LECCIÓN 32
¡Maʼ cayuni mandar Reinu stiʼ Dios!
Dede lu iza 1914 bizulú Reinu stiʼ Dios cayuni mandar guibáʼ. Laaca iza ca bizulú ca últimu dxi cayuni mandar binni guidxilayú. ¿Xiñee nánnanu zacá ni yaʼ? Lu lección riʼ zaziidiluʼ chupa cosa, primé, xi guníʼ Biblia chiguizaaca. Ne guiropa, ximodo bichaa xpiaʼ binni ne modo nabani dede lu iza 1914.
1. ¿Xi maca guníʼ Biblia?
Maca bizeeteʼ libru stiʼ Daniel zuzulú zuni mandar Reinu stiʼ Dios guiluxe si «gadxe tiempu» (Daniel 4:16, 17). Stale iza despué, bizeeteʼ Jesús de tiempu riʼ casi «tiempu stiʼ ca guidxi», para dxi guniʼbe ca diidxaʼ riʼ caʼruʼ guiluxe tiempu ca (Lucas 21:24). Casi chiguiziidiluʼ lu lección riʼ, biluxe gadxe tiempu ca lu iza 1914.
2. ¿Ximodo bichaa xpiaʼ binni ne modo nabani dede lu iza 1914?
Ca discípulo stiʼ Jesús gunabadiidxacaʼ: «¿Xi señal gusihuinni presencia stiluʼ ne dxi guiluxe guidxilayú riʼ?» (Mateo 24:3). Para gudxi Jesús laacabe zazaaca stale cosa despué de guzulú guni mandar lu Reinu stiʼ Dios. Bizeetebe de guerra, hambre ne xu roʼ (biindaʼ Mateo 24:7). Biblia maca guníʼ, pur modo gaca xpiaʼ binni «lu ca últimu dxi», jma «nadipaʼ zaca para binni guni huantar ni» (2 Timoteo 3:1-5). Ne dede lu iza 1914 cadúʼyanu zacá nabani binni.
3. ¿Xiñee jma feu modo nabani binni guidxilayú dede dxi bizulú cayuni mandar Reinu stiʼ Dios?
Despué de bizulú Jesús cayuni mandar lu Reinu stiʼ Dios, bizulú ti guerra guibáʼ, bicaalube Binidxabaʼ ne ca demonio stiʼ. Qué ñanda ñuni ganar Binidxabaʼ, Biblia ná: «Bilaacabe laa lu guidxilayú, laa ne ca ángel stiʼ» (Apocalipsis 12:9, 10, 12). Guizáʼ cadxiichi Binidxabaʼ purtiʼ nanna maʼ cadi candaa zanitilú. Cayuninabe ne caguítebe binni lu guidubi naca Guidxilayú. Nga runi, ¡zeʼ dxi jma feu modo nabani binni! Peru maʼ cadi candaa zuni chaahuiʼ Dios guiráʼ guendanagana rapa binni.
GUIZÍʼDIRUNU JMA
Guidúʼyanu xi prueba rusihuinni bizulú cayuni mandar Reinu stiʼ Dios dede lu iza 1914 ne xi rucaa ni laanu gúninu.
4. Rusihuinni ca profecía zeeda lu Biblia bizulú Reinu stiʼ Dios cayuni mandar lu iza 1914
Lu ti bacaandaʼ biluíʼ Dios Nabucodonosor, rey stiʼ Babilonia, xi chiguizaaca. Daniel guníʼ runi representar bacaandaʼ riʼ gobiernu stiʼ Nabucodonosor, ne laaca runi representar ni Reinu stiʼ Dios (laguundaʼ Daniel 4:17). a
Laguundaʼ Daniel 4:20-26. Despué laiquiiñeʼ recuadru ni zeeda lu sti yaza ca para guicábitu ca pregunta riʼ:
-
A) ¿Xi biʼyaʼ Nabucodonosor lu bacaandaʼ que? (Laguundaʼ versículo 20 ne 21).
-
B) ¿Xi zazaaca yaga que? (Laguundaʼ versículo 23).
-
C) ¿Xi zazaaca guiluxe si «gadxe tiempu» que? (Laguundaʼ versículo 26).
Yaga ni guníʼ xcaandaʼ Nabucodonosor ne Reinu stiʼ Dios
PROFECÍA (Daniel 4:20-36)
Dxi cayuni mandarbe
A) Ti yaga naroʼbaʼ
Dxi bisaana de guni mandarbe
B) «Laugá yaga ca» ne lagudii lugar «tidiʼ gadxe tiempu»
Dxi biguetaʼ biʼniʼ mandarbe
C) «Zabiguetaʼ zuni mandarluʼ»
Primé biaje guca cumplir ni:
-
D) ¿Tu biʼniʼ representar yaga que? (Laguundaʼ versículo 22).
-
E) ¿Padxí bisaana de guni mandarbe? (Laguundaʼ Daniel 4:29-33).
-
F) ¿Xi bizaacabe gudiʼdiʼ si «gadxe tiempu» que? (Laguundaʼ Daniel 4:34-36).
PRIMÉ BIAJE GUCA CUMPLIR NI
Dxi cayuni mandarbe
D) Nabucodonosor, rey stiʼ Babilonia
Dxi bisaana de guni mandarbe
E) Guyé xpiaaniʼ Nabucodonosor despué de iza 606 a.J. b ne maʼ qué ñanda ñuni mandar gadxe iza
Dxi biguetaʼ biʼniʼ mandarbe
F) Bibiguetaʼ xpiaaniʼ Nabucodonosor ne biʼniʼ mandar sti biaje
Guiropa biaje guca cumplir ni
-
G) ¿Tu biʼniʼ representar yaga que? (Laguundaʼ 1 Crónicas 29:23).
-
H) ¿Padxí bisaana de guni mandárcabe? ¿Ximodo nánnanu cadi cayuni mandárcabe dxi bibani Jesús lu Guidxilayú riʼ? (Laguundaʼ Lucas 21:24).
-
I) ¿Padxí ne paraa bibiguetaʼ biʼniʼ mandar Reinu stiʼ Dios?
GUIROPA BIAJE GUCA CUMPLIR NI
Dxi cayuni mandarbe
G) Ca rey ni biʼniʼ mandar guidxi Israel, biʼniʼ representárcabe gobiernu stiʼ Dios
Dxi bisaana de guni mandarbe
H) Binitilú Jerusalén lu iza 607 a.J. ne maʼ qué ñuu Rey de guidxi Israel para ñuni mandar 2,520 iza
Dxi biguetaʼ biʼniʼ mandarbe
I) Bizulú Jesús cayuni mandar guibáʼ casi Rey stiʼ Reinu stiʼ Dios lu iza 1914
¿Pabiáʼ rindaa gadxe tiempu que?
Caadxi textu zeeda lu Biblia racanécani laanu guiénenu xcaadxi textu. Casi lu Apocalipsis riete 1,260 dxi nga chonna tiempu arondaʼ (Apocalipsis 12:6, 14). Ne doble de laani nga gadxe tiempu o 2,520 dxi. Nuu biaje ora riete lu Biblia de ti dxi la? caniʼni de ti iza (Ezequiel 4:6). Nga runi zanda guininu, gadxe tiempu ni riete lu libru stiʼ Daniel: runi representar ni 2,520 iza.
5. Bichaa modo nabani binni dede lu iza 1914
Maca guníʼ Jesús ximodo zabani binni ora guzulú guni mandar. Laguundaʼ Lucas 21:9-11 ne laiquiiñeʼ pregunta riʼ para güitu diidxaʼ:
-
De guiráʼ ni biete lu ca versículo riʼ, ¿gunáʼ ni cayuuyaluʼ o huayunadiágaluʼ cayaca?
Apóstol Pablo laaca guníʼ ximodo zaca xpiaʼ binni lu ca últimu dxi riʼ. Laguundaʼ 2 Timoteo 3:1-5 ne laiquiiñeʼ pregunta riʼ para güitu diidxaʼ:
-
¿Ñee huayuuyaluʼ clase binni riete lu ca versículo riʼ la?
6. ¿Xi caquiiñeʼ gúninu ora gánnanu maʼ cayuni mandar Reinu stiʼ Dios?
Laguundaʼ Mateo 24:3, 14 ne laiquiiñeʼ ca pregunta riʼ para güitu diidxaʼ:
-
¿Xi dxiiñaʼ risaca rusihuinni maʼ cayuni mandar Reinu stiʼ Dios?
-
¿Ximodo zanda gacaneluʼ para gaca dxiiñaʼ riʼ?
Maʼ cayuni mandar Reinu stiʼ Dios, ne maʼ cadi candaa laaca zuni mandar ni lu guidubi Guidxilayú. Laguundaʼ Hebreos 10:24, 25 ne laiquiiñeʼ pregunta riʼ para güitu diidxaʼ:
-
¿Xi caquiiñeʼ gúninu ra guidúʼyanu «jma maʼ gaxha nuu dxi stiʼ Dios»?
Pa ñánnaluʼ xiixa ni zanda gulá sti binni, ¿xi ñúniluʼ?
NUU TU RINABADIIDXAʼ: «¿Xiñee nabé ruzeeteʼ ca testigu stiʼ Jehová iza 1914?».
-
¿Lii xi riníʼ íqueluʼ yaʼ?
XI BIZÍʼDINU
Rusihuinni ca profecía ne modo nabani binni maʼ cayuni mandar Reinu stiʼ Dios. Laanu laaca zanda gusihuínninu maʼ cayuni mandar Reinu stiʼ Dios pa guni predicarnu de laani ne pa qué guiáʼdxanu reunión.
Xi biziidiluʼ
-
¿Xi bizaaca biluxe si gadxe tiempu ni ruzeeteʼ libru stiʼ Daniel?
-
¿Xiñee runi creluʼ bizulú Reinu stiʼ Dios cayuni mandar lu iza 1914?
-
¿Ximodo zanda gusihuínniluʼ runi creluʼ maʼ cayuni mandar Reinu stiʼ Dios?
BIIYAʼ XIRUʼ ZANDA GUIZIIDILUʼ
Biiyaʼ xi guníʼ caadxi historiador de modo bichaa xquendanabani binni dede lu iza 1914.
«Dxi jma bihuinni zinitilú binni guidxilayú» (¡Gutaná! abril de 2007)
Biiyaʼ xi biʼniʼ ti hombre ora gunna profecía ni zeeda lu Mateo 24:14.
¿Ximodo nánnanu de Reinu stiʼ Dios nga caníʼ profecía ni zeeda lu capítulo 4 stiʼ Daniel?
«Padxí bizulú cayuni mandar Reinu stiʼ Dios (Primé ndaa)» (Torre stiʼ ni rapa, 1 de octubre de 2014)
¿Xi rusihuinni biluxe «gadxe tiempu» ni ruzeeteʼ capítulo 4 stiʼ Daniel lu iza 1914?
a Biindaʼ guionna ne guidapa revista ni riete lu sección «Biiyaʼ xiruʼ zanda guiziidiluʼ» ni zeeda lu lección riʼ.
b Ora gúʼyaluʼ cá a.J. la? caniʼni ante de ca dxi stiʼ Jesús. Ne ora gúʼyaluʼ cá d.J. la? caniʼni despué de ca dxi stiʼ Jesús.
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
