XOOK 32
¡Tsʼoʼok u káajal u gobernar u Reino Dios!
Tu añoil 1914 ka káaj u gobernar u Reino Dios teʼ kaʼanoʼ. Teʼ año xan ka káaj u tsʼook kʼiiniloʼob u gobierno wíinikoʼ. ¿Baʼaxten k-aʼalik beyoʼ? Utiaʼal leloʼ koʼox ilik baʼax ku yaʼalik le Bibliaoʼ, baʼax ku yúuchul tiʼ tuláakal yóokʼol kaab yéetel bix u modos le máakoʼob desde 1914.
1. ¿Baʼax u yaʼalmaj le Bibliaoʼ?
U libroil Danieleʼ u yaʼalmiliʼ yaan u káajal u gobernar u Reino Dios tiʼ le tiempo ku kʼaabaʼtik «siete añosoʼ» (Daniel 4:16, 17). Ka máan kʼiineʼ Jesúseʼ tʼaanaj xan tiʼ le tiempoaʼ, tu yaʼaleʼ «le kʼiinoʼob tsʼaʼan tiʼ le kaajoʼoboʼ» maʼ tsʼoʼokkiʼ (Lucas 21:24). Yaan k-ilkeʼ le siete añosaʼ tsʼoʼok tu añoil 1914.
2. ¿Bix le yóokʼol kaab yéetel u modos le máakoʼob desde 1914?
U discípuloʼob Jesúseʼ tu kʼáatoʼobtiʼ: «¿Baʼax kun eʼesik way yanech yéetel táan u tsʼoʼokol tiʼ le yóokʼol kaabaʼ?» (Mateo 24:3). Jesúseʼ tu yaʼalajtiʼobeʼ le kéen káajak u beetik u reyil tiʼ u Reino Dios teʼ kaʼanoʼ yaʼab baʼaxoʼob kun úuchul way Luʼumeʼ. Por ejemploeʼ yaan u yantal guerraʼob, yaan u pʼáatal minaʼan baʼal utiaʼal jaantbil yéetel yaan u tíitkuba le Luʼumoʼ (xok Mateo 24:7). Le Bibliaoʼ u yaʼalmeʼ teʼ «tu tsʼook kʼiinoʼoboʼ» yoʼolal bix u modos le máakoʼoboʼ «istikyaj ken u máansil u kuxtal máak» (2 Timoteo 3:1-5). Desde 1914, chíikaʼan u yilaʼal táan u béeytal le baʼax ku yaʼalik le Bibliaoʼ.
3. ¿Baʼaxten jach kʼaschaj tuláakal baʼal le ka káaj u gobernar u Reino Dios teʼ kaʼanoʼ?
Le maʼ úuch káajak u gobernar Jesús teʼ kaʼanoʼ baʼatelnaj tu contra Satanás yéetel u demonioʼob. Le Bibliaoʼ ku yaʼalikeʼ Jesús ganarnaji yéetel Satanáseʼ «puʼul way luʼum paʼteʼ yéetel u ángeloʼobeʼ» (Apocalipsis 12:9, 10, 12). Satanáseʼ jach pʼujaʼan tumen u yojel taʼaytak u xuʼulsaʼal tiʼ, le oʼolal jach kʼaas yanil tuláakal yóokʼol kaab. Letiʼeʼ táan u beetik u sufrir tuláakal máak. Chéen baʼaleʼ u Reino Dioseʼ yaan u yutskíintik tuláakal baʼal.
UTIAʼAL A MAAS NAʼATIK
Koʼox ilik baʼax eʼesik u Reino Dioseʼ káaj u gobernar 1914 yéetel baʼax unaj u beetik máak ikil u yojéeltik leloʼ.
4. Le profecíaʼoboʼ ku yeʼeskoʼobeʼ u Reino Dioseʼ káaj u gobernar 1914
Dioseʼ tu beetaj u náaytik Nabucodonosor, u reyil Babilonia, junpʼéel profecía. Le baʼax náaytaʼab yéetel le baʼax tu tsolaj Danieloʼ ku yeʼesikeʼ le profecíaoʼ yaan baʼax u yil yéetel u gobierno Nabucodonosor bey xan yéetel u Reino Dios (xokeʼex Daniel 4:17). a
Xokeʼex Daniel 4:20-26, kéen tsʼoʼokkeʼ meyajnakteʼex le cuadro yaan u dibujoiloʼob utiaʼal a núukikeʼex le preguntaʼobaʼ:
-
A) ¿Baʼax tu náaytaj Nabucodonosor? (Ilawileʼex versículo 20 yéetel 21).
-
B) ¿Baʼax kun úuchul tiʼ le cheʼoʼ? (Ilawileʼex versículo 23).
-
C) ¿Baʼax kun úuchul kéen tsʼoʼokok le «siete añosoʼ»? (Ilawileʼex versículo 26).
Le cheʼ náaytaʼaboʼ yéetel u Reino Dios
LE PROFECÍAOʼ (Daniel 4:20-36)
Le táan u reinaroʼoboʼ
A) Junkúul cheʼ jach táaj kaʼanal
Ku xuʼulul u reinaroʼob
B) «Chʼakeʼex le cheʼoʼ» yéetel chaʼex u máan «siete años»
Ku kaʼa káajal u reinar
C) «Yaan a reinar tu kaʼatéen»
Bix yáax béeychajik:
-
D) ¿Máax tu representartaj le cheʼoʼ? (Ilawileʼex versículo 22).
-
E) ¿Baʼax kʼiin ka xuʼul u gobernar? (Xokeʼex Daniel 4:29-33).
-
F) ¿Baʼax úuch tiʼ Nabucodonosor le ka tsʼoʼok le «siete añosoʼ»? (Xokeʼex Daniel 4:34-36).
BIX YÁAX BÉEYCHAJIK
Le táan u reinaroʼoboʼ
D) Nabucodonosor u reyil Babilonia
Ku xuʼulul u reinaroʼob
E) Ka tsʼoʼok le año 606 t.t.J. Nabucodonosoreʼ chokochaj u pool, maʼ páajchaj u gobernar tu yáamil siete añosiʼ
Ku kaʼa káajal u reinar
F) Nabucodonosoreʼ kaʼa anchaj u naʼat yéetel káaj u reinar tu kaʼatéen
Bix kaʼa béeychajik:
-
G) ¿Máaxoʼob tu representartaj le cheʼoʼ? (Xokeʼex 1 Crónicas 29:23).
-
H) ¿Baʼax kʼiin ka xuʼul u gobernaroʼob? ¿Bix k-ojéeltik maʼ táan u gobernaroʼob le tiaʼan Jesús way Luʼumeʼ? (Xokeʼex Lucas 21:24).
-
I) ¿Baʼax kʼiin yéetel tuʼux jel tsʼaʼab le gobiernooʼ?
BIX KAʼA BÉEYCHAJIK
Le táan u reinaroʼoboʼ
G) U reyiloʼob Israeleʼ tu representartoʼob u Reino Dios
Ku xuʼulul u reinaroʼob
H) Ku xuʼulsaʼal Jerusalén, tu yáamil 2,520 añoseʼ maʼ anchaj mix juntúul rey israelitaiʼ
Ku kaʼa káajal u reinar
I) Jesúseʼ ku káajal u gobernartik u Reino Dios teʼ kaʼanoʼ
¿Bukaʼaj ku xáantal le siete añosoʼ?
Teʼ Bibliaoʼ yaan tekstoʼob ku yáantkoʼon k-naʼat uláakʼ tekstoʼob. Por ejemploeʼ tiʼ Apocalipsiseʼ ku yaʼalikeʼ tres tiempos y medio wa tres años y medioeʼ 1,260 días (Apocalipsis 12:6, 14). Leloʼ ku yeʼesikeʼ le siete tiempos wa siete añosoʼ 2,520 días. Yaan horaeʼ teʼ Bibliaoʼ junpʼéel kʼiineʼ u kʼáat u yaʼal junpʼéel año (Ezequiel 4:6). Le siete tiempos wa siete años ku yaʼalik u libroil Danieloʼ u kʼáat u yaʼal 2,520 años.
5. Tu añoil 1914 ka kʼexpaj yóokʼol kaab
Jesúseʼ tu yaʼalaj baʼaxoʼob kun sen úuchul le kéen káajak u gobernar teʼ kaʼanoʼ. Xokeʼex Lucas 21:9-11, kéen tsʼoʼokkeʼ ka tsikbaltikeʼex lelaʼ:
-
Tiʼ le baʼaxoʼob ku yaʼalik le profecíaoʼ, ¿máakalmáak táan a wilik u yúuchliʼ wa tsʼoʼok a wuʼuyik u yúuchliʼ?
Apóstol Pabloeʼ tu yaʼalaj bix u modos le máakoʼob tiʼ u tsʼook kʼiinoʼoboʼ. Xokeʼex 2 Timoteo 3:1-5, kéen tsʼoʼokkeʼ ka tsikbaltikeʼex lelaʼ:
-
Tiʼ le modos ku yaʼalik le tekstooʼ, ¿máakalmáak tsʼoʼok a wilik ku yeʼesik le máakoʼoboʼ?
6. Baʼax unaj k-beetik ikil k-ojéeltik táan u gobernar u Reino Dios
Xokeʼex Mateo 24:3, 14, kéen tsʼoʼokkeʼ ka tsikbaltikeʼex lelaʼ:
-
¿Baʼax meyajil eʼesik tsʼoʼok u káajal u gobernar u Reino Dios?
-
¿Bix jeʼel a táakpajal tiʼ le meyaj táan u beetaʼaloʼ?
U Reino Dioseʼ táan u gobernar, yéetel taʼaytak u gobernartik tuláakal le Luʼumaʼ. Xokeʼex Hebreos 10:24, 25, kéen tsʼoʼokkeʼ ka tsikbaltikeʼex lelaʼ:
-
Jach «naatsʼ yanil le kʼiin u yaʼalmaj Diosoʼ», yoʼolal leloʼ, ¿baʼax unaj k-beetik?
¿Baʼax jeʼel a beetik wa ka wojéeltik yaan baʼax jeʼel u salvartik u kuxtal u maasileʼ?
BAʼAX SUUK U KʼÁATAʼAL: «¿Baʼaxten u testigoʼob Jéeobaeʼ jach yaʼab u tʼaanoʼob tiʼ 1914?».
-
¿Baʼax jeʼel a núukikeʼ?
BAʼAX TSOʼOLI
Le profecíaʼob yéetel tuláakal le baʼax ku yúuchul way yóokʼol kaabeʼ ku yeʼesikeʼ u Reino Dioseʼ táan u gobernar. Le kéen k-kaʼans u Reino Dios tiʼ le máakoʼob bey xan le kéen xiʼikoʼon teʼ reuniónoʼoboʼ k-eʼesikeʼ k-creertik táan u gobernar.
Baʼax ta kanaj
-
¿Baʼax úuch ka tsʼoʼok le siete años ku yaʼalik u libroil Danieloʼ?
-
¿Baʼax eʼesiktech u Reino Dioseʼ káaj u gobernar 1914?
-
¿Bix jeʼel a weʼesik ka creertik táan u gobernar u Reino Dioseʼ?
KAN U MAASIL
Xok baʼax tu yaʼalaj jujuntúul máakoʼob kaʼanchajaʼan u xookoʼob, letiʼobeʼ tu yaʼaloʼobeʼ 1914 ka kʼexpaj u kuxtal máak.
«¿Baʼax kʼiin ka maas kʼaschaj u kuxtal wíinik?» (¡Aajkech!, abril tiʼ 2007)
Ilawil bix kʼexpajik u kuxtal juntúul máak yoʼolal le baʼax ku yaʼalik Mateo 24:14.
«Jach jatsʼuts in wilik kaʼach béisbol» (U Pʼíich Tulumil Kanan núm. 3 2017)
¿Baʼaxten k-aʼalik u profecíail Daniel capítulo 4, ku tʼaan tiʼ u Reino Dios?
¿Baʼax eʼesik de ke le «siete años» ku yaʼalik Daniel capítulo 4, tsʼoʼok tu añoil 1914?
a Xok le u tsʼook kaʼapʼéel xook ku taasik le jaats «Kan u maasil» ku chíikpajal teʼ xookaʼ.