ARUFUDAHANI 33
Le lunbei ladügüni Larúeihan Bungiu
Gumeseeli Larúeihan Bungiu agumadiha. Ani málühali adüga óunwenbu burí asansiruni ubouagu. Ariha wamá fiu katei buiti le gayaraabei hibihini lábugiñe Larúeihan Bungiu.
1. Ida luba ladügün Larúeihan Bungiu lunya ñein lan darangilaü luma irichaü ubouagu?
Lagumuchuba Hesusu—le Lurúeite Larúeihan Bungiu—hau sun gürigia wuribatiña luma hau gumadimatiña lidan wuribu le gíribei Arümahedón (Arufudúni 16:14, 16). Lídanme dan ligía, gúnfulihalime füramasei tídangiñeti Bíbülia le sunsuinagubei: “Málühaña ánhaña ua wuribatiña” (Sálumu 37:10). Layusurubei Hesusu larúeihan lun ñein lan darangilaü luma irichaü lidan sun Ubóu (aliiha huméi Isaíasi 11:4).
2. Ida luba ibagari danme le ladügǘn lugundan Bungiu ya ubouagu?
Lábugiñe lagumadihan Larúeihan Bungiu, “galagantehabei gürigia buítiña múa, haganóuba giñe lidan [lun] súnwandan” (Sálumu 37:29). Maame lubuidun ibagari danme le buíduhaña sun gürigia, hínsiñe ligíame Heowá houn ani hínsiñegua hagíame hámagua! Madagabei sandi luagu ni aban ani hawinwanduba sun gürigia lun súnwandan.
3. Kaba libiha Larúeihan Bungiu lárigiñeme lagumuchun hau wuribatiña?
Lárigiñeme lagumuchun Hesusu hau wuribatiña, larúeihaba luagu 1,000 irumu. Lídanme dan ligía, lídehaba Hesusu hama 144,000 ha lúnbaña harúeihan luma lun hesefurun gürigia luéi figóu, ua láamuga mégeiti hawagu. Danme lagumuchun dan ligía, ábanhalime lubuidun paraísu Ubóu, buin hau gürigia ha gúndaatiña ani ha gaganbaditiña lun lilurudun Heowá. Ábameti lagiribudagüdüni Hesusu arúeihani lun Heowá, le Lúguchi. Inebewatimahalime liri Bungiu Heowá sügǘ luéi lidan amu dan (Matéu 6:9, 10). Furanguhalime ua lan gumadimati buídutimati luéi Heowá, le óunigirubaliña ha lábugiñebaña larúeihan. Lárigiñe, ábame lagumuchun Heowá lau Satanási hama lumafianu luma lau furumiñeguarügü le agarabaaguti luagun Larúeihan (Arufudúni 20:7-10). Laduraruba lubuidun burí katei le lunbei libihini Larúeihan Bungiu lun súnwandan.
SIGÍ HUMÁ AFURENDEIRA
Ariha waméi ka lan uagu gayara lubéi wafiñerun layusurubei lan Bungiu Larúeihan lun lagunfuliruni füramasei burí le tídanbei Bíbülia lubá ámuñegü.
4. Lagumuchuba Larúeihan Bungiu lau hagumadihan gürigia
“Lun ladügün damichi lun gürigia líledi” layusurei gürigia “ubafu le luágubei” (Apurichihati 8:9). Layusurubei Heowá Larúeihan lun laransehani sun damichi le lanügübei marichaü le.
Aliiha huméi Danieli 2:44 luma 2 Tesalónikana 1:6-8, ábameti hayanuhan luagu álügüdahani burí le:
-
Kaba ladüga Heowá luma Hesusu, le Liráü, hau gumadimatiña luma hau sun ha ídehabaña hama?
-
Ida liña ladügün le hasubudirubei luagu Heowá luma luagu Hesusu lun hachoururuni richaguabei lan sun le lunbei hadügüni ani úabei lan himei hamá aban gürigia luéi aban?
5. Hesusu Urúeibei le buídutimabei
Kei Lurúeite Larúeihan Bungiu, ladügüba Hesusu saragu katei buiti hawagu lílana Ubóu. Ariha huméi BIDÉU lun harihini ida liña lan larufuduni Hesusu busén lan líderaguniña gürigia ani rúhali lan Bungiu ubafu lun lun ladügüni.
Sun burí katei le meha ladügübei Hesusu dan le ya lubéi ubouagu, arufuda lumuti le lunbei libihini Larúeihan Bungiu. Ka lídangiñe sun füramasei le lunbei warihini busentima hubéi harihini lagunfulirun? Aliiha huméi burí bérusu le ñein lubéi ladarirúa füramasei burí le.
|
DAN MEHA LE YA LUBÉI HESUSU UBOUAGU… |
LÚMAGIÑE SIÉLUGIÑE… |
|---|---|
|
|
|
|
|
|
|
|
6. Lanügüba Larúeihan Bungiu aban lubuidun ibagari woun ámuñegü
Lagunfuliruba Larúeihan Bungiu sunsuinagubei lau le labusenrubei Heowá houn gürigia lúmagiñe furumiñeti dan. Hawinwanduba lun súnwandan lidan aban paraísu ya ubouagu. Ariha huméi BIDÉU lun hasubudiruni ida liña lan layusuruni Heowá Hesusu, le Liráü, lun lagunfuliruni le labusenrubei.
Aliiha huméi Sálumu 37:4, ábameti hayanuhan luagu álügüdahani le:
-
Ida liña hasandiragun hungua lau hasubudiruni lagunfulirubei lan Heowá tayumahan hanigi sun gürigia?
LE HARIÑAGUBEI FIU GÜRIGIA: “Ánhawa íchiga súngubei luéigiñe wóubadina, gayaraabei waransehani sun turobuli le ubouagubei”.
-
Kaba turobuli laranseha Larúeihan Bungiu le lásiñarubei harúeihan gürigia aransera?
LE HAFURENDEIRUBEI
Lagunfulirubei Larúeihan Bungiu le labusenrubei ladügün. Ladügübei Ubóu le ábanme paraísu buin hau gürigia buítiña ha áhuduragutiña lun Heowá lun súnwandan.
Águyuguagüdüni
-
Kaba ladüga Larúeihan Bungiu lun inebewa lan liri Heowá?
-
Ka uagu chouru wabalin lagunfulirubei lan Larúeihan Bungiu füramasei le tídanbei Bíbülia?
-
Ka lídangiñe katei le lunbei libihini Larúeihan Bungiu busentima hubéi harihini lagunfulirun?
FURENDEI HUMÁ LANWOUN
Furendei huméi ka lan mini lubéi Arümahedón.
Ariha huméi kaba lan asusereda lidan luma lárigiñe Milu Irumu le lánina Larúeihan Hesusu.
“¿Qué pasará durante el Día del Juicio?” (La Atalaya, to lánina 1 lidan nefu-hati, irumu 2012)
Ariha humaña iduheñu ha aríagubaña houngua úara lidan Paraísu.
Aliiha huméi abahüdaguni luáguti ibagari le gíribei “Me inquietaban muchas preguntas”, lun harihini ida liña lan ladariruni aban polítiku ka lan láranibei turobuli le meha labusenrubei laranserun.
“La Biblia les cambió la vida” (La Atalaya, to lánina 1 lidan eneru, irumu 2012)
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
