Ewe Mwúún Kot a fen nennemenem iei. Ekiseló chék epwe féri watteen siwil wóón fénúfan. Sipwele káé ekkóch ekkewe mettóch mi múrinné ka tongeni ésúkúsúkú an epwe fis fán nemenemen ena Mwúún Kot.

1. Ifa usun ewe Mwúún Kot epwe atoto kinamwe me pwúngiéch wóón fénúfan?

Jesus i Kingen ewe Mwúún Kot, me epwe nieló aramas mi ngaw me arosaló mwúún aramas lón ewe maunen Armaketon. (Pwärätä 16:14, 16) Lón ena fansoun, epwe unusen pwénúetá án Paipel ei pwon: “Lon fansoun mochomoch echök ekewe aramasangau resap chüen nom.” (Kölfel 37:10) Jesus epwe áeá Mwúún Kot we le atoto kinamwe me pwúngiéch wóón unusen fénúfan.​—Álleani Aisea 11:4.

2. Epwe fet manawen aramas atun epwe pwénútá letipen Kot wóón fénúfan?

Fán nemenemen ewe Mwúún Kot, “ekewe chon pwüng repwe fanüeni ewe fanü o nonom won tori feilfeilachök.” (Kölfel 37:29) Anchangei óm nóm wóón eú fénúfan mi uren aramas mi pwúng, tongfengen, me pwal tongei Jiowa! Ese wor emén epwe semmwen, me meinisin repwe kúna manaw esemuch.

3. Met ewe Mwúún Kot epwe apwénúetá mwirin ninniilóón ekkewe mi ngaw?

Mwirin ninniilóón ekkewe mi ngaw, Jesus epwe wisen King lón úkúkún 1,000 ier. Lón ena fansoun, Jesus me chienan kewe 144,000, repwe álisi aramas wóón fénúfan le unuséchúló. Wesin ena 1,000 ier, fénúfan epwe wiliti eú paratis mi lingéch, me epwe ur ren chókkewe mi pwapwa pokiten ar álleasochisi án Jiowa kewe allúk. Mwirin, Jesus epwe eliwini ewe Mwú ngeni Seman we, Jiowa. Lón ena atun epwe kerán ina án iten Jiowa we “epwe pin” tori feilfeiló. (Mateus 6:9, 10) Epwele pwúngúló pwe Jiowa, i emén Sounemenem mi múrinné mi kan chúngú chókkewe mi nóm fán nemenian. Mwirin, Jiowa epwe nieló Satan, ekkewe timon, me meinisin chókkewe mi filatá le ú ngeni an nemenem. (Pwärätä 20:7-10) Mwúún Kot we epwe aworato mettóch meinisin mi unuséch wóón fénúfan me epwe ina usun tori feilfeiló.

 KÚTTAFICHI

4. Ewe Mwúún Kot epwe arosaló mwúún aramas

“Eman aramas a nemeni aramas o ariaföüür.” (Än Salomon Afalafal 8:9) Jiowa epwe áeá Mwúún we le amóeló pwúngúngaw.

Álleani Taniel 2:44 me 2 Tesalonika 1:6-8, me mwirin pwóróusfengen wóón ekkeei kapas eis:

• Met Jiowa me Néún we, Jesus, repwe féri ngeni ekkewe néúwisin mwú me chókkewe mi peniir?

• Seni minne ka kerán káé usun Jiowa me Jesus, pwata ka lúkú pwe ar féffér a pwúng, me rese eimwumwu?

5. Jesus i ewe King mi múrinné seni meinisin

Jesus, i Kingen án Kot we Mwú, me epwe féri chómmóng mettóch mi efeiéchú aramas wóón fénúfan. Fichi ei VIDEO pwe kopwe katol ifa usun Jesus a pwári an mochen álisi aramas me an tufichin álisiir ren án Kot álillis.

Ekkewe mettóch Jesus a féri atun a nóm fénúfan a pwári met án Kot we Mwú epwe apwénúetá. Menni lein ekkeei feiéch ka ákkáeúin ésúkúsúkú an epwe fis? Álleani ekkewe wokisin mi riri ngeni ekkena feiéch.

6. Mwúún Kot epwe atoto eú fansoun mi echipwér lón mwachkkan

 MENLAPAN

Ewe Mwú epwe apwénúetá minne Kot a tipeni. Epwe ewilaaló ei fénúfan ngeni eú paratis mi ur ren aramas mi múrinné, iir kewe repwe fel ngeni Jiowa tori feilfeiló.

Enniwili

• Ifa usun Mwúún Kot we epwe epinaaló iten Jiowa we?

• Pwata sia tongeni lúkú pwe Mwúún Kot we epwe apwénúetá án Paipel kewe pwon?

• Menni lein ekkewe mettóch mi múrinné ewe Mwúún Kot epwe féri ka fókkun mochen kúna?