LECCIÓN 32
¡Diospa Reino ña mandaun!
Diospa Reino ahua pachai 1914 huatai mandangaj callarica. Chi huatallaira runauna mandana tucurina punzhauna callarica. ¿Imasnara yachanchi? Biblia rimashcara yachangaraunchi 1914manda mundui ima pasaushcara, runauna rurashcaunaras.
1. ¿Ima pasanara Biblia rimaca?
Daniel rimashca libroi nica Diospa mandana callaringa ‘canzhis timpu’ pasashca huasha (Daniel 4:16, 17). Ashca huatauna huasha Jesús cai timpumandallara rimasha “paiguna mandana timpuuna” an nisha, pai yachachicami cai timpuuna chara mana tucurishca ashcara (Lucas 21:24). Cai canzhis timpuuna 1914 huatai tucurishcara ricushun.
2. ¿Ima mas tiangaj callarishca cai mundui 1914 huatamanda? ¿imasnara runauna causarianun?
Jesusta catijcuna paita tapunuca: “¿Imara ricuringairi can shamunai, cai timpuuna tucurinais?” nisha (Mateo 24:3). Cutipangahua Jesús nica ahua pachai Diospa Reinoi pai Rey apu cuinta mandangaj callarishca huasha guerraguna, yarcai, allpa cuyunaunas tiangami nisha (leai Mateo 24:7). “Puchucai timpuunai” imasna runauna causanamanda Biblia rimaca “turmindus punzhauna” shamunara (2 Timoteo 3:1-5). 1914 huatamanda casna tunu causana ruranas ricurin.
3. ¿Imarasha Diospa Reino mandana callarishcamanda astaun mas cai mundu manali tucushca?
Diospa Reinoi Jesús Rey apu tucushca, ansa timpu huashalla ahua pachai shu guerra tiaca, Jesús Satanashua supaigunahuas macanunuca. Satanás pirdica, Biblia rimashca shina Satanás “cai pachama shitashca aca paihua angelgunahua pariju” (Apocalipsis 12:9, 10, 12). Satanás paita ñalla tucuchina ashcara yachashcamanda piñarishca an. Chiraigu intiru mundui llaquiuna, nanaigunas tian. Shinajpis Diospa Reino tucui cai problemagunara tucuchingaraun.
MAS YACHAI
Diospa Reino 1914 huatamanda mandana callarishcara, cai ñucanchira imasna yanapashcaras ricushun.
4. Bibliamanda profeciaguna ricuchinmi 1914 huatai Diospa Reino mandana callarishcara
Jehová Dios ñaupa Babilonia llactamanda rey Nabucodonosorda nuspachica huasha punzhauna pasanamanda. Cai nuspashca, Daniel intindichishcas Nabucodonosor mandanamanda, Diospa Reino mandanamandas riman (leaichi Daniel 4:17). a
Leaichi Daniel 4:20-26. Huasha recuadropi tiaj fotogunara ricusha catij tapuigunara cutipai:
-
A) ¿Imara Nabucodonosor nuspaibi ricuca? (Versículo 20, 21 ricuichi).
-
B) ¿Imara yurahua tucungarauca? (Versículo 23 ricuichi).
-
C) ¿Imara tucungarauca “canzhis timpuuna” pasashca huasha? (Versículo 26 ricuichi).
Nabucodonosor nuspaibi ricushca yura Diospa Reinora ricuchin
PROFECÍA (Daniel 4:20-36)
Mandana
A) Shu yapa suni yura
Mandana timpu tucurica
B) “Yurara cuchuichi”, “canzhis timpuuna pasangagama” saquichi
Cuti mandana callarica
C) “Camba mandana cuti cambaj tucunga”
Punda Nabucodonosorbi pactarica:
-
D) ¿Pitara yura ricuchica? (Versículo 22 ricuichi).
-
E) ¿Ima huras mandanara saquica? (Leaichi Daniel 4:29-33).
-
F) ¿Imara tucuca “canzhis timpuuna” huasha Nabucodonosorhua? (Leaichi Daniel 4:34-36).
PUNDA NABUCODONOSORBI PACTARICA
Mandana
D) Nabucodonosor, Babilonia llactamanda rey apu
Mandana timpu tucurica
E) Nabucodonosor iyaira chingachica 606 a.e.c. b huata huasha, canzhis intiru huata mana mandangaj ushaca
Cuti mandana callarica
F) Nabucodonosor iyaira apishca huasha cuti mandangaj callarica
Huasha Diospa Gobiernoi pactarica:
-
G) ¿Pigunara yura ricuchica? (Leaichi 1 Crónicas 29:23).
-
H) ¿Ima huras mandanara saquinuca? ¿Imasnara yachanchi paiguna mana mandaushcara Jesús cai allpai ashcai? (Leaichi Lucas 21:24).
-
I) ¿Maibi, ima huras cai mandana cuti callarica?
HUASHA DIOSPA GOBIERNOI PACTARICA
Mandana
G) Israel llactara mandajcuna Diospa Reino partimanda ashcara ricuchica
Mandana timpu tucurica
H) 607 a.e.c. huatai Jerusalén llaquichishca aca; 2.520 huata tupu apu israelitaguna mandana chingarica
Cuti mandana callarica
I) Ahua pachai Diospa Reinoi Jesús Rey apu cuinta mandangaj callarin
¿Masna timpu duran canzhis timpuuna?
Daniel libroi rimashca canzhis timpuuna nisha ninmi 2.520 huatauna. ¿Imasnara caita yachanchi? Bibliamanda huaquin textoguna shuj textogunara intindingaj yanapan. Ricui Apocalipsis libroi nin, quinsa timpu chaupi nisha nin 1.260 punzhauna (Apocalipsis 12:6, 14). Canzhis timpuuna masna ashcara yachangaj 1.260 punzhaunara ishqui cuti sumana anchi. Chiraigu canzhis timpuuna nisha nin 2.520 punzhauna. Huaquimbi Bibliaibi yachachin shu punzha shu huata cuinta an nisha (Ezequiel 4:6).
5. Mundu causai turcarica 1914 huatai
Jesús ña rimacami pai mandana callarishcai mundu imasna anara. Leaichi Lucas 21:9-11, huasha catij tapuimanda rimaichi:
-
Cai profecía rimashcamanda ¿imara can ricushcangui o runauna rimashcara uyashcangui?
Apóstol Pablo cuintaca tucurina partii runauna ima tunu ana ashcara. Leaichi 2 Timoteo 3:1-5, huasha catij tapuimanda rimaichi:
-
Cai texto nishcasna runauna imasna causanamanda ¿maicanda can ricushcangui?
6. Diospa Reino mandaushcara yachashcamanda shujcunama cuintana anchi
Leaichi Mateo 24:3, 14, huasha catij tapuigunamanda rimaichi:
-
¿Imara ricusha Diospa Reino ña mandaushcara yachanchi?
-
Cambas ¿imasnara cai tarbanai yanapana ushangui?
Diospa Reino ña mandaun shinajpis ansalla pishin tucuira mandai callaringaj. Leaichi Hebreos 10:24, 25, huasha catij tapuimanda rimaichi:
-
¿Imara rurana anchi “Cristo shamuna punzha mayanllayaushcara ricuusha”?
¿Imara ruranguima can yachaushca shujcunara yanapana quishpichinas ushajpi?
RUNAUNA CASNA TAPUNUJPI: “¿Imarasha Jehovahuaj testigoguna ninun 1914 huata yapa valij an?” nisha.
-
¿Imara ninguima?
IMARA YACHASHCANGUI
Bibliamanda profecía pactarishcauna, mundu imasna pasashcaunas ricuchinmi Diospa Reino ña mandaushcara. Chiraigu tucui shunguhua Diospa Reinomanda yachachinchi, tandarinaunamas rinchi.
Iyaringaj
-
Daniel libroi rimashca canzhis timpu pactarishca huasha ¿imara tucuca?
-
¿Imarasha can quiringui 1914 huatai Diospa Reino mandangaj callarishcara?
-
¿Imasnara can tucui shunguhua ricuchina ushangui Diospa Reino ña mandana callarishcara?
RICUNGUI
Yachai quillcajcuna ima ninun 1914 huatamanda cai mundu imasna shuj tunu tucushcara.
“Ali ruranaunara saquishca timpu” (¡Despertad!, abril de 2007)
Mateo 24:14 rimashca profecía shu runara imasna yanapashcara leai.
“Béisbol nishca pujllanara yapa munaj acani” (La Atalaya, núm. 3 2017)
¿Imasnara yachanchi Daniel capítulo 4ibi rimashca profecía Diospa Reinomanda rimaushcara?
“¿Ima huras Diospa Reino mandana callarica? (Parti 1)” (La Atalaya, 1 de octubre de 2014)
¿Imara ricuchin Daniel capítulo 4ibi rimashca “canzhis timpuuna” 1914 huatai tucurishcara?
“¿Ima huras Diospa Reino mandana callarica? (Parti 2)” (La Atalaya, 1 de noviembre de 2014)
a Cai temai “Ricungui” nishca partii puchucai ishqui temagunara leai.
b a.e.c. ricuchinmi Jesús manara pagarishcallaira timpura. Shinallara e.c. ricuchinmi Jesús pagarishca huasha timpura.