ITYOUGH 32
Tartor u Aôndo Ngu Hemen Hegen!
Tartor u Aôndo yange u hii u hemen sha ken inyom i 1914. Ka shighe u ayange a masejime a hemen u uumace ne kpaa yange hii je la. Er nan ve se fe? Se lu timen sha akaa a Bibilo yange i tsenga ôron la, kua akaa a a lu zan hemen shin tar man aeren a ior hii ken inyom i 1914 la zan zan hegen.
1. Bibilo yange i tsenga ôron ér nyi?
Takeda u Daniel pase ér Tartor u Aôndo ua hii u hemen ken mbee u shighe u Bibilo i yer ér, ‘ashighe ataankarahar’ la. (Daniel 4:16, 17) Yange anyom nga kar uderi imôngo yô, Yesu shi va ôr kwagh u shighe shon, a yila un ér “shighe u i ver akuraior” la, shi pase ér shighe shon ngu a bee ga. (Luka 21:24) Shighe la yange bee ken inyom i 1914, er se va nenge nahan.
2. Ka nyi i lu zan hemen shin tar hii ken inyom i 1914 la zan zan hegene, man aeren a ior nga nena?
Mbahenen mba Yesu yange ve pine un ér: “Ka nyi ia lu ikyav i tesen ér u ngu vea vese imôngo shi mkur u tar ne zurumu?” (Mateu 24:3) Yesu ngur nan ve mlumun yô, a ôr ve akaa kpishi a aa va er shighe u una hingir Tor u Tartor u Aôndo, una hii u hemen sha la. Yange ter akaa er ityav man ijen kua ityartenger nahan. (Ôr Mateu 24:7.) Shi Bibilo tsenga ôron ér aeren a ior vea lu a mi ken “ayange a masejime” la aa na “uma una taver.” (2 Timoteu 3:1-5) Akaa ne yange hii u eren ken inyom i 1914, shi ior kpa mba eren akaa er yange i tsenga ôron nahan.
3. Er nan ve akaa a hembe vihin hii shighe u Tartor u Aôndo hii u hemen laa?
Yesu yange hingir Tor u Tartor u Aôndo sha yô, kera ngôôr ga je maa nôngo ityav a Satan man azôv a na. Yange ityav mbira hemba Satan. Bibilo kaa ér: “I ker un va gba shin tar, . . . shi i ker mbatyomov nav va gba shin tar a na imôngo.” (Mpase 12:9, 10, 12) Ishima vihi Satan tsung, sha ci u a fa er i lu u a va tim un yô. Sha nahan yô, ngu eren akaa a vihin shi a na ior mba yan ican sha tar cii. Kwagh la wase se u fan er i hii ve tar ne u vihi yum yô. Nahan kpa, Tartor u Aôndo ua va sôr mbamzeyol mbara cii.
HEN KWAGH I ZA SHIMI
Tôv fa er i hii ve se fe ser Tartor u Aôndo yange u hii u hemen ken inyom i 1914 yô, kua er se tese ser se na jighjigh ser ngu hemen hegen yô.
4. Akaaôron a profeti a Bibilo tese ér Tartor u Aôndo yange u hii u hemen ken inyom i 1914
Aôndo yange er mnyam cie Tor Nebukadinesar u Babilon, maa Aôndo tese un akaa a aa va er ken hemen yô. Mnyam mara man gbenda u Daniel pase ma la tese ér ma lu sha kwagh u mtemtor u Nebukadinesar man kwagh u Tartor u Aôndo.—Ôr Daniel 4:17. a
Ôr Daniel 4:20-26, maa er tom a caate la u nan mlumun sha mbampin mba ve dondo mban:
-
(A) Ka nyi Nebukadinesar yange nenge a mi ken mnyam ma ma cier un laa?—Nenge ivur 20 man 21.
-
(B) Lu u nyi ia va er kon laa?—Nenge ivur 23.
-
(C) Lu u ‘ashighe ataankarahar’ la aa been yô, nyi ia ere?—Nenge ivur 26.
Mnyam ma sha Kwagh u Kon la Zua sha Kwagh u Tartor u Aôndo Nena?
KWAGHÔRON U PROFETI (Daniel 4:20-36)
Mtemtor
(A) Kon u taven tsung
Tor kera lu ga
(B) “Gber kon ne kera,” nahan ‘ashighe a̱ kar ataankarahar’
I hide a hementor la
(C) “Tartor wou ua lu taveraa ken masetyô”
Mkur u hiihii u kwaghôron u profeti ne . . .
-
(D) Kon la tile sha ityough ki ana?—Nenge ivur 22.
-
(E) Yange de u hemen hanma shighe?—Ôr Daniel 4:29-33.
-
(F) Ka nyi yange i er Nebukadinesar ken mbee u ‘ashighe ataankarahar’ laa?—Ôr Daniel 4:34-36.
MKUR U HIIHII
Mtemtor
(D) Nebukadinesar, Tor u Babilon
Tor kera lu ga
(E) Shighe u inyom i 606 C.S.Y. kar la, Nebukadinesar kera lu a mhen u orumace ga, nahan kera lu tor ga anyom ataankarahar
I hide a hementor la
(F) Nebukadinesar hide lu a mhen u orumace, nahan hide hii u hemen
Mkur u sha uhar u kwaghôron u profeti ne . . .
-
(G) Kon la tile sha ityough ki unô?—Ôr 1 Kroniku 29:23.
-
(H) Ka hanma shighe yange ve de u hemene? Er nan se fe ser yange ve lu hemen shighe u Yesu lu shin tar la ga?—Ôr Luka 21:24.
-
(I) Ka hanma shighe hementor la hide hii u hemene, man lu hana?
MKUR U SHA UHAR
Mtemtor
(G) Ator a ken Iserael a yange a tema tor sha ikyônough ki torough ki Aôndo la
Tor kera lu ga
(H) I tim Yerusalem, nahan tsombortor u ator a ken Iserael kera hemen ga kuma anyom 2,520
I hide a hementor la
(I) Yesu tema tor u Tartor u Aôndo, hii u hemen sha
Ashighe ataankarahar ka anyom a me?
Avegher a Bibilo agen ka a wase se u kaven kwagh u i ôr ken agen yô. Ikyav i tesen yô, Bibilo ôr ken takeda u Mpase ér shighe man ashighe man vegher shighe la ka ayange 1,260. (Mpase 12:6, 14) Ashighe ataankarahar la ka namba la kwa har je la, shin ayange 2,520. Ken Bibilo yô, ashighe agen iyange ka i tile sha ityough ki inyom jimin. (Esekiel 4:6) Ashighe ataankarahar a i er kwagh u a ken takeda u Daniel la kpa kape i lu je la, a tile sha ityough ki anyom 2,520.
5. Hii ken inyom i 1914 la je akaa gema shin tar
Yesu yange tsenga ôron akaa a una tema Tor sha ve, aa lu eren shin tar yô. Ôr Luka 21:9-11, maa lam nen sha mpin ne:
-
Ka akaa ne a han nahan u nenge shin u ungwa a lu erene?
Apostoli Paulu yange ôr aeren a ior vea lu a mi ken ayange a masejime a hemen u uumace ne yô. Ôr 2 Timoteu 3:1-5, maa lam nen sha mpin ne:
-
Ka aeren ne a han u nenge ior ve lu a mi nyiana?
6. Tese wer u na jighjigh wer Tartor u Aôndo ngu hemen
Ôr Mateu 24:3, 14, maa lam nen sha mbampin mban:
-
Ka tom u injaa u nyi i lu eren u tesen ér Tartor u Aôndo ngu hemen hegene?
-
We kpa u fatyô u eren tom ne nena?
Tartor u Aôndo ngu hemen hegen, shi ica a gba ga tsô ua hemen tar cii. Ôr Mbaheberu 10:24, 25, maa lam nen sha mpin ne:
-
Er se “nenge iyange la i lu mgbôghom” yô, ka nyi i doo u hanma wase nana ere?
Aluer u fa kwagh u una wase mbagenev shi una war uma ve nahan, u er nena?
ALAGHGA ORGEN NANA PINE ÉR: “Er nan Mbashiada mba Yehova ka ve kaa er inyom i 1914 la ka inyom i vesen yumu?”
-
We u kaa wer nyi?
KA NYI U HENE?
Akaaôron a profeti a Bibilo kua mlu u tar tese ér Tartor u Aôndo ngu hemen. Ka se tese ser se na jighjigh a kwagh ne sha u pasen kwagh u Tartor shon shi zan mbamkombo mba tiônnongo.
Mbampin mba umbur kwagh u i hen yô
-
Ka nyi yange i er ken mbee u ashighe ataankarahar a i tsenga ôron kwagh u a ken takeda u Daniel laa?
-
Er nan u ne jighjigh wer Tartor u Aôndo yange u hii u hemen ken inyom i 1914 laa?
-
U tese wer u na jighjigh wer Tartor u Aôndo ngu hemen hegen nena?
SEER HENEN KWAGH
Nenge kwagh u mbatimen sha kwagh u yiase kua ior mbagen ve ôr sha kwagh u akaa a a gem shin tar hii ken inyom i 1914 la zan zan nyian yô.
“Shighe u Aeren a Ior a Hembe Vihin Ne” (Awake!, Aipor 2007)
Ôr nenge er kwaghôron u profeti u ken Mateu 24:14 la yange bende a orgen yô.
“Yange M Soo Baseball Hemba Hanma Kwagh!” (Iyoukura Namba 3 2017)
Er nan se fe ser kwaghôron u profeti u ken Daniel ityough 4 la, ngu ôron kwagh u Tartor u Aôndo?
“Lu Hanma Shighe Tartor u Aôndo Hii u Hemene? (Vegher u sha 1)” (Iyoukura, Novemba 1, 2014)
Ka nyi i tese ér ‘ashighe ataankarahar’ a i ôr kwagh u a ken Daniel ityough 4 la yange kure ken inyom i 1914 laa?
“Lu Hanma Shighe Tartor u Aôndo Hii u Hemene? (Vegher u sha 2)” (Iyoukura, Janawari 1, 2015)
a Nenge ngeren uhar mba masetyô mba ve lu shin vegher u Seer Henen Kwagh u ityough kin la.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
