UYONO 32
Uvie rẹ Ọghẹnẹ Suẹn Re!
Ukpe ri 1914 yen Uvie rẹ Ọghẹnẹ vwọ tuẹn usuon phiyọ vwẹ odjuvwu. Ukpe yena yen ọke rẹ oba rẹ usuon rẹ ihworakpọ je vwọ tonphiyọ. Mavọ yen avwanre vwọ riẹn? Roro kpahen aroẹmrẹ ri Baibol na, obo re phia vwẹ akpọ na rhanvwẹ 1914 kugbe iruemu rẹ ihwo djephia.
1. Die yen aroẹmrẹ ri Baibol na tare?
Ọbe ri Daniẹl tare nẹ Uvie rẹ Ọghẹnẹ cha tuẹn isuesun phiyọ vwẹ oba rẹ “ẹgbukpe-ighwrẹn.” (Daniẹl 4:16, 17) Ikpe ujorin evo vwọ wan nu, Jesu de djunute ukpe vuọvo yena nẹ ọyen “ọke ri Keferi cha vwọ gba.” Ọ da tanẹ ọke na ji vwoba-a. (Luk 21:24) Kirobo ra cha mrẹ, ẹgbukpe ighwrẹn na vwoba vwẹ ukpe ri 1914.
2. Die yen phia vwẹ akpọ na rhanvwẹ ukpe ri 1914, kẹ iruemu vọ yen ihwo djephia?
Idibo ri Jesu da ta: “Kọrhọ re cha dia oka rẹ ẹcha rẹ ọmọ rẹ ohwo, kugbe oba rẹ akpọ na?” (Matiu 24:3) Jesu da kpahenphiyọ rọ vwọ vuẹ ayen erọnvwọn buebun re cha phia siẹrẹ ọyen da dia Ovie rẹ Uvie rẹ Ọghẹnẹ vwẹ odjuvwu re; erọnvwọn kerẹ ifovwin, ọkanrovwẹ rẹ emuọre, otọ ro che kpogho. (Se Matiu 24:7.) Baibol na tare nẹ iruemu rẹ ihwo che djephia “vwẹ oba rẹ ẹdẹ na” cha nẹrhẹ “ẹdẹ ebrabra” na bẹn eyeren. (2 Timoti 3:1-5) Rhanvwẹ ukpe ri 1914 yen a vwọ mrẹ erọnvwọn yena re djunute vẹ iruemu rẹ ihwo che djephia.
3. Diesorọ akpọ na vwọ braphiyọ rhanvwẹ ọke rẹ Uvie rẹ Ọghẹnẹ vwọ tuẹn usuọn phiyọ?
A ghwa vwọ vwẹ Jesu vwo mu Ovie rẹ Uvie rẹ Ọghẹnẹ nu, o de nene Idẹbono vẹ emekashe rọyen phi ofovwin vwẹ odjuvwu. Ẹkẹvuọvo, e phi eshu kparobọ. Baibol na da ta: “A da djẹ vẹ emekashe rọye ejobi wotọ.” (Ẹvwọphia 12:9, 10, 12) Ivun ko miovwo Eshu djọghrọ djọghrọ kidie ọ riẹnre nẹ a cha ghwọrọ. Ọtiọyena, kọ so emiamiavwe vẹ ojaẹriọ vwẹ akpọneje. Kọyensorọ akpọ na vwọ braphiyọ! Uvie rẹ Ọghẹnẹ cha rhuẹrẹ ebẹnbẹn na eje phiyọ.
HIẸ KODO
Roro kpahen oboresorọ o vwo mu avwanre ẹro nẹ Uvie na tonphiyọ vwẹ 1914, kugbe obo ro mudiaphiyọ kẹ avwanre.
4. Ikekeri ri Baibol na rionbọ kpo ukpe ri 1914
Ọghẹnẹ nẹrhẹ Ovie Nẹbukadreza rọ dia Ovie ri Babilọn awanre vwerhẹn evwerhẹn ro shekpahen obo re cha phia vwẹ obaro na. Evwerhẹn na vẹ otọ rọyen rẹ Daniẹl fanre djerephia nẹ evwerhẹn na shekpahen usuon ri Nẹbukadreza vẹ Uvie rẹ Ọghẹnẹ.—Se Daniẹl 4:17. a
Se Daniẹl 4:20-26, wọ reyọ ekpeti na vwọ kpahenphiyọ enọ ri nenire.
-
(A) Die yen Nẹbukadreza mrẹre vwẹ evwerhẹn rọyen?—Ni awọ 20 vẹ 21.
-
(B) Die yen phia vwọ kẹ urhe na?—Ni owọ 23.
-
(C) Die yen cha phia vwẹ oba rẹ “ẹgbukpe-ighwrẹn” na?—Ni owọ 26.
Idjerhe vọ Yen Evwerhẹn rẹ Urhe na Vwo Churobọ si Uvie rẹ Ọghẹnẹ?
AROẸMRẸ NA (Daniẹl 4:20-36)
Usuon
(A) Urhe rọ pha gigirigi
A dobọ rẹ usuon na ji
(B) “She urhe na teye otọ,” rere “ẹgbukpe-ighwrẹn vwọ wan”
A rhoma vwẹ usuon na kẹ
(C) “Uvie wẹn kọ dia kẹ wẹ”
Orugba rẹsosuọ rẹ aroẹmrẹ nana . . .
-
(D) Ono yen urhe na mudiaphiyọ?—Ni 22.
-
(E) Ọke vọ yen a vwọ da usuon rọyen ji?—Se Daniẹl 4:29-33.
-
(F) Die yen phia kẹ Nẹbukadreza vwẹ oba rẹ “ẹgbukpe-ighwrẹn” na?—Se Daniẹl 4:34-36.
ORUGBA RẸSOSUỌ
Usuon
(D) Nẹbukadreza, Ovie ri Babilọn
A dobọ rẹ usuon na ji
(E) Ukpe ri 606 B.C.E. vwọ wan nu, orhuẹ de fru Nẹbukadreza, ọtiọyena o rhe se sun vwẹ ẹgbukpe ighwrẹ-ẹn.
A rhoma vwẹ usuon na kẹ
(F) Afọnrhe rẹ Nẹbukadreza da rhoma gba, ọ da rhoma tuẹn usuon rọyen phiyọ
Orugba rivẹ rẹ aroẹmrẹ nana . . .
-
(G) Ono yen urhe na mudiaphiyọ?—Se 1 Ikun Rive 29:23.
-
(H) Ọke vọ yen a vwọ da usuon rayen ji? Kẹ, mavọ yen a vwọ riẹn nẹ a je dobọ rẹ usuon na ji vwẹ ọke rẹ Jesu vwọ hẹ otọrakpọ na?—Se Luk 21:24.
-
(I) Ọke vẹ asan vọ yen a vwọ rhoma vwẹ usuon nana vwo mu?
ORUGBA RIVẸ
Usuon
(G) Ivie rẹ Izrẹl re vwo dje usuon rẹ Ọghẹnẹ
A dobọ rẹ usuon na ji
(H) A ghwọrọ Jerusalẹm. Ẹgbukpe 2,520 yen a vwọ dobọ rẹ urhiẹ rẹ Ivie rẹ Izrẹl ji
A rhoma vwẹ usuon na kẹ
(I) Jesu tuẹn usuon phiyọ vwẹ odjuvwu kerẹ Ovie rẹ Uvie rẹ Ọghẹnẹ
Mavọ yen ẹgbukpe ighwrẹn na gron te?
Ẹkpo ri Baibol evo sa chọn avwanre uko vwo vwo ẹruọ rẹ ẹdia efa. Kerẹ udje, ọbe rẹ Ẹvwọphia tare nẹ ọke erha kugbe ubro rẹ ọke mudiaphiyọ ẹdẹ 1,260. (Ẹvwọphia 12:6, 14) Ọke ighwrẹn ọyen asakuivẹ rẹ ukeri yena, yẹrẹ ẹdẹ 2,520. Ọke evo, ẹdẹ ọvo mudiaphiyọ ukpe ọvo vwẹ Baibol na. (Izikiẹl 4:6) Ọtiọyena, ọke yẹrẹ ẹgbukpe ighwrẹn na mudiaphiyọ ikpe 2,520.
5. Akpọ na weneri rhanvwẹ ukpe ri 1914
Jesu djunute oborẹ akpọ na cha dia ọke rọ da dia Ovie re. Se Luk 21:9-11, ovwan ta ota kpahen onọ nana:
-
Ọrhọ vwẹ usun rẹ ẹdia nana yen wọ mrẹre yẹrẹ nyo kpahen re?
Ọyinkọn Pọl djisẹ rẹ oborẹ ihwo cha dia vwẹ ọke rẹ oba rẹ usuon rẹ ihworakpọ. Se 2 Timoti 3:1-5, ovwan ta ota kpahen onọ nana:
-
Erhọ yen usun rẹ iruemu nana rẹ ihwo ruẹ nonẹna?
6. Ofori nẹ Uvie rẹ Ọghẹnẹ mu avwanre vwo ruiruo
Se Matiu 24:3, 14, ovwan ta ota kpahen enọ nana:
-
Iruo ọghanghanre vọ yen djerephia nẹ Uvie rẹ Ọghẹnẹ suẹn asaọkiephana?
-
Mavọ yen wo se vwo vwobọ vwẹ iruo nana?
Uvie rẹ Ọghẹnẹ tuẹn usuon phiyọ re, ọke ro che vwo sun otọrakpọ na sikẹre re. Se Hibru 10:24, 25, ovwan ta ota kpahen onọ nana:
-
Die yen ofori nẹ avwanre ohwo vuọvo ru ra vwọ “mrẹ nẹ ẹdẹ na si kẹre re”?
Die wo che ru wo de yono obo re sa chọn ihwo efa uko, ro ji che sivwin ayen?
OHWO SA NỌ: “Diesorọ Iseri ri Jihova vwọ tanẹ 1914 ọyen ukpe ọghanghanre?”
-
Die yen wọ cha ta?
ỌDJẸKOKO
Aroẹmrẹ ri Baibol, ikekeri, vẹ obo re phia vwẹ akpọ na djerephia nẹ Uvie rẹ Ọghẹnẹ tuẹn usuon phiyọ re. Avwanre djephia nẹ o mu avwanre ẹro womarẹ a vwọ vuẹ ihwo kpahọn ji kpo emẹvwa.
Ẹrhomafuẹrẹn
-
Die yen phiare vwẹ oba rẹ ọke ighwrẹn ra mraro rọyen vwẹ ọbe ri Daniẹl?
-
Die yen kẹ wẹ imuẹro nẹ Uvie rẹ Ọghẹnẹ tuẹn usuon phiyọ vwẹ 1914?
-
Mavọ yen wo se vwo djephia nẹ o muwẹro nẹ Uvie na suẹn enẹna re?
HIẸ GUỌNỌ
Yono kpahen oborẹ igbikuegbe vẹ ihwo efa ta kpahen ewene re vwomaphia vwẹ akpọ na rhanvwẹ ukpe ri 1914.
“Ọke rẹ Omamọ rẹ Uruemu Vwo Shekpotọ Siẹvuọvo” (Awake!, April 2007)
Se kpahen oborẹ aroẹmrẹ rọhẹ Matiu 24:14 vwo wene akpeyeren rẹ ọshare ọvo.
“Mi Vwo Ẹguọnọ rẹ Baseball Vrẹ Kemu Kemu!” (Uwevwin Orhẹrẹ, Ukeri 3 2017)
Mavọ yen avwanre vwọ riẹn nẹ aroẹmrẹ rọhẹ Daniẹl uyovwin 4 churobọ si Uvie rẹ Ọghẹnẹ?
“Ọke vọ Yen Uvie rẹ Ọghẹnẹ Vwọ Tuẹn Usuon Phiyọ? (Ẹbẹre 1)” (Uwevwin Orhẹrẹ rẹ October 1, 2014)
Die yen djerephia nẹ “ẹgbukpe-ighwrẹn” re djunute vwẹ Daniẹl uyovwin 4 na vwoba vwẹ 1914?
“Ọke vọ Yen Uvie rẹ Ọghẹnẹ Vwọ Tuẹn Usuon Phiyọ? (Ẹbẹre 2)” (Uwevwin Orhẹrẹ ri November 1, 2014)
a Ni iyovwinreta ivẹ re koba vwẹ ẹbẹre rẹ Hiẹ Guọnọ rẹ uyono nana.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
