LESEN 33
Samting We Kingdom Blong God Bambae i Mekem
Kingdom blong God i rul finis mo i no longtaem bambae hem i mekem ol bigfala jenis long wol ya. Bambae yumi tokbaot sam long ol gudfala samting we yu save kasem taem Kingdom i rul.
1. ?Olsem wanem Kingdom bambae i putumbak pis mo jastis long wol ya?
Jisas we i King long Kingdom blong God, bambae i distroem ol rabis man mo ol gavman long faet blong Amagedon. (Revelesen 16:14, 16) Long taem ya, promes ya se: “I no longtaem, ol man nogud bambae oli lus,” bambae i kamtru. (Ol Sam 37:10) Jisas bambae i yusum Kingdom blong mekem pis mo jastis i stap long fulwol.—Ridim Aesea 11:4.
2. ?Taem wil blong God i kamtru, laef bambae i olsem wanem?
Aninit long rul blong Kingdom, “ol stret man bambae oli tekem wol ya i blong olgeta, mo bambae oli stap long hem blong olwe.” (Ol Sam 37:29) Tingbaot se yu laef long wan wol we evriwan i stret gud, oli lavem Jehova, mo oli lavlavem olgeta. I nogat wan we i sik, mo evriwan bambae oli laef olwe.
3. ?Kingdom bambae i mekem wanem afta we ol rabis man oli lus?
Afta we ol rabis man oli lus, Jisas bambae i rul olsem King blong 1,000 yia. Long taem ya, hem wetem 144,000 man we oli rul wetem hem, bambae oli halpem ol man long wol blong oli no moa gat sin mo kam stretgud olgeta. Long en blong 1,000 yia ya, wol ya bambae i kam wan naesfala paradaes, mo ol man we oli laef long taem ya oli haremgud tumas from we oli obei long ol loa blong Jehova. Nao Jisas bambae i givimbak rul i go long Papa blong hem Jehova. Mo Jehova bambae i “mekem we nem blong [hem] i tabu” fulwan. (Matiu 6:9, 10) Samting ya bambae i pruvum se Jehova i wan gudfala rula we i kea long ol man we hem i rulum olgeta. Nao bambae Jehova i distroem Setan, ol dimon, mo ol man we oli jusum blong rebel agensem rul blong hem. (Revelesen 20:7-10) Ol gudfala samting we Kingdom blong God bambae i mekem, bambae oli stap blong olwe.
DIGIM MOA
Faenemaot from wanem yumi save trastem se God bambae i yusum Kingdom, blong mekem ol promes long saed blong fiuja blong yumi, oli kamtru.
4. Kingdom bambae i finisim ol gavman blong man
“Sam man oli bos mo ol narafala man we oli stap aninit long olgeta, oli stap harem nogud.” (Prija 8:9) Jehova bambae i yusum Kingdom blong stretem ol problem mo putumbak jastis.
Ridim Daniel 2:44 mo 2 Tesalonaeka 1:6-8, mo tokbaot ol kwestin ya:
-
?Bambae Jehova mo Jisas i mekem wanem long ol rula blong wol wetem ol sapota blong olgeta?
-
Folem samting we yu lanem long saed blong Jehova mo Jisas, ?wanem i pruvum long yu se bambae tufala i mekem i stret long ol man?
5. Jisas i beswan King
Olsem King long Kingdom blong God, Jisas bambae i mekem plante samting blong halpem ol man blong hem long wol. Plei VIDEO blong luk olsem wanem Jisas i soemaot finis se hem i wantem mo i gat paoa blong halpem ol man.
Taem Jisas i stap long wol hem i soemaot samting we Kingdom bambae i mekem. Long lis we i stap, ?weswan blesing we yu yu wantem tumas blong luk? Ridim ol vas we oli stap long lis ya.
|
LONG WOL, JISAS I . . . |
LONG HEVEN, JISAS BAMBAE I . . . |
|---|---|
|
|
|
|
|
|
|
|
6. Kingdom blong God bambae i givim wan nambawan fiuja
Kingdom ya bambae i mekem evri samting we Jehova i wantem mekem fastaem long ol man, hemia blong oli laef olwe long wan paradaes long wol. Plei VIDEO blong luk olsem wanem Jehova i yusum Pikinini blong hem Jisas, blong mekem stamba tingting blong Hem i kamtru.
Ridim Ol Sam 145:16, mo tokbaot kwestin ya:
-
?Yu yu harem olsem wanem taem yu save se Jehova bambae i “givim samting we olgeta laef samting oli wantem tumas”?
SAM MAN OLI SE: “Bambae yumi winim ol problem blong wol, sipos yumi koperet gud.”
-
?Wanem ol problem we ol gavman oli no save winim, be Kingdom blong God bambae i winim?
SAMARI
Kingdom blong God bambae i mekem evri samting we hem i plan blong mekem. Bambae i mekem fulwol i kam paradaes, we i fulap long ol gudfala man we bambae oli wosipim Jehova gogo i no save finis.
Tingtingbak
-
?Olsem wanem Kingdom blong God bambae i mekem nem blong Jehova i tabu fulwan?
-
?From wanem yumi sua se Kingdom bambae i mekem ol promes blong Baebol oli kamtru?
-
?Wanem blesing blong Kingdom we yu wantem tumas blong luk?
FAENEMAOT
Faenemaot mining blong Amagedon.
Jekem ol samting we bambae oli kamaot long taem we Jisas i rul blong 1,000 yia, mo afta long taem ya.
“?Wanem Bambae i Hapen Long Jajmen Dei?” (Wajtaoa, 1 Oktoba 2012)
Luk olsem wanem ol famle oli save pijarem olgeta long taem we Kingdom i rul.
Insaed long haf ya “I Was Troubled by Many Questions,” lanem olsem wanem wan man blong politik i faenem ansa we hem i stap lukaotem.
“The Bible Changes Lives” (Wajtaoa, 1 Jenuware 2012)
Maet Yu Laekem Hemia Tu
KWESTIN WE PLANTE MAN OLI STAP ASKEM
Baebol Stadi Kos We Yu Save Mekem Wetem Ol Witnes Blong Jehova
Yu save yusum eni translesen blong Baebol blong mekem wan fri Baebol stadi kos wetem ol Witnes blong Jehova. Singaot ol famle mo ol fren tu blong oli joen wetem yu.
