LESON 32
Kingdom blo God Hem Rul Distaem!
Kingdom blo God hem start for rul lo heven lo 1914. Lo datfala year tu hem start blo olketa last day lo rul blo olketa gavman blo man. Hao nao iumi savve lo datwan? Bae iumi storyim olketa Bible profesi, olketa samting wea happen lo world, and wei blo pipol start kam lo 1914.
1. Wat nao Bible profesi showim?
Wanfala profesi lo Bible buk Daniel showim hao Kingdom blo God bae start for rul lo end blo “sevenfala yia.” a (Daniel 4:16, 17) Winim 600 handred year bihaen, samting wea Jesus talem showim datfala Kingdom hem no rul yet bikos hem storyim “taem wea olketa kantri rul” and sei datfala taem hem no finis yet. (Luke 21:24) So, “sevenfala yia” wea Daniel story abaotem hem mas wanfala profesi abaotem staka year winim datwan. And olsem iumi bae lanem, datfala sevenfala yia hem finis lo 1914.
2. Start lo 1914, wat nao olketa samting wea happen lo world, and hao nao wei blo pipol?
Olketa disaepol blo Jesus sei lo hem: “Wanem taem nao olketa samting hia bae happen and wanem nao saen wea bae showimaot iu stap and world hem gogo for finis?” (Matthew 24:3) Jesus talem olketa staka samting wea bae happen bihaen hem start for King lo Kingdom blo God lo heven. Samfala samting nao hem war, bigfala hangre, and olketa earthquake. (Readim Matthew 24:7.) Bible sei tu lo “olketa last day” wei blo pipol bae mekem “evri samting hem hard tumas.” (2 Timothy 3:1-5) Iumi lukim olketa samting hia happen start lo 1914.
3. Why nao world hem nogud tumas start from taem wea Kingdom blo God hem rul?
No longtaem bihaen Jesus King lo Kingdom blo God, hem faet lo heven witim Satan and olketa demon. Satan lus lo datfala faet. Bible sei “olketa torowem [hem] go daon long earth . . . witim olketa angel bilong hem.” (Revelation 12:9, 10, 12) Satan kros tumas bikos hem savve God bae finisim hem. So hem nao bihaenem evri nogud samting wea happen lo world, dastawe world hem nogud tumas! Kingdom blo God bae stretem evri samting hia.
DIG GO MOA
Bae iumi lanem wat nao mekem iumi savve Kingdom hem start for rul lo 1914 and hao diswan shud affectim iumi.
4. Olketa Bible profesi showim Kingdom start for rul lo 1914
Lo wanfala dream, God showim lo King Nebuchadnezzar blo Babylon bifor, wanem bae happen lo future. Datfala dream and mining blo hem wea Daniel storyim lo Bible, showim dream hia hem abaotem rul blo King Nebuchadnezzar and Kingdom blo God.—Readim Daniel 4:17. b
Readim Daniel 4:20-26, then iusim chart lo next page for ansarem olketa kwestin hia:
-
(A) Wat nao Nebuchadnezzar lukim insaed dream blo hem?—Lukim verse 20 and 21.
-
(B) Wat nao bae happen lo datfala tree?—Lukim verse 23.
-
(C) Wat nao bae happen lo end blo datfala “sevenfala yia”?—Lukim verse 26.
Hao Datfala Tree Insaed Dream Join Witim Kingdom blo God
PROFESI (Daniel 4:20-36)
Rul
(A) Wanfala big maeti tree
Rul hia stop
(B) “Katemdaon tri yia,” and “sevenfala yia” mas go pass
Rul hem start moa
(C) “Bae iu kamap king moa”
Firstaem wea profesi hia kamap tru . . .
-
(D) Hu nao datfala tree hem stand for hem?—Lukim verse 22.
-
(E) Wat taem nao rul blo hem stop?—Readim Daniel 4:29-33.
-
(F) Wat nao happen lo Nebuchadnezzar lo end blo datfala “sevenfala yia”?—Readim Daniel 4:34-36.
FIRSTAEM HEM KAMAP TRU
Rul
(D) Nebuchadnezzar, King blo Babylon
Rul hia stop
(E) Bihaen 606 B.C.E., Nebuchadnezzar lusim stretfala tingting and no fit for rul for sevenfala year
Rul hem start moa
(F) Nebuchadnezzar kasem bak stretfala tingting and start for rul moa
Second taem wea profesi hia kamap tru . . .
-
(G) Hu nao datfala tree hem stand for hem?—Readim 1 Chronicles 29:23, NW.
-
(H) Wat taem nao rul blo olketa hem stop? Hao nao iumi savve olketa no rul taem Jesus stap lo earth?—Readim Luke 21:24.
-
(I) Wat taem nao rul blo Jehovah start moa and lo wea?
SECOND TAEM HEM KAMAP TRU
Rul
(G) Olketa king blo Israel representim rul blo God
Rul hia stop
(H) Jerusalem distroe, and for 2,520 year no eniwan lo laen blo olketa king hia rul
Rul hem start moa
(I) Jesus start for King lo Kingdom blo God lo heven
Hao long nao datfala sevenfala year (taem)?
Samfala scripture lo Bible savve helpem iumi for minim olketa nara scripture. Example nao, Bible buk Revelation sei thri and haf taem hem 1,260 day. (Revelation 12:6, 14) So sevenfala taem bae hem 2,520 day. So diswan hem semsem witim sevenfala year, wea each year hem 360 day. Taem Bible storyim wanfala day, samfala taem hem savve minim wanfala year. (Ezekiel 4:6) Hem nao samting wea profesi lo Bible buk Daniel duim. So datfala “sevenfala yia,” hem 2,520 year.
5. World hem change start from 1914
Jesus storyim olketa samting wea bae happen lo world bihaen hem kamap King. Readim Luke 21:9-11, then discussim tugeta disfala kwestin:
-
Which wan lo olketa samting hia nao iu lukim or herem hem happen?
Aposol Paul storyim wei blo pipol lo olketa last day anda lo rul blo man. Readim 2 Timothy 3:1-5, then discussim tugeta disfala kwestin:
-
Hao, iu lukim olketa pipol distaem wei blo olketa olsem?
6. Duim samting wea showim iu bilivim Kingdom blo God hem rul distaem
Readim Matthew 24:3, 14, then discussim tugeta olketa kwestin hia:
-
Wat nao important waka wea gohed wea showim Kingdom blo God hem rul distaem?
-
Wat nao iu savve duim for join lo disfala waka?
Kingdom blo God hem rul distaem, and klosap tumas nao for hem rulim full earth. Readim Hebrew 10:24, 25, then discussim tugeta disfala kwestin:
-
Wat nao each wan lo iumi shud duim taem iumi “lukim datfala day hem kakam klosap”?
If iu savve lo samting wea bae helpem or sevem laef blo narawan, wat nao bae iu duim?
ENIWAN MAET ASK: “Why nao Olketa Jehovah’s Witness sei 1914 hem wanfala important year?”
-
Wat nao bae iu talem?
MAIN POINT
Olketa Bible profesi and olketa samting wea happen lo world showim Kingdom blo God hem rul distaem. Iumi showim iumi bilivim datwan taem iumi preach abaotem Kingdom and go lo olketa meeting.
Review
-
Wat nao happen lo end blo sevenfala yia wea Bible buk Daniel storyim?
-
Wat nao mekem iu bilivim Kingdom blo God hem start for rul lo 1914?
-
Wat nao iu savve duim for showim iu bilivim Kingdom hem rul distaem?
FAENDAOT MOA
Read abaotem samting wea olketa man wea raet abaotem history and olketa narawan talem abaotem olketa change wea happen lo world start from 1914.
Read abaotem hao profesi lo Matthew 24:14 affectim laef blo wanfala man.
“Mi Laekem Tumas Baseball Winim Eni Nara Samting!” (Wastaoa No. 3 2017)
Hao nao iumi savve profesi lo Daniel chapter 4 hem join witim Kingdom blo God?
“Long Wanem Taem Nao Kingdom Bilong God Hem Start for Rul? (Part 1)” (Wastaoa, November 1, 2014)
Wat nao showim “sevenfala yia” wea Daniel chapter 4 storyim hem finis lo 1914?
“Long Wanem Taem Nao Kingdom Bilong God Hem Start for Rul? (Part 2)” (Wastaoa, January 1, 2015)
a Hebrew toktok wea olketa transleitim lo “sevenfala yia” insaed disfala verse, samfala Bible transleitim lo “sevenfala taem.”
b Lukim tufala last article lo Faendaot Moa sekson blo disfala leson.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
