MATAUPU 32
Ko Pule Mai Nei te Malo o te Atua!
Ne kamata o pule mai te Malo o te Atua i te lagi i te tausaga ko te 1914. Tenā foki te kamataga o aso fakaoti o pulega a tāgata. E iloa pefea ne tatou? Mafaufau ki valoaga i te Tusi Tapu mo mea ‵tupu mo faifaiga a tino kolā ne lavea faka‵lei atu talu mai te 1914.
1. Ne a mea e fakaasi mai i valoaga i te Tusi Tapu?
E fakaasi mai i te tusi o Tanielu i te Tusi Tapu me i te Malo o te Atua ne kamata o pule mai i te fakaotiga o se vaitaimi e taku ko “taimi e fitu.” (Tanielu 4:16, 17) I se fia senitenali mai tua ifo, ne fakasino atu a Iesu ki te vaitaimi foki loa tenā e pelā me ko “taimi ne fuafuagina mō atufenua,” kae akoako mai ne ia me e seki palele atu a te vaitaimi tenā. (Luka 21:24) E pelā mo te mea ka onoono tatou ki ei, a taimi e fitu ne palele atu i te tausaga ko te 1914.
2. Ne a mea ‵tupu mo faifaiga a tino ne lavea faka‵lei atu talu mai te 1914?
Ne fesili atu a soko o Iesu ki a ia: “Se a foki te fakailoga o tou fakatasi mai mo te taimi o te gataga o te olaga tenei?” (Mataio 24:3) I tena tali, ne fai atu ne Iesu a mea e uke kolā ka ‵tupu māfai ko oti ne kamata o pule mai a ia i te lagi e pelā me ko te Tupu i te Malo o te Atua. E aofia i mea konei a taua, oge meakai, mo mafuie. (Faitau te Mataio 24:7.) Ne ‵valo mai foki i te Tusi Tapu me i faifaiga a tino “i aso fakaoti” ka fai pelā me ne “taimi faiga‵ta” i te olaga. (2 Timoteo 3:1-5) Ne lavea malosi atu eiloa talu mai te 1914 a mea ‵tupu i te lalolagi mo faifaiga konei a tino.
3. Kaia ne gasolo aka ei o ma‵sei atu a mea ‵tupu talu mai te taimi ne kamata ei te pulega a te Malo o te Atua?
Mai tua malie eiloa o te faiga a Iesu mo fai te Tupu i te Malo o te Atua, ne taua atu a ia i te lagi ki a Satani mo ana temoni, kae ne takavale a Satani. E fai mai te Tusi Tapu me “ne ‵pei ifo a ia ki te lalolagi, kae ne ‵pei ifo ana agelu fakatasi mo ia.” (Fakaasiga 12:9, 10, 12) Ko kaitaua malosi a Satani ona ko te iloa atu me ko pili o fakaseai a ia. Tela la, ko faka‵tupu ne ia a logo‵maega e uke i te lalolagi kātoa. E se tioa eiloa o ma‵sei ‵ki a mea ‵tupu i te lalolagi! A te Malo o te Atua ka faka‵lei ne ia a fakalavelave katoa konei.
KELI MALOSI IFO
Sukesuke ki te auala e iloa ei ne tatou me ne kamata o pule mai te Malo i te 1914 mo te mea e fakauiga ki ei.
4. E fakasino atu a valoaga i te Tusi Tapu ki te 1914
Ne fai ne te Atua ke maua ne te Tupu ko Nepukanesa i Papelonia i aso mua se moemiti fakavaloaga. A te moemiti mo tena fakamatalaga telā ne fai mai ne Tanielu e fakasino atu katoa ki te pulega a Nepukanesa mo te Malo o te Atua.—Faitau te Tanielu 4:17. a
Faitau te Tanielu 4:20-26, ko fakaaoga ei a te tiati ke tali a fesili konei:
-
(A) Se a te mea ne lavea ne Nepukanesa i tena moemiti?—Onoono ki te fuaiupu e 20 mo te 21.
-
(E) Se a te mea ka tupu ki te lakau?—Onoono ki te fuaiupu e 23.
-
(I) Se a te mea ka tupu māfai ko palele atu a “taimi e fitu”?—Onoono ki te fuaiupu e 26.
Te Sokoga o te Moemiti e Uiga ki te Lakau mo te Malo o te Atua
TE VALOAGA (Tanielu 4:20-36)
Pulega
(A) Se lakau lasi
Ko taofi te pulega
(E) “‵Kati ki lalo te lakau,” ke oko “ki te taimi ko palele atu ei a taimi e fitu”
Ko toe faka‵soko te pulega
(I) “Ka toe maua eiloa ne koe a tou malo”
I te fakataunuga muamua o te valoaga tenei . . .
-
(O) Ko oi e fakasino atu ki ei a te lakau?—Onoono ki te fuaiupu e 22.
-
(U) I te auala fea ne taofi aka ei tena pulega? —Faitau te Tanielu 4:29-33.
-
(F) Se a te mea ne tupu ki a Nepukanesa i te taimi ne palele atu ei a “taimi e fitu”? —Faitau te Tanielu 4:34-36.
TE FAKATAUNUGA MUAMUA
Pulega
(O) Nepukanesa, te Tupu o Papelonia
Ko taofi te pulega
(U) Mai tua o te 606 T.L.M., ne fakavalevale a Nepukanesa kae ne seki mafai o pule a ia i tausaga ‵tonu e fitu
Ko toe faka‵soko te pulega
(F) Ko toe ‵lei te mafaufau o Nepukanesa kae ne toe kamata o pule atu
I te lua o fakataunuga o te valoaga tenei . . .
-
(G) Ko oi ne fakasino atu ki ei a te lakau? —Faitau te 1 Nofoaiga Tupu 29:23.
-
(H) I te auala fea ne taofi aka ei te lotou pulega? E iloa pefea ne tatou me koi taofi eiloa te lotou pulega i te taimi ne nofo ei a Iesu i te lalolagi?—Faitau te Luka 21:24.
-
(K) Ne faka‵soko anafea te pulega tenei kae ne pule mai i fea?
TE LUA O FAKATAUNUGA
Pulega
(G) Ko tupu o Isalaelu kolā ne sui ne latou te pulega a te Atua
Ko taofi te pulega
(H) Ko fakaseai a Ielusalema, kae ne taofi ei te laina o tupu o tino Isalaelu i tausaga e 2,520
Ko toe faka‵soko te pulega
(K) Ne kamata o pule mai a Iesu i te lagi e pelā me ko te Tupu o te Malo o te Atua
E pefea te leva o taimi e fitu?
E fesoasoani mai a nai vaega o te Tusi Tapu ke malamalama tatou i nisi vaega i ei. E pelā mo te tusi o Fakaasiga i te Tusi Tapu e fai mai me i te tolu mo te āfa taimi e ‵pau mo aso e 1,260. (Fakaasiga 12:6, 14) A taimi e fitu e ‵pau mo te napa tenā māfai ko fatele mo te lua, io me ko te 2,520 aso. I nisi taimi e fakaaoga i te Tusi Tapu se aso e tasi ke fakasino atu ki se tausaga e tasi. (Esekielu 4:6) Kae penā foki a taimi e fitu i te tusi ko Tanielu—e fakasino atu ki tausaga e 2,520.
5. Ne ‵fuli te lalolagi talu mai te 1914
Ne ‵valo mai ne Iesu a mea kolā ka lavea atu e ‵tupu i te lalolagi māfai ko fai a ia mo Tupu. Faitau te Luka 21:9-11, ko sau‵tala ei ki te fesili tenei:
-
Ne a mea ‵tupu mai i mea konei ko oti ne lavea io me ne logo koe i ei?
Ne fakamatala mai ne te apositolo ko Paulo a uiga o tino i aso fakaoti o pulega a tāgata. Faitau te 2 Timoteo 3:1-5, ko sau‵tala ei ki te fesili tenei:
-
E mata, e lavea ne koe a uiga penā i tino i aso nei?
6. A te pulega a te Malo o te Atua e ‵tau o fakamalosi aka ei tatou
Faitau te Mataio 24:3, 14, ko sau‵tala ei ki fesili konei:
-
Se a te galuega tāua e fakaasi mai ei me ko pule mai nei a te Malo o te Atua?
-
E mafai pefea o kau atu koe ki te galuega tenei?
Ko pule mai nei a te Malo o te Atua, kae ko pili mai fua a te aso telā ka pule katoatoa mai a ia ki te lalolagi. Faitau te Epelu 10:24, 25, ko sau‵tala ei ki te fesili tenei:
-
Ne a mea e ‵tau o fai ne tatou taki tokotasi i te taimi e ‵kilo atu ei tatou ki te “aso tenā ko pili mai”?
Kafai ko iloa ne koe se mea telā ka mafai o fesoasoani atu ke fakasao ei se tino, se a te mea ka fai ne koe?
KĀTI KA FESILI MAI SE TINO: “Kaia e fai‵pati malosi faeloa a Molimau a Ieova e uiga ki te 1914?”
-
Ne a au pati ka fai atu?
MANATU AOGA
E fakamaoni mai ne valoaga i te Tusi Tapu, te fakasologa o mea ‵tupu, mo mea ‵tupu i te lalolagi me ko pule mai nei a te Malo o te Atua. E fakaasi atu te ‵tou tali‵tonu ki te mea tenei e auala i te talai atu ne tatou, mo te ‵kau atu ki fakatasiga a te fakapotopotoga.
Fesili
-
Ne a mea ne ‵tupu i te taimi ne palele atu ei a taimi e fitu kolā ne ‵valo mai i te tusi o Tanielu i te Tusi Tapu?
-
Se a te mea e fakatalitonu atu ki a koe me ne kamata o pule mai te Malo o te Atua i te 1914?
-
E fakaasi atu pefea ne koe a tou talitonu me ko pule mai nei a te Malo?
NISI FAKAMATALAGA
Mafaufau ki pati ne fai mai ne tino tusi tala fakasolopito e uiga ki mafuli‵fuliga i te lalolagi talu mai te 1914.
Faitau ki te auala ne aoga ei a te valoaga i te Mataio 24:14 ki te olaga o se tagata.
“Ne Fiafia Atu Au ki te Baseball i lō so se Mea Aka!” (Te Faleleoleo Maluga Napa 3 2017)
E iloa pefea ne tatou me i te valoaga i te Tanielu mataupu e 4 e fakasino atu ki te Malo o te Atua?
“Ne Kamata Anafea o Pule Mai te Malo o te Atua? (Vaega 1)” (Te Faleleoleo Maluga, Oketopa 1, 2014)
Se a te mea e fakaasi mai ei me i “taimi e fitu” kolā e faipati ki ei te Tanielu mataupu e 4 ne palele atu i te 1914?
“Ne Kamata Anafea o Pule Mai te Malo o te Atua? (Vaega 2)” (Te Faleleoleo Maluga, Novema 1, 2014)
a Ke onoono ki te avā mataupu fakaoti i te vaega o Nisi Fakamatalaga i te mataupu tenei.