PĚNGANGĚNDUNGANG 32
Kararatuangu Mawu Seng Měpẹ̌parenta!
Kararatuangu Mawu něnětạ nẹ̌parenta su sorga taung 1914. Su taung ene lai, ěllo pěngěngsuenge gunang pěměrentang taumata něnětạ. Kerea i kitẹ makasingkạ hal᷊ẹ̌ ene? I kitẹ sarung měmanda těbal᷊u Alkitapẹ̌, manga peristiwa nariadi su dunia, dingangu kerea sipatu taumata dongkeng taung 1914.
1. Apa nitěbal᷊u Alkitapẹ̌?
Bukẹ̌ Daniel něnodẹ Kararatuangu Mawu sarung měnětạ mẹ̌parenta su pěngěngsuengu ”pitu masa”. (Daniel 4:16, 17) Hasụe su taunge bọu ene, Yesus nẹ̌bisara soal u tempo ene. I sie naul᷊ị ene kai ”tempo seng nitantu gunang manga wangsa”, kụ ene bědang tawe nasue. (Lukas 21:24) Kere sarung ěndungang i kitẹ, pitu masa nasue su taung 1914.
2. Manga peristiwa dunia dingangu manga sipatẹ̌ apa nal᷊ahẹ dongkeng taung 1914?
Manga muriti Yesus nẹ̌kiwal᷊o si sie, ”Kai mangạe tatiala apa ngae pělahekangu [Tuang seng ene] dingangkewe lai kasueěngu runia?” (Matius 24:3, Binohẹ Susi Bal᷊o Mapia) Gunang sumimbahẹ̌ kakiwal᷊o ene, Yesus něněbal᷊ẹ̌ lawọ peristiwa sarung mariadi su tempong i sie měnětạ makoạ Datung Kararatuangu Mawu su sorga. Piram baụ peristiwa ene kai perang, karal᷊unusẹ̌, dingangu linuhẹ̌. (Basa Matius 24:7.) Alkitapẹ̌ lai něněbal᷊ẹ̌ manga sipatu taumata su ”ěllo pěngěngsuenge” sarung makakoạ pěbawiahẹ̌ ”masigěsạ tatěngong”. (2 Timotius 3:1-5) Manga peristiwa dingangu manga sipatẹ̌ ene sěbạe nal᷊ahẹ dongkeng taung 1914.
3. Kawe nụe keadaan dunia nakoạ limembong dal᷊akị dongkeng Kararatuangu Mawu něnětạ nẹ̌parenta?
Tawe nararěna bọu i Yesus nakoạ Datung Kararatuangu Mawu, i sie nẹ̌pěrang limawang Setang dingangu manga rohkẹ̌ dal᷊akị su sorga. Setang nakalah. Alkitapẹ̌ naul᷊ị, Setang ”nirěmẹ sarang dunia . . . Manga malaekate lai nirěmẹ sěngkasio dingange”. (Wahyu 12:9, 12) Setang sěbạe pědu ual᷊ingu masingkạ i sie sarung binasaěng. Hakị u ene, i sie nakarěntang kasasigěsạ su patikụ dunia. Ene alasange kawe nụe keadaan dunia nakoạ limembong dal᷊akị. Katewe, Kararatuangu Mawu sarung mapakailang kěbị kasasigěsạ ene.
BANGKA PAKARAL᷊UNG
Mahịe měngěndung kerea i kitẹ masingkạ Kararatuangu Mawu něnětạ nẹ̌parenta taung 1914, kụ apa pěngarune si kitẹ.
4. Těbal᷊ẹ̌ Alkitapẹ̌ něnodẹ Kararatuangu Mawu něnětạ nẹ̌parenta su taung 1914
Mawu nakakoạ Datu Nebukhadnezar bọu Babelẹ̌ nakaěbạ ipi nělahẹ soal u tempo mahi. Ipi ene dingangu apa mangal᷊ene ipi ene nělahẹ soal u pěmamarentang Nebukhadnezar dingangu Kararatuangu Mawu.—Basa Daniel 4:17. *
Basạe Daniel 4:20-26, bọu ene pěmandạe bagan gunang sumimbahẹ̌ manga kakiwal᷊o ini:
-
(A) Apa nikasilong i Nebukhadnezar su ipine?—Pěmanda ayatẹ̌ 20 dingangu 21.
-
(B) Apa sarung mariadi su kalu ene?—Pěmanda ayatẹ̌ 23.
-
(C) Apa sarung mariadi su pěngěngsuengu ”pitu masa”?—Pěmanda ayatẹ̌ 26.
Ipi soal u Kalu Nělahẹ Kararatuangu Mawu
TĚBAL᷊Ẹ̌ (Daniel 4:20-36)
Nẹ̌parenta
(A) Sěmbaụ kalu gěguwạ
Seng tawe nẹ̌parenta
(B) ”Tuwang . . . kalu ene”, kụ balạe tatapẹ̌ kerene ”karěngụe pitu masa”
Saụ nẹ̌parenta
(C) ”I Tuang sarung saụ makoạ datu”
Su kaghaghanapẹ̌ humotong bọu těbal᷊ẹ̌ ini . . .
-
(D) Kalu ene nělahẹ i sai?—Pěmanda ayatẹ̌ 22.
-
(E) Kerea i sie seng tawe mẹ̌parenta?—Basa Daniel 4:29-33.
-
(F) Apa nariadi si Nebukhadnezar su pěngěngsuengu ”pitu masa”?—Basa Daniel 4:34-36.
KAGHAGHANAPẸ̌ HUMOTONG
Nẹ̌parenta
(D) Nebukhadnezar, Datung Babelẹ̌
Seng tawe nẹ̌parenta
(E) Nal᷊iu bọu taung 606 SM, Nebukhadnezar nẹ̌pulu kụ tawe makapẹ̌parenta karěngụe pitu taung
Saụ nẹ̌parenta
(F) Nebukhadnezar napia kụ saụ nẹ̌parenta
Su kaghaghanapẹ̌ karuane bọu těbal᷊ẹ̌ ini . . .
-
(G) Kalu nělahẹ i sai?—Basa 1 Tawarikh 29:23.
-
(H) Kerea i sire seng tawe nẹ̌parenta? Kerea i kitẹ masingkạ i sire tatapẹ̌ tawe nẹ̌parenta su tempong i Yesus ene su dunia?—Basa Lukas 21:24.
-
(I) Ange dingangu su apa ene saụ mẹ̌parenta?
KAGHAGHANAPẸ̌ KARUANE
Nẹ̌parenta
(G) Manga datung Israel nělahẹ pěmamarentang Mawu
Seng tawe nẹ̌parenta
(H) Yerusalem niwinasa, kụ tawẹ apa datu su Israel karěngụe 2.520 taung
Saụ nẹ̌parenta
(I) Yesus něnětạ nẹ̌parenta su sorga nakoạ Datung Kararatuangu Mawu
Kerea karěngụe pitu masa?
Piram baụ ayatẹ̌ su Alkitapẹ̌ botonge makatul᷊ung si kitẹ makaěna ayatẹ̌ wal᷊inẹ. Contone, bukẹ̌ Wahyu naul᷊ị tělu stengah masa ene kai 1.260 ěllo. (Wahyu 12:6, 14) Pitu masa ene mangal᷊ene tělu stengah masa kali darua, arau 2.520 ěllo. Su Alkitapẹ̌, pẹ̌sěngsul᷊ẹ bawera ”sahěllo” mangal᷊ene sěntaung. (Yehezkiel 4:6) Hakị u ene, pitu masa nisěbạ su bukẹ̌ Daniel ene mangal᷊ene 2.520 taung.
5. Dunia nẹ̌bal᷊ui dongkeng 1914
Yesus něněbal᷊ẹ̌ soal u manga peristiwa makoạ tatiala i sie seng nakoạ Datu. Basa Lukas 21:9-11, bọu ene bisarai kakiwal᷊o ini:
-
Manga peristiwa apa seng nikasilonu arau nikaringihu?
Rasul Paulus nělahẹ kerea sipatu taumata su ěllo pěngěngsuengu pěmamarentang taumata. Basa 2 Timotius 3:1-5, bọu ene bisarai kakiwal᷊o ini:
-
Manga sipatẹ̌ apa seng nikasilonu su taumata orasẹ̌ ini?
6. Pěmamarentang Kararatuangu Mawu makawahangsang si kitẹ
Basa Matius 24:3, 14, bọu ene bisarai kakiwal᷊o ini:
-
Hal᷊ẹ̌ penting apa nakoạ tatiala Kararatuangu Mawu orasẹ̌ ini seng měpẹ̌parenta?
-
Kerea i kitẹ tumol᷊e měkoạ hal᷊ẹ̌ ini?
Kararatuangu Mawu orasẹ̌ ini seng měpẹ̌parenta, kụ seng mal᷊ighạ Kararatuang ene mẹ̌parenta patikụ dunia. Basa Ibrani 10:24, 25, bọu ene bisarai kakiwal᷊o ini:
-
Apa harusẹ̌ koateng i kitẹ mạeng ”nakasilo ěllo ene seng kakạranine”?
ARAMANUNG PIẠ U NẸ̌KIWAL᷊O: ”Kawe nụe Sahiding Yehuwa masau mẹ̌bisara soal u 1914?”
-
Kerea i kau sumimbahẹ̌ ene?
RINGKASAN
Těbal᷊u Alkitapẹ̌ dingangu keadaan dunia něnodẹ Kararatuangu Mawu orasẹ̌ ini seng měpẹ̌parenta. I kitẹ měnodẹ i kitẹ mangimang hal᷊ẹ̌ ini mạeng měhabarẹ̌ soal u Kararatuangu Mawu dingangu duměnta su pěngangibadang.
Apa seng nikaěndungangu?
-
Apa nariadi su pěngěngsuengu pitu masa kere seng nitěbal᷊ẹ̌ su bukẹ̌ Daniel?
-
Apa nakakoạ si kau mangimang Kararatuangu Mawu něnětạ nẹ̌parenta taung 1914?
-
Kerea i kau měnodẹ i kau mangimang Kararatuangu Mawu orasẹ̌ ini seng měpẹ̌parenta?
PĚMANDA LAI
Pěmandạe apa niul᷊ịu sejarawan dingangu taumata wal᷊inẹ soal u pẹ̌bawal᷊ui nariadi su dunia dongkeng 1914.
Pẹ̌basạe kerea těbal᷊ẹ̌ su Matius 24:14 nakawal᷊ui pěbawiahu sěngkatau esẹ.
”Bisbol Nakoạ Hal᷊ẹ̌ Kahumotongange su Pěbawiahẹ̌ku!” (Menara Pengawal No. 3 2017)
Kerea i kitẹ masingkạ těbal᷊ẹ̌ su Daniel pasalẹ̌ 4 nělahẹ soal u Kararatuangu Mawu?
”Kange Kararatuangu Mawu Něnětạ Nẹ̌parenta? (Bageang 1)” (Menara Pengawal, 1 Oktober 2014)
Apa něnodẹ ”pitu masa” nisěbạ su Daniel pasalẹ̌ 4 nasue su taung 1914?
”Kange Kararatuangu Mawu Něnětạ Nẹ̌parenta? (Bageang 2)” (Menara Pengawal, 1 November 2014)
^ par. 15 Pěmanda darua artikel pěngěngsuenge su bageang Pěmanda Lai su pěngangěndungang ini.