NGUDO 32
Muvhuso Wa Mudzimu U Khou Vhusa Zwino!
Muvhuso wa Mudzimu wo thoma u vhusa ṱaḓulu nga 1914. Nga wonoyo ṅwaha, ho mbo ḓi thoma na maḓuvha a vhufhelo ha u vhusa ha vhathu. Ri zwi ḓivha hani? Ri ḓo guda nga ha zwithu zwe Bivhili ya dzula yo zwi amba zwine zwa khou itea shangoni na nḓila ye vhathu vha ḓifara ngayo u bva nga 1914.
1. Ndi mini zwe Bivhili ya dzula yo zwi amba?
Bugu ya Daniele yo amba uri Muvhuso wa Mudzimu u ḓo thoma u vhusa magumoni a “zwifhinga zwa sumbe.” (Daniele 4:16, 17) Nga murahu ha miṅwaha minzhi, Yesu o amba nga ha zwenezwo zwifhinga zwa sumbe. O amba uri ndi “zwifhinga zwo vhewaho zwa dzitshaka” nahone o funza uri zwenezwo zwifhinga zwo vha zwi sa athu fhela. (Luka 21:24) Samusi ri tshi ḓo zwi vhona, zwenezwo zwifhinga zwo fhela nga ṅwaha wa 1914.
2. Hu khou itea mini shangoni nahone vhathu vho ḓifara hani u bva nga 1914?
Vhafunziwa vha Yesu vho mu vhudzisa uri: “Tshiga tshi ḓo vha tshifhio tsha u vha hone hau na tsha vhufhelo ha shango?” (Mateo 24:3) Musi Yesu a tshi vha fhindula, o vha vhudza nga ha zwithu zwinzhi zwine zwa ḓo itea musi o no thoma u vhusa ṱaḓulu sa Khosi ya Muvhuso wa Mudzimu. Zwiṅwe zwa zwenezwo zwithu zwi katela nndwa, nḓala na midzinginyo. (Vhalani Mateo 24:7.) Bivhili yo dovha ya amba uri nḓila ine vhathu vha ḓo ḓifara ngayo “maḓuvhani a vhufhelo” i ḓo ita uri vhutshilo vhu ‘konḓe.’ (2 Timotheo 3:1-5) Zwenezwi zwithu na nḓila ine vhathu vha ḓifara ngayo zwo thoma u vhonalesa u bva nga 1914.
3. Ndi ngani zwithu zwo ṋaṋa u vhifha u bva tshee Muvhuso wa Mudzimu wa thoma u vhusa?
Musi Yesu a tshi kha ḓi tou bva u vhewa sa Khosi ya Muvhuso wa Mudzimu ṱaḓulu, o mbo ḓi lwa na Saṱhane na madimoni awe. Saṱhane o kundwa kha yeneyo nndwa. Bivhili i amba uri o “poswa kha ḽifhasi” na ‘vharuṅwa vhawe vha poswa kha ḽifhasi nae.’ (Nzumbululo 12:9, 10, 12) Saṱhane o sinyuwa nga maanḓa ngauri u a zwi ḓivha uri u ḓo fheliswa. Ndi ene ane a khou ri pfisa vhuṱungu na u ri shengedza ḽifhasini ḽoṱhe. Zwenezwo zwi ri thusa u pfesesa uri ndi ngani shango ḽo tshinyala nga u rali! Muvhuso wa Mudzimu u ḓo lugisa zwenezwi zwithu zwoṱhe.
GUDANI ZWO ENGEDZEAHO
Vhonani uri ri zwi ḓivha hani uri Muvhuso wa Mudzimu wo thoma u vhusa nga 1914 na uri ri nga sumbedza hani uri ri a tenda uri u khou vhusa zwino.
4. Zwe Bivhili ya dzula yo zwi amba zwi sumbedza uri Muvhuso wa Mudzimu wo thoma u vhusa nga 1914
Mudzimu o ita uri Nebukadanetsara we a vha e Khosi ya Babele a ḽore nga ha zwine zwa ḓo itea tshifhingani tshi ḓaho. Bivhilini ri vhala nga ha wonoyo muḽoro na nḓila ye Daniele a u ṱalutshedza ngayo. Zwi tou vha khagala uri wonoyo muḽoro wo vha u tshi amba nga ha muvhuso wa Nebukadanetsara na Muvhuso wa Mudzimu.—Vhalani Daniele 4:17. a
Vhalani Daniele 4:20-26, ni kone u fhindula mbudziso dzi tevhelaho ni tshi shumisa tshati:
-
(A) Nebukadanetsara o vhona mini muḽoroni wawe?—Vhalani vese 20 na 21.
-
(B) Muri u ḓo itwa mini?—Vhalani vese 23.
-
(C) Hu ḓo itea mini magumoni a “zwifhinga zwa sumbe”?—Vhalani vese 26.
Muḽoro U Ambaho Nga Ha Muri U Tshimbidzana Hani Na Muvhuso Wa Mudzimu?
ZWE ZWA POROFITIWA (Daniele 4:20-36)
Muvhuso
(A) Muri muhulwane
U litsha u vhusa
(B) “Rema muri,” u u litshe u swika hu tshi fhela “zwifhinga zwa sumbe”
U dovha a vhusa
(C) “Muvhuso wau u ḓo dovha wa vha wau”
Zwe zwa porofitiwa zwi itea lwa u thoma . . .
-
(D) Muri wo vha u tshi imela mini?—Vhalani vese 22.
-
(E) O litsha lini u vhusa?—Vhalani Daniele 4:29-33.
-
(F) Ho itea mini kha Nebukadanetsara magumoni a “zwifhinga zwa sumbe”?—Vhalani Daniele 4:34-36.
ZWE ZWA POROFITIWA ZWI ITEA LWA U THOMA
Muvhuso
(D) Nebukadanetsara Khosi ya Babele
U litsha u vhusa
(E) Nga murahu ha 606 B.C.E., Nebukadanetsara o mbo ḓi thoma u penga nahone a litsha u vhusa lwa miṅwaha ya sumbe
U dovha a vhusa
(F) Tshipengo tsha Nebukadanetsara tsho mbo ḓi fhela nahone a dovha a vhusa
Zwe zwa porofitiwa zwi itea lwa vhuvhili . . .
-
(G) Muri wo vha u tshi imela mini?—Vhalani 1 Koronika 29:23.
-
(H) Vho litsha lini u vhusa? Ri zwi ḓivha hani uri vho vha vha sa khou vhusa musi Yesu e kha ḽifhasi?—Vhalani Luka 21:24.
-
(I) Vho dovha vha vhusa lini nahone ngafhi?
ZWE ZWA POROFITIWA ZWI ITEA LWA VHUVHILI
Muvhuso
(G) Khosi dza Isiraele dzine dza imela u vhusa ha Mudzimu
U litsha u vhusa
(H) Yerusalema ho fheliswa, zwenezwo zwa ita uri khosi dza Isiraele dzi litshe u vhusa lwa miṅwaha ya 2 520
U dovha a vhusa
(I) Yesu u thoma u vhusa ṱaḓulu sa Khosi ya Muvhuso wa Mudzimu
Zwifhinga zwa sumbe ndi tshifhinga tshingafhani?
Maṅwe mafhungo a re Bivhilini a ri thusa uri ri pfesese maṅwe mafhungo a re Bivhilini. Sa tsumbo, bugu ya Nzumbululo i amba uri zwifhinga na hafu ya tshifhinga zwi lingana na maḓuvha a 1 260. (Nzumbululo 12:6, 14) Zwifhinga zwa sumbe ndi maḓuvha a 1 260 a tshi vhaliwa luvhili kana ndi maḓuvha a 2 520. Bivhilini, nga zwiṅwe zwifhinga ipfi “ḓuvha” ḽi ambela kha ṅwaha. (Hesekiele 4:6) Nga zwenezwo, zwifhinga zwa sumbe zwe ha ambiwa nga hazwo kha bugu ya Daniele ndi miṅwaha ya 2 520.
5. Vhuimo ha shango ho shanduka u bva nga 1914
Yesu o dzula o amba uri vhuimo ha shango vhu ḓo vha hani musi o no thoma u vhusa. Vhalani Luka 21:9-11, ni kone u fhindula mbudziso i tevhelaho:
-
Kha zwo ambiwaho kha dzenedzi vese, ndi zwifhio zwine no no zwi vhona zwi tshi itea kana zwine no no pfa nga hazwo?
Muapostola Paulo o amba nga ha nḓila ine vhathu vha ḓo ḓifara ngayo maḓuvhani a vhufhelo. Vhalani 2 Timotheo 3:1-5, ni kone u fhindula mbudziso i tevhelaho:
-
Naa no no vhona vhathu vha tshi khou ḓifara nga yeneyo nḓila ṋamusi?
6. Sumbedzani uri ni a tenda uri Muvhuso wa Mudzimu u khou vhusa zwino
Vhalani Mateo 24:3, 14, ni kone u fhindula mbudziso dzi tevhelaho:
-
Ndi mushumo ufhio wa ndeme une wa sumbedza uri Muvhuso wa Mudzimu u khou vhusa zwino?
-
Ni nga shela hani mulenzhe kha wonoyo mushumo?
Muvhuso wa Mudzimu u khou vhusa zwino nahone tshifhinga tsha uri u vhuse ḽifhasi ḽoṱhe tshi tsini. Vhalani Vhahevheru 10:24, 25, ni kone u fhindula mbudziso i tevhelaho:
-
Muṅwe na muṅwe washu u fanela u ita mini samusi ri tshi khou zwi “vhona uri ḓuvha ḽi khou sendela”?
Ni nga ita mini arali ni tshi ḓivha zwiṅwe zwithu zwine zwa nga thusa vhaṅwe vhathu na zwine zwa nga tshidza vhutshilo havho?
MUṄWE MUTHU A NGA VHUDZISA URI: “Ndi ngani Ṱhanzi dza Yehova vha tshi amba uri 1914 ndi ṅwaha wa ndeme?”
-
Inwi ni nga ri mini?
NO GUDA MINI?
Zwe zwa porofitiwa Bivhilini na vhuimo ha shango, zwi sumbedza uri Muvhuso wa Mudzimu u khou vhusa zwino. Ri sumbedza uri ri a tenda zwenezwi nga u ḓivhadza mafhungo maḓifha na nga u vha hone tshivhidzoni.
Ni Kha Ḓi Zwi Humbula?
-
Ho itea mini magumoni a zwifhinga zwa sumbe zwe ha dzula ho ambiwa nga hazwo kha bugu ya Daniele?
-
Ndi mini zwine zwa ita uri ni vhe na vhungoho ha uri Muvhuso wa Mudzimu wo thoma u vhusa nga 1914?
-
Ni nga sumbedza hani uri ni a tenda uri Muvhuso wa Mudzimu u khou vhusa zwino?
WANANI ZWO ENGEDZEAHO
Gudani uri vhathu vhane vha ṅwala nga ha ḓivhazwakale na vhaṅwe vha ri mini nga ha u shanduka ha vhuimo ha shango u bva nga 1914.
“Musi Vhuḓifari Vhu Tshi Tshinyala Nga U Bonya Ha Iṱo” (Thero i re kha Fhaṱuwani!, April 2007)
Vhalani nga ha uri zwe zwa porofitiwa kha Mateo 24:14 zwo kwama hani muṅwe munna.
“Ndo Vha Ndi Tshi Funa U Tamba Baseball Nga Mbilu Yanga Yoṱhe!” (Tshiingamo No. 3 2017)
Ri zwi ḓivha hani uri zwe zwa porofitiwa kha Daniele ndima 4 zwi ambela kha Muvhuso wa Mudzimu?
“Muvhuso Wa Mudzimu Wo Thoma U Vhusa Lini? (Tshipiḓa 1)” (Tshiingamo, 1 November 2014)
Ndi mini zwine zwa sumbedza uri “zwifhinga zwa sumbe” zwe ha ambiwa nga hazwo kha Daniele ndima 4 zwo guma nga 1914?
“Muvhuso Wa Mudzimu Wo Thoma U Vhusa Lini? (Tshipiḓa 2)” (Tshiingamo, 1 January 2015)
a Vhalani thero mbili dza u fhedza dzi re kha tshipiḓa tshine tsha ri, “Wanani Zwo Engedzeaho” tshi re kha ino ngudo.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
