LEKCIJA 32
Le Devleskero kraľišagos imar vladňinel!
Beršestar 1914 vladňinel le Devleskero kraľišagos andro ňebos. Akorestar ačhel le manušikane vladenge ča agorutne ďivesa, kaj te vladňinen. Sar ada džanas? Rozkidaha peske le Devleskere lava, so sas phende but berša anglal. Tiš dikhaha, savo hino o svetos the o manuša beršestar 1914.
1) So phende le Devleskere lava but berša anglal?
Andal e biblicko kňižka Daniel džanas, hoj le Devleskero kraľišagos chudňa te vladňinel akor, sar predžana berša, so pes vičinen „efta časi.“ (Daniel 4:16, 17) Sar sas pre phuv o Ježiš, phenďa, hoj ola „časi ... hine dine le narodenge“. Sikhľarelas, hoj andre leskere ďivesa ola časi mek na pregele. (Lukáš 21:24) Paľis dikhaha, hoj efta časi preačhile andro berš 1914.
2) Sar dičhol o svetos a save manuša hine beršestar 1914?
Le Ježišoskere učeňika phučle, pal soste prindžarena, hoj chudňa te vladňinel a hoj avle ola agorutna ďivesa. (Matúš 24:3) O Ježiš lenge phenďa, so pes kerela pro svetos, sar chudela te vladňinel sar kraľis andro ňebos. Phenďa, hoj ena but maribena, bari bokh, zemetraseňa a mek aver pharipena. (Pregen Matúš 24:7) Andre Biblija sas tiš anglal phendo, save ena o manuša andre „agorutna ďivesa“ a hoj ela akor „phares te ľikerel avri.“ (2. Timotejovi 3:1–5) Beršestar 1914 oda avka hin.
3) Soske hin o svetos ajso previsardo akorestar, sar chudňa te vladňinel le Devleskero kraľišagos?
Sar o Ježiš ačhiľa kraľiske andro Devleskero kraľišagos, chudňa pes andro ňebos te marel le Satanoha the le demonenca. O Satan prekhelďa (prehrajinďa)! E Biblija phenel, hoj o Satan „sas čhido tele pre phuv a leskere aňjela sas čhide tele leha.“ (Zjavenie 12:9, 10, 12) Chal les bari choľi, bo džanel, hoj ela pal leste. Vašoda pre caľi phuv kerel bari dukh the trapišagos. Imar achaľuvas, soske hino o svetos ajso previsardo! Aľe le Devleskero kraľišagos maj odčhivela savoro trapišagos.
DODŽAN TUT BUTER
Sar džanas, hoj le Devleskero kraľišagos chudňa te vladňinel beršestar 1914? So vašoda kamas te kerel?
4) Te zrachinas varesave berša andre Biblija, avel amenge avri o berš 1914
O Del sikaďa andro suno babilonske kraľiske le Nabuchodonozoreske, so pes ačhela. Te genas andre Biblija pal oda suno a sar les o Daniel phenďa avri, šaj achaľuvas, hoj oda suno sas pal le Nabuchodonozoreskeri vlada the pal o Devleskero kraľišagos. (Pregen Daniel 4:17) a
Pregen Daniel 4:20–26 a paľis vakeren jekhetane pal ala otazki:
-
(A) Pal soste džalas le kraľiske o suno? (Dikh o teksti 20 the 21.)
-
(B) So pes majinelas te kerel le stromoha? (Dikh o tekstos 23.)
-
(C) So pes majinelas te ačhel, sar predžana „efta časi“? (Dikh o tekstos 26.)
Sar o suno pal o stromos sikavel pro Devleskero kraľišagos
LE DEVLESKERE LAVA (Daniel 4:20–36)
Kraľišagos
(A) Igen baro stromos
Preačhiľa te vladňinel
(B) „Čhinen tele o stromos“ a mukhen les avka „efta časi“
Chudňa pale te vladňinel
(C) „O kraľišagos ela pale tiro“
Sar pes ačhile le Devleskere lava peršovar
-
(D) Ko sas oda baro stromos? (Dikh o tekstos 22.)
-
(E) Sar preačhiľa te vladňinel? (Pregen Daniel 4:29–33.)
-
(F) So pes ačhiľa le kraľiske pal „o efta časi“? (Pregen Daniel 4:34–36.)
PERŠOVAR PES AČHILE
Kraľišagos
(D) Nabuchodonozor – babilonsko kraľis
Preačhiľa te vladňinel
(E) Khatar o berš 606 anglo Kristus, o Nabuchodonozor našaďa e goďi a vašoda našťi vladňinelas čačikane efta berša
Chudňa pale te vladňinel
(F) Le Nabuchodonozoroske pes visarďa pale e goďi a chudňa pale te vladňinel
Sar pes ačhile le Devleskere lava dujtovar
-
(G) Ko sas oda igen baro stromos? (Pregen 1. Kroník 29:23.)
-
(H) Sar preačhile te vladňinel? Sar džanas, hoj akor, kana sas o Ježiš pre phuv, mek furt na vladňinelas ňisavo kraľis thodo le Devlestar? (Pregen Lukáš 21:24.)
-
(I) Kana a kaj chudňa pale te vladňinel o kraľis, so sas thodo le Devlestar?
DUJTOVAR PES AČHILE
Kraľišagos
(G) O Del thoďa le židovike kraľen, kaj te vladňinen avka sar kamľa o Del
Preačhiľa te vladňinel
(H) O Jeruzalem sas zlabardo a avka preačhile te vladňinel židovika kraľa pro 2 520 berša
Chudňa pale te vladňinel
(I) O Ježiš chudňa te vladňinel andro ňebos sar kraľis andro Devleskero kraľišagos
Keci ľikerenas efta časi?
Varesave teksti andre Biblija amenge pomožinen te achaľol aver teksti. Las amenge e biblicko kňižka Zjavenie. Hin andre late, hoj trin the jepaš časi hine 1 260 ďivesa. (Zjavenie 12:6, 14) Efta časi hin duvar ajci, čiže 2 520 ďivesa. Varekana pes andre Biblija laveha ďives, mišľinel berš. (Ezechiel 4:6) Ola efta časi andre kňižka Daniel ľikeren 2 520 berša.
5) Beršestar 1914 o svetos ačhiľa aver
O Ježiš phenďa but berša anglal sar dičhola o svetos, kana ačhela kraľiske. Pregen Lukáš 21:9–11 a paľis vakeren jekhetane:
-
So olestar, so genďam, dikhes abo šunes tu?
O apoštol Pavol pisinďa, save ena manuša andre agorutna ďivesa manušikane vladenge. Pregen 2. Timotejovi 3:1–5 a paľis vakeren jekhetane:
-
So olestar tu dikhes pro manuša?
6) Sikav, hoj paťas, hoj imar vladňinel le Devleskero kraľišagos
Pregen Matúš 24:3, 14 a paľis vakeren jekhetane:
-
Savi bari buťi sikavel, hoj imar vladňinel le Devleskero kraľišagos?
-
Sar šaj tu keres adi buťi?
Le Devleskero kraľišagos imar vladňinel a so neksigeder avela o ďives, kana lela andre peskere vasta o svetos. Pregen Hebrejom 10:24, 25 a paľis vakeren jekhetane:
-
So kampel te kerel dojekheske amendar, sar dikhas, „hoj oda ďives hino pašeder“?
So kereha, te tut dodžanľal, sar te pomožinel a te zachraňinel o dživipen avrenge?
VAREKO ŠAJ PHUČEL: „Soske le Jehovaskere svedki furt vakeren pal o berš 1914?“
-
So bi pre oda phenehas tu?
SO SIKHĽIĽAM
Oda, hoj le Devleskero kraľišagos imar vladňinel, sikaven: a) le Devleskere lava, so sas phende anglal, b) zrachimen berša andre Biblija, c) oda, sar dičhol o svetos. Te oleske paťas, vakeraha pal oda avrenca a tiš phiraha pro zhromažďeňa.
So bi phenehas
-
So pes ačhiľa, sar pregele efta časi, pal save pisinel e kňižka Daniel?
-
Soske paťas, hoj le Devleskero kraľišagos vladňinel beršestar 1914?
-
Sar sikaves le dživipnaha, hoj paťas, hoj imar vladňinel oda kraľišagos?
DIKH TUKE BUTER
Pregen tuke, so phenen o manuša, so pisinen pal oda, so sas čirla, sar pes previsarďa o svetos beršestar 1914.
„Kedy začala morálka prudko upadať?“ (Prebuďte sa! z apríla 2007)
Pregen tuke, sar jekhe muršeske o lava andal Matúš 24:14 prekerde o dživipen.
„Bejzbal som miloval najviac zo všetkého“ (Strážna veža č. 3/2017)
Sar džanas, hoj o lava andal e kňižka Daniel 4. kapitola, bešen pro Devleskero kraľišagos?
„Kedy začalo vládnuť Božie Kráľovstvo? (1. časť)“ (Strážna veža z 1. októbra 2014)
So sikavel, hoj „efta časi,“ pal save pes pisinel andro Daniel 4. kapitola, preačhile andro berš 1914?
„Kedy začalo vládnuť Božie Kráľovstvo? (2. časť)“ (Strážna veža z 1. novembra 2014)
a Pregen tuke duj posledna članki andro kotor DIKH TUKE BUTER andre kadi lekcija.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
