues, analisá e siguiente preguntanan:
-
Ki trabou importante ta mustra ku e Reino di Dios ta gobernando?
-
Kon abo por yuda den e trabou importante akí?
E Reino di Dios ta gobernando awor, i e dia pa e kuminsá goberná henter tera ta yegando serka. Lesa Hebreonan 10:24, 25. Despues, analisá e siguiente pregunta:
-
Kiko kada un di nos mester hasi segun ku nos “ta mira e dia ta yega serka”?
Si bo a haña sa di algu ku lo por yuda otro hende i ku lo por skapa nan bida, kiko lo bo hasi?
SI UN HENDE PUNTRA: “Dikon Testigunan di Yehova ta bisa ku 1914 ta un aña asina importante?”
-
Kiko lo bo bisa?
RESÚMEN
Profesia di Beibel i loke ta pasa na mundu ta mustra ku e Reino di Dios ta gobernando awor. Nos ta demostrá ku nos ta kere esei ora nos ta prediká tokante e Reino di Dios i ta asistí na nos reunionnan.
Repaso
-
Kiko a sosodé ora e shete tempu ku e buki di Beibel Dánièl a profetisá a pasa?
-
Kiko ta konvensé abo ku e Reino di Dios a kuminsá goberná na 1914?
-
Kon bo por demostrá ku bo ta kere ku e Reino di Dios ta gobernando awor?
MAS INFORMASHON INTERESANTE
Wak kiko algun historiadó i otro hende a bisa tokante e kambionan na mundu desde 1914.
“E Tempu Ku Norma di Hende A Kambia Drástikamente” (Spièrta! di aprel 2007, na spañó)
Lesa kon un hòmber a kambia su bida ora el a siña tokante e profesia na Mateo 24:14.
“Mi Tabata Stima Beisbòl Mas ku Tur Kos!” (E Toren di Vigilansia Num. 3 2017)
Kon nos por sa ku e profesia na Dánièl kapítulo 4 ta tokante e Reino di Dios?
Kiko ta mustra ku e periodo di “shete tempu” menshoná den Dánièl kapítulo 4 a terminá na 1914?
a Wak e dos último artíkulonan den e sekshon Mas Informashon Interesante di e lès akí.
Otro Artíkulo Interesante
PREGUNTA KU HOPI HENDE SA HASI
Kon un Kurso di Beibel Ku Testigunan di Yehova Ta Bai?
Pa sigui un kurso di Beibel interaktivo grátis ku Testigunan di Yehova, bo por usa kualke tradukshon di Beibel ku bo ta preferá. Sinti bo liber pa invitá henter bo famia òf kualke amigu pa sigui e kurso di Beibel huntu ku bo.
