LIJIGANYO 32
Uchimwene wa Mlungu Ukulamulila
Uchimwene wa Mlungu wawuli kwinani watandite kulamulila m’chaka cha 1914. Mwamti masiku gambesi ga maulamusi ga ŵandu gatandite m’chakachi. Ana tukumanyilila chamtuli yeleyi? Kwende tukambilane yajasasile Baibulo mkanipaŵe, yindu yayikutendekwa pachilambopa soni mwasiŵelele ndamo sya ŵandu kutandila mu 1914.
1. Ana yajasasile Baibulo mkanipaŵe yikulosya chichi?
Baibulo jalosisye kuti Uchimwene wa Mlungu uchitanda kulamulila chakumbesi kwa ndaŵi jajikusamanyika kuti “yaka msano ni yiŵili.” (Daniele 4:16, 17) Pali pamasile yaka yejinji, Yesu jwajisasile ndaŵiji kuti jili ‘mbesi ja ndaŵi ja ŵandu ŵa mitundu jine.’ Jwalakwe jwasasile kuti ndaŵiji jaliji mkanijiŵe kumala. (Luka 21:24) Munganiji chitulijiganye kuti yaka msano ni yiŵiliyi, yamasile m’chaka cha 1914.
2. Ana pachilambopa paŵele mkutendekwa yamtuli kutandila mu 1914, soni ŵandu alosisye ndamo syamtuli?
Ŵakulijiganya ŵa Yesu ŵam’wusisye kuti, “Ana tichichitendekwa chichi kulosya kuti ndaŵi jikwanile jakwika soni kwa ŵalakwe [“jakuŵapo kwawo,” NWT] nambo soni mbesi ja chilambo chapasi?” (Mateyu 24:3) Pakwanga, Yesu jwasasile yindu yejinji yayichitendekwa pachachitanda kulamulila mpela Mwenye jwa Uchimwene wa Mlungu kwinani. Yine mwa yindu yaŵasasileyi yili ngondo, sala soni yisichinya kapena kuti yifomelesi. (Aŵalanje Mateyu 24:7.) Baibulo jasasilesoni mkanipaŵe kuti yitendo ya ŵandu ‘m’masiku gambesi’ yichitendekasya kuti umi uŵe ‘wakusawusya.’ (2 Timoteo 3:1-5) Yeleyi yiŵele mkutendekwa pachilambopa kutandila mu 1914.
3. Ana ligongo chichi yindu pachilambopa yasakele mnope Uchimwene wa Mlungu uli utandite kulamulila?
Yesu paŵagambile kuŵa Mwenye jwa mu Uchimwene wa Mlungu, kwinani japali ngondo pasikati pa Yesu ni Satana soni yiŵanda. Yesu jwamgomeche Satana. Panganiji Baibulo jikusati, Satana ‘ŵaponyedwe pa chilambo pampepe ni malayika gakwe gosope.’ (Chiwunukuko 2:9, 10, 12) Jwalakwe ali jwakutumbila mnope ligongo akumanyilila kuti chachimjonanga. Ligongo lya yeleyi jwalakwe akutendekasya yipwetesi pachilambo chosope. Ni ligongo lyakwe yindu pachilambopa yisakele mnope. Nambope Uchimwene wa Mlungu chiwumasye yipwetesi yosopeyi.
KULIJIGANYA YEJINJI
Alijiganye yayikusatukamuchisya kumanyilila kuti Uchimwene wa Mlungu watandite kulamulila mu 1914. Soni amanyilile mwayikusati kutukwaya yeleyi.
4. Baibulo jikusalosya kuti Uchimwene wa Mlungu watandite kulamulila mu 1914
Mlungu ŵamtendekasisye Mwenye Nebukadinesa jwa ku Babiloni kusagamila yindu yayichitendekwa msogolo. Sagamisi syelesi soni kugopolela kwakwe yasalaga ya ulamusi wa Nebukadinesa soni Uchimwene wa Mlungu.—Aŵalanje Daniele 4:17. a
Aŵalanje Daniele 4:20-26, kaneko akamulichisye masengo yiwulili yayili pasiyo pakwanga yiwusyo ayi:
-
(A) Ana Nebukadinesa ŵayiweni yamtuli mu sagamisi syakwe?—Alole vesi 20 soni 21.
-
(B) Ana chitela ŵachitesile chichi?—Alole vesi 23.
-
(C) Ana kumbesi kwa “yaka msano ni yiŵili” kwatendekwe chichi?—Alole vesi 26.
Kukamulana kwa Sagamisi sya Chitela ni Uchimwene wa Mlungu
YAKULOCHESYA (Daniele 4:20-36)
Ulamusi
(A) Chitela chekulungwa
Ulamusi wasokonechele
(B) “Mgwisye chitelacho” soni mkunde kuti “yaka msano ni yiŵili” yimale
Ulamusi watandilesoni
(C) “Timchiŵa soni mwenye”
Kwanilichikwa kwandanda kwa yakulochesyayi . . .
-
(D) Ana chitela chajimilaga ŵani?—Alole vesi 22.
-
(E) Ana ulamusi wakwe wasokonechele chamtuli?—Aŵalanje Daniele 4:29-33.
-
(F) Ana ni chichi chachamtendechele Nebukadinesa kumbesi kwa “yaka msano ni yiŵili”?—Aŵalanje Daniele 4:34-36.
KWANILICHIKWA KWANDANDA
Ulamusi
(D) Nebukadinesa Mwenye jwa ku Babiloniya
Ulamusi wasokonechele
(E) Chaka cha 606 B.C.E. chili chimasile, Nebukadinesa jwatesile masoka soni nganalamulila kwa yaka msano ni yiŵili
Ulamusi watandilesoni
(F) Nebukadinesa gammalile masoka mwamti jwatandilesoni kulamulila
Kwanilichikwa kwaŵili kwa yakulochesyayi . . .
-
(G) Ana chitela chajimilaga ŵani?—Aŵalanje 1 Mbili 29:23.
-
(H) Ana ulamusi wawo wasokonechele chamtuli? Ana tukumanyilila chamtuli kuti ulamusi waliji chiŵela wesokonechele Yesu paŵaliji pachilambo chapasi?—Aŵalanje Luka 21:24.
-
(I) Ana ulamusiwu watandite kulamulila kwapi soni chakachi?
KWANILICHIKWA KWAŴILI
Ulamusi
(G) Achayimwene ŵa Aisalaeli ŵele ŵajimilaga Uchimwene wa Mlungu
Ulamusi wasokonechele
(H) Msinda wa Yelusalemu ali awujonasile, msele wa achayimwene ŵa Aisalaeli wasokonechele kwa yaka 2,520
Ulamusi watandilesoni
(I) Yesu akutanda kulamulila mpela Mwenye jwa mu Uchimwene wa Mlungu kwinani
Ana yaka msano ni yiŵili yaliji yelewu chamtuli?
Ngani sine sya m’Baibulo sikusatukamuchisya kupikanichisya ngani sine syasilisoni m’Baibulo. Mwachisyasyo, m’Baibulo, buku ja Chiwunukuko jikusasala kuti yaka yitatu ni miyesi 6 yikupanganya masiku 1,260. (Chiwunukuko 12:6, 14) Mwakamulana ni yakulochesya ya m’Baibulo masiku 360 gakusapanganya chaka chimo. Yeleyi yikugopolela kuti “yaka msano ni yiŵili” yikupanganya masiku 2,520. Nambosoni ndaŵi sine m’Baibulo lisiku limo likusajimilaga chaka. (Esekiele 4:6) Myoyo mwakamulana ni yakulochesya ya m’buku ja Daniele, yaka msano ni yiŵili yikwimila yaka 2,520.
5. Chilambochi chichenjile kutandila mu 1914
Yesu jwasasile mkanipaŵe muyichiŵela yindu pachilambopa jwalakwe pachachiŵa Mwenye. Aŵalanje Luka 21:9-11, kaneko akambilane chiwusyo achi:
-
Pa yindu yayikutendekwa pachilambopa, ana ni yindu yapi yakuyiwona soni kuyipikana?
Ndumetume Paulo jwasasile mwachachiŵela ŵandu m’masiku gakumalisya ga maulamusi ga ŵandu. Aŵalanje 2 Timoteo 3:1-5, kaneko akambilane chiwusyo achi:
-
Ana ni ndamo syapi syakusiwona ŵandu ali mkutenda masiku agano?
6. Alosyeje kuti akusakulupilila kuti Uchimwenewu ukulamulila
Aŵalanje Mateyu 24:3, 14, kaneko akambilane yiwusyo ayi:
-
Ana ni masengo gakusosekwa mnope gapi gagakulosya kuti Uchimwene wa Mlungu ukulamulila?
-
Ana mpaka atende yamtuli kuti akamuleje nawo masengoga?
Apano Uchimwene wa Mlungu ukulamulila. Soni ndaŵi jakuti ulamulile chilambo chosope jisigele panandi. Aŵalanje Ahebeli 10:24, 25, kaneko akambilane chiwusyo achi:
-
Ana tukusosekwa kutenda chichi ‘lisiku lya Ambuje palikuŵandichila’?
Naga akumanyilila yampaka yakamuchisye ŵane soni kulupusya umi wawo, ana mpaka atende uli?
JWINE MPAKA ŴAWUSYE KUTI: “Ana ligongo chichi ŵa Mboni sya Yehofa akusaŵecheta mnope ya chaka cha 1914?”
-
Ana mpaka ajanje uli?
YALIJIGANYISYE
Yakulochesya ya m’Baibulo soni yayikutendekwa pachilambopa yikulosya kuti Uchimwene wa Mlungu ukulamulila. Tukusalosya kuti tukusawukulupilila Uchimwenewu patukamula nawo masengo gakulalichila soni kusimanikwa pamisongano.
Yiwusyo Yakuwilisya
-
Ana buku ja m’Baibulo ja Daniele jasasile kuti kumbesi kwa “yaka msano ni yiŵili” kuchitendekwa yamtuli?
-
Ana ni chichi chachikwasimichisya wawojo kuti Uchimwene wa Mlungu watandite kulamulila mu 1914?
-
Ana mpaka alosye chamtuli kuti Uchimwene wa Mlungu ukulamulila apano?
YAKULINGA YINESONI
Alole yasasile ŵakulemba mbili jakala soni ŵane pakwamba ya mwachichenjile chilambochi kutandila mu 1914.
“Ndaŵi Jele Ndamo Syambone Syatandite Kumala Mnope” (Ajimuche!, Epulo 2007)
Aŵalanje kuti amanyilile muyatite kumkamuchisya mundu jwine yakulochesya ya pa Mateyu 24:14.
“Nanonyelaga Mnope Mpila wa Baseball Kupunda Chilichose” (Sanja ja Mlonda Na. 3 2017)
Ana tukumanyilila chamtuli kuti yakulochesya ya pa Daniele 4 yikusasala ya Uchimwene wa Mlungu?
Ana ni chichi chachikulosya kuti “yaka msano ni yiŵili” yayikusimanikwa mu Daniele 4 yamasile mu 1914?
a Alole ngani siŵili syasili kumbesi kwa kamtwe kakuti “Yakulinga Yinesoni” mu lijiganyoli.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
