CHIDZIDZO 32
Umambo hwaMwari Hwava Kutonga!
Umambo hwaMwari hwakatanga kutonga kudenga muna 1914. Ndipo pakatangawo mazuva ekupedzisira eutongi hwevanhu. Tinozviziva sei? Ngationgororei uprofita hweBhaibheri uye mamiriro akaita zvinhu panyika neunhu hwakatanga kuva nevanhu kubva muna 1914.
1. Uprofita hweBhaibheri hunoti chii?
Mubhuku raDhanieri, Bhaibheri rakagara rataura kuti Umambo hwaMwari hwaizotanga kutonga panopera dzinonzi “nguva nomwe.” (Dhanieri 4:16, 17) Papfuura mazana emakore, Jesu akazotaura nezvenguva imwe chete iyoyo achiiti “nguva yemamwe marudzi” uye akaratidza kuti yainge isati yapera. (Ruka 21:24) Sezvatichaona nguva nomwe idzodzo dzakaguma muna 1914.
2. Zvinhu zvakamira sei panyika uye vanhu vakatanga kuva neunhu hwakaita sei kubva muna 1914?
Vadzidzi vaJesu vakamubvunza kuti: “Chii chichava chiratidzo chekuti mavapo uye chekuti nyika yava kumagumo kwayo?” (Mateu 24:3) Jesu akavapindura achivaudza zvinhu zvakawanda zvaizoitika paaizotanga kutonga saMambo weUmambo hwaMwari ari kudenga. Zvimwe zvacho zvinosanganisira hondo, nzara, uye kudengenyeka kwenyika. (Verengai Mateu 24:7.) Bhaibheri rakagara rataura unhu hwaizova nevanhu “mumazuva ekupedzisira” uye izvozvo zvaizoita kuti dzive nguva “dzinonetsa kurarama madziri.” (2 Timoti 3:1-5) Zvese izvi zvakatanga kuwedzera muna 1914.
3. Nei zvinhu zvakabva zvaipa kudaro pakatanga kutonga Umambo hwaMwari?
Paakangogadzwa saMambo weUmambo hwaMwari, Jesu akarwa hondo kudenga naSatani nemadhimoni. Satani akakundwa muhondo yacho. Bhaibheri rinoti “akakandwa panyika, uye ngirozi dzake dzakakandwa pasi pamwe chete naye.” (Zvakazarurwa 12:9, 10, 12) Satani akashatirwa chaizvo nekuti ari kuziva kuti achaparadzwa. Saka ari kukonzera nhamo nematambudziko pasi rese. Ndosaka zvinhu zvakaipa kudai panyika! Umambo hwaMwari huchabvisa matambudziko ese aya.
WEDZERA KUONGORORA
Ongorora zvinoratidza kuti Umambo hwakatanga kutonga muna 1914 uye kuti isu tinofanira kuita sei.
4. Bhaibheri rinoratidza kuti Umambo hwakatanga kutonga muna 1914
Mwari akaita kuti Mambo Nebhukadhinezari arote hope achimuratidza zvaizoitika mune ramangwana. Patinoverenga nezvehope idzodzo uye kududzirwa kwadzakaitwa naDhanieri, zvinonyatsobuda pachena kuti dzaitaura nezveutongi hwaNebhukadhinezari uyewo Umambo hwaMwari.—Verengai Dhanieri 4: 17. a
Verengai Dhanieri 4:20-26, mozoshandisa chati kupindura mibvunzo inotevera:
-
(A) Nebhukadhinezari akaonei muhope dzaakarota?—Ona vhesi 20 ne21.
-
(B) Muti waizoitwa sei?—Ona vhesi 23.
-
(C) Chii chaizoitika paizopera “nguva nomwe”?—Ona vhesi 26.
Hope dzaNebhukadhinezari Dzinobatana Papi neUmambo hwaMwari?
UPROFITA HWACHO (Dhanieri 4:20-36)
Utongi
(A) Zimuti rakakura
Utongi hunombomiswa
(B) “Rigai muti,” kusvikira “nguva nomwe dzapera”
Utongi hunodzorerwa
(C) “Umambo hwenyu huchadzoka kwamuri”
Pakazadziswa uprofita hwacho kekutanga . . .
-
(D) Ndiani aifananidzirwa nemuti?—Ona vhesi 22.
-
(E) Utongi hwake hwakambomiswa sei?—Verengai Dhanieri 4:29-33.
-
(F) Chii chakaitika kuna Nebhukadhinezari pakapera “nguva nomwe”?—Verengai Dhanieri 4:34-36.
KUZADZISWA KWEKUTANGA
Utongi
(D) Nebhukadhinezari, Mambo weBhabhironi
Utongi hunombomiswa
(E) Pashure pa606 B.C.E., Nebhukadhinezari anorasika pfungwa kwemakore manomwe zvekutadza kutonga
Utongi hunodzorerwa
(F) Pfungwa dzaNebhukadhinezari dzinodzoka panzvimbo otangazve kutonga
Pakazadziswa uprofita hwacho kechipiri . . .
-
(G) Ndivanaani vaifananidzirwa nemuti?—Verengai 1 Makoronike 29:23.
-
(H) Utongi hwavo hwakambomiswa sei? Tinoziva sei kuti pakararama Jesu panyika pano utongi ihwohwo hwakanga huchakamiswa?—Verengai Ruka 21:24.
-
(I) Utongi uhwu hwakazodzorerwa riini uye kupi?
KUZADZISWA KWECHIPIRI
Utongi
(G) Madzimambo evaIsraeri aimiririra utongi hwaMwari
Utongi hunombomiswa
(H) Jerusarema rinoparadzwa, zvomisa kutonga kwemadzimambo evaIsraeri kwemakore 2 520
Utongi hunodzorerwa
(I) Jesu anotanga kutonga kudenga saMambo weUmambo hwaMwari
Nguva nomwe dzakareba zvakadii?
Dzimwe ndima dziri muBhaibheri dzinotibatsira kunzwisisa zvinotaurwa mune dzimwewo ndima. Bhuku reBhaibheri raZvakazarurwa rinoratidza kuti nguva nhatu nehafu dzakaenzana nemazuva 1 260. (Zvakazarurwa 12:6, 14) Saka nguva nomwe dzinenge dzapeta kaviri nhamba iyoyo, zvotisvitsa pamazuva 2 520. Bhaibheri rinomboshandisa zuva richimiririra gore. (Ezekieri 4:6) Ndizvo zvazviriwo pauprofita huri mubhuku raDhanieri. Nguva nomwe dzinomiririra makore 2 520.
5. Zvinhu zvakachinja panyika kubva muna 1914
Jesu akataura zvinhu zvaizoitika panyika pashure pekunge agadzwa kuva Mambo. Verengai Ruka 21:9-11, mobva makurukura muchishandisa mubvunzo unotevera:
-
Pane zvataurwa mumavhesi aya, ndezvipi zvauri kuona zvichiitika kana zvawakanzwa nezvazvo?
Pauro akataura nezveunhu hwaizova nevanhu mumazuva ekupedzisira eutongi hwevanhu. Verengai 2 Timoti 3:1-5, mobva makurukura muchishandisa mubvunzo unotevera:
-
Pane zvataurwa mumavhesi aya ndezvipi zvauri kuonawo muvanhu mazuva ano?
6. Kuziva kuti Umambo hwaMwari hwava kutonga kunotipa simba
Verengai Mateu 24:3, 14, mobva makurukura muchishandisa mibvunzo inotevera:
-
Ibasa ripi rinokosha rinoratidza kuti Umambo hwava kutonga?
-
Ungaita sei kuti ubatane nevamwe pakuita basa iri?
Umambo hwaMwari hwakatotanga kutonga uye zuva rekuti nyika yese ive mumaoko ahwo rava pedyo. Verengai VaHebheru 10:24, 25, mobva makurukura muchishandisa mubvunzo unotevera:
-
Mumwe nemumwe wedu anofanira kuita sei patiri kuona “zuva richiswedera kudai”?
Kana ukaziva chimwe chinhu chinogona kubatsira kana kuponesa vanhu, unofanira kuita sei?
MUMWE MUNHU ANOGONA KUBVUNZA KUTI: “Sei Zvapupu zvaJehovha zvichingogara zvichitaura nezva1914?”
-
Ungamupindura sei?
PFUPISO
Uprofita hweBhaibheri uye mamiriro akaita zvinhu panyika zvinoratidza kuti Umambo hwaMwari hwava kutotonga. Tinoratidza kuti tinotenda izvi nekugara tichiparidza uye kupinda misangano yeungano.
Kudzokorora
-
Chii chakaitika pakapera nguva nomwe dzinotaurwa mubhuku reBhaibheri raDhanieri?
-
Chii chinoita kuti uve nechokwadi chekuti Umambo hwaMwari hwakatanga kutonga muna 1914?
-
Ungaratidza sei kuti une chokwadi chekuti Umambo hwaMwari hwava kutonga?
WEDZERA PANE ZVAWADZIDZA
Verenga unzwe kuti vanyori vezvakaitika kare nevamwewo vanoti kudii nezvekuchinja kwakaita zvinhu panyika kubva muna 1914.
“Tsika Padzakaderera Zvinooneka” (Mukai!, July 2007)
Verenga unzwe kuti uprofita huri pana Mateu 24:14 hwakachinja sei upenyu hwemumwe murume.
“Hapana Chimwe Chandaida Kupfuura Baseball!” (Nharireyomurindi Nhamba 3 2017)
Tinoziva sei kuti uprofita huri pana Dhanieri chitsauko 4 hunotaura nezveUmambo hwaMwari?
“Umambo hwaMwari Hwakatanga Kutonga Riini? (Chikamu 1)” (Nharireyomurindi, October 1, 2014)
Chii chinoratidza kuti “nguva nomwe” dzinotaurwa muna Dhanieri chitsauko 4 dzakaguma muna 1914?
“Umambo hwaMwari Hwakatanga Kutonga Riini? (Chikamu 2)” (Nharireyomurindi, November 1, 2014)
a Ona nyaya mbiri dziri pekupedzisira pachikamu chakanzi “WEDZERA PANE ZVAWADZIDZA” muchidzidzo chino.
Zvimwe Zvaunogona Kufarira
MIBVUNZO INONYANYA KUBVUNZWA
Kosi yeBhaibheri Inoitiswa neZvapupu zvaJehovha Yakaita Sei?
Paunoita kosi yeBhaibheri inoitiswa neZvapupu zvaJehovha, unogona kushandisa chero Bhaibheri raunaro. Mhuri yako neshamwari vanogona kuvapowo paunenge uchidzidza.
