32 CAJ YACHACUY
¡Diospa Gobiernunga galaycamushgana!
Diospa Gobiernunga cieluchomi camacash y 1914 watachomi galaycamush. Chay watapitami runacunapa gobiernuncunaga ushacänanpäna caycan. ¿Imanirtaj chayta ninchi? Caycho yachacushun imatataj Biblia puntalapitana wilacurgan; imataj cay munducho pasaycan y runacunapis imanotaj cawarcaycan.
1. ¿Imatataj Biblia puntalapitana wilacush?
Bibliacho Daniel libruga wilacurgan Diospa Gobiernun galaycunanpaj ‘ganchis watacunaraj’ pasaptin (Daniel 4:16, 17). Naciuncunapa “tiempun cumplingancama”, chaytapis quiquin Jesús nergan y tantiachicurgan tiempuncho chay ganchis watacuna manaraj ushacashganta (Lucas 21:24). Ichanga 1914 watapäga ushacarganmi.
2. ¿Imacunatataj cay munducho ricashcanchi 1914 watapita?
Jesustami gatejnincuna cayno tapurgan: “Cutimunayquipaj y cay patsa ushacänanpaj ¿ima señaltaj canga?” (Mateo 24:3). Jesusnami nergan cay Pachacho imacuna pasananpaj, cielucho gobernar galaycuptin. Parlamurgan guerracunapita, muchuypita y terremotocunapita (leiriy Mateo 24:7). Bibliapis wilacurgan “ultimu tiempucho” runacuna pasaypa mana ali capäcunapaj y culpancunaraycur cawaypis más sasamanraj ticracurinanpaj cajta (2 Timoteo 3:1-5). 1914 watapitami chay lapancuna may chaycho ricacämun.
3. ¿Imanirtaj imacunapis más sasamanraj ticracurish Jesús gobernar galaycushgan wichanpita?
Cielucho Jesús gobernar galaycuptenga, Satanaswan demoniucunaga chaychorämi carcaycargan. Bibliami nin guerra galacuycushganta y Jesús vencishganta, “Satanasta llapan gatirajnincunatawan janaj pachapita gargamuran” chay guerracho (Apocalipsis 12:9, 10, 12). Satanasga pasaypa rabiash caycan; y ichiclachona ushacänanpaj cashganta musyar imayca mana alicunata may chaycho ruraycan. ¡Piraj ninman cay caway vidachoga imacunapis ali cashganta! Lapanpis alchacänanpäga Diospa Gobiernunlata shuraycanchi.
SHUMAJ YACHACURCUNAPAJ
Yachacushun imanirtaj ninchi 1914 watacho Diospa Gobiernun galaycamushganta, y chayta musyashganchega imamantaj yarpachacächimashwan.
4. Unay profeciacunaga 1914 wataman chayachimanchi
Unay Babiloniapa reynin Nabucodonosorpa sueñuyninchomi Jehová wilargan ima pasananpaj cajta. Chay sueñupis y Daniel ima cashganta wilacushganpis tincunmi chay reypa gobiernunwan y quiquin Diospa Gobiernunwanpis (leipäcuy Daniel 4:17). a
Leipäcuy Daniel 4:20-26. Nircur dibujucunata ricapärir, cay tapucuycunapita yachacäriy:
-
A) ¿Imatataj sueñushgancho Nabucodonosor ricash? (20 y 21 versiculucunata ricapäcuy).
-
B) ¿Imataj pasanan cargan chay arbulwan? (23 caj versiculuta ricapäcuy).
-
C) ¿Imataj canman cargan “ganchis watacuna” pasarcuptin? (26 caj versiculuta ricapäcuy).
Sueñushgancho yurimoj árbol y Diospa Gobiernun
IMA PASANANPA CAJ (Daniel 4:20-36)
Mandacushgan
A) Juc jatuncaray árbol
Mandacushgan ilacäcun
B) “Chay yörata muturir” “ganchis wata” pasachun
Mandacushgan yapay yurimun
C) “Yapaymi ray cayman cutichishunquipaj”
Jucnin caj cumplimiento:
-
D) ¿Pitaj chay árbol caycan? (22 caj versiculuta ricapäcuy).
-
E) ¿Imaytaj manana gobernargannachu? (Leipäcuy Daniel 4:29-33).
-
F) ¿Imataj pasargan mandaj cashganwan ‘ganchis watacuna’ pasarcuptin? (Leipäcuy Daniel 4:34-36).
JUCNIN CAJ CUMPLIMIENTO
Mandacushgan
D) Nabucodonosor, Babiloniapa reynin
Mandacushgan ilacäcun
E) Nabucodonosor juiciunta ogran 606 J.m.sh. b watapita y chayraycur ganchis watapa gobernannachu
Mandacushgan yapay yurimun
F) Nabucodonosor juiciunman cutircur yapay gobernayta galaycun
Ishcay caj cumplimiento:
-
G) ¿Arbulpa parlarga pïcunapätaj parlaycanchi? (Leipäcuy 1 Crónicas 29:23).
-
H) ¿Imaytaj gobernapäcamurgannachu? ¿Imanirtaj ninchi cay Pachacho Jesús caycaptin mana gobernarcaycashganta? (Leipäcuy Lucas 21:24).
-
I) ¿Maychotaj y imaytaj camacashga cay Gobierno yapay galaycunanpaj?
ISHCAY CAJ CUMPLIMIENTO
Mandacushgan
G) Unay Israelcho Diospa jutincho mandacoj reycuna
Mandacushgan ilacäcun
H) Jerusalenta ushachipäcush 607 wata J.m.sh.; y 2.520 watacunapa, Diospa jutincho, Israelpita ima reylapis yaycushgachu
Mandacushgan yapay yurimun
I) 1914 watacho Dios acrashgan Rey captin, Jesús gobernayta galaycun
¿Ayca tiempupataj parlaycanchi ganchis watacuna nerga?
Masla tantiarcunapaj Apocalipsis libruman aywarcushun, chaychoga parlan quimsa watapaj y sojta quillacunapaj, cayta sumarcurga 1.260 junajcunami caycan (Apocalipsis 12:6, 14). Chauraga ganchis watacunaga 2.520 junajcunami caycan. Öraga Biblia ‘juc junaj’ niptenga ‘juc watapami’ parlaycan (Ezequiel 4:6). Canan ichanga tantianchina Daniel libro ganchis tiempucunapa (o nishganchino watacunapa) parlaptenga 2.520 watacunapa parlashganta.
5. 1914 watapita masraj mana alicuna galaycamush
Jesús mayna wilacurgan gobernar galaycuptin imacuna cay Pachacho pasananpaj. Leipäcuy Lucas 21:9-11 y caypita parlapacäriy:
-
Caycho wilacushganpita, ¿maygantataj ricashcanqui o mayashcanquipis?
Apóstol Pablupis wilacurganmi runacuna imano cawarcaycänanpaj cay último tiempucho. Leipäcuy 2 Timoteo 3:1-5 y caypita parlapacäriy:
-
Biblia nishganno, ¿imanoshi runacuna canman cargan y gampis ricashcanquichu chayta?
6. Diospa Gobiernun galaycushgantana musyarga yarpachacächimashwan imano cawaycashganchiman
Leipäcuy Mateo 24:3, 14 y caycunapita parlapacäriy:
-
Dios gobernaycashgan ricacämunanpaj, ¿imataj may chaycho ruracaycämun?
-
¿Imanotaj gampis yanapacunquiman?
Diospa Gobiernunga mayna galaycamush y ichiclachona cay Pachapis Jesuspa maquincho caycanga. Leipäcuy Hebreos 10:24, 25 (TNM) y caypita parlapacäriy:
-
¿Imatataj rurashun cay mana ali tiempo ushacänanpäna caycaptenga?
Gamshi yachacunquiman pitapis imano salvanapaj, ¿chaytaga pilatapis yachachinquimanchuraj o upälacunquimanchuraj?
WAQUINCUNA NIPÄCUN: “¿Imanirtaj Jehovapa testiguncuna 1914 watapaj cutin cutin parlapäcun?”.
-
¿Gamga imataraj ninquiman?
ICHIC YACHACUY
Bibliacho profeciacuna y cay munducho imacunapis pasaycashganga musyachimanchi Diospa Gobiernun mayna galaycushganta. Chaypita seguro cashganchiraycurmi runacunata predicanchi y reuniuncunamanpis aywanchi.
Yarpänapaj
-
¿Imataj pasash Daniel wilacushgan ganchis watacuna pasarcuptin?
-
¿Imanirtaj seguro caycanqui 1914 watacho Diospa Gobiernun galaycushganta?
-
¿Imano cawacurtaj seguro caycanqui Diospa Gobiernun mayna galaycushganta?
MASLATA YACHACUNAYQUIPAJ
Yachacuy imatataj waquin runacuna nipäcush 1914 wata wichanpita cay mundo cambiashganpita.
“Ima watacunapitataj respetulapis mana cannachu” (¡Ricchayna!, abril 2007)
Ricarcuy imanotaj juc runata yanapash, Mateo 24:14 textupita yachacushgan.
“Puclacunäpaj cajlacho jatiräcoj cä” (Wilacamoj, núm. 3 2017)
¿Imanirtaj nishwan Daniel librupa chuscu caj capitulun Diospa Gobiernunpita parlaycämushganta?
“¿Imaytaj Diospa Gobiernun galaycamush? (Juc caj)” (Wilacamoj, 1 octubre quilla, 2014)
Daniel librupa chuscu caj capitulun ganchis watacunapita parlan, ¿imacunataj tantiachimanchi 1914 watacama cashganta?
“¿Imaytaj Diospa Gobiernun galaycamush? (Ishcay caj)” (Wilacamoj, 1 noviembre quilla, 2014)
a “Maslata yachacunayquipaj” nishganpa ushanancho caycaj ishcay temacunata leiy.
b J.m.sh. yurimuptenga Jesús manaraj shamushganpämi paylaycanchi. Y, J.sh. yurimuptenga Jesús shamushgan wichanpäna.
