NSUNZO 33
Omwene wa Mulugu Onakose Elobo Gani?
Omwene wa Mulugu ohiroma olamulela wirimu. Mohigonela onele okosa matxinjo manddimuwa velaboni yavati. Ndowe none dhilobo dhing’onovi dhaderetu dhinfuna okosa Omweneya.
1. Omwene wa Mulugu onawodhe dhavi odhana murenddele vina oligana mwilaboni?
Yezu, mwene wa Omwene wa Mulugu, onele watolotxa attu otene abure vina olamulela wa attu na koddo ya Armagedom. (Ovuhulela 16:14, 16) Ejo egapadduwa, nipikirhelo ntti na mBibiliani ninele wakwanihedheya: ‘Mudhidhi mung’onovi, nvuti oner’orimela.’ (Masalmo 37:10) Modhela Omwene wa Mulugu, Yezu onele odhana murenddele vina oligana mwilaboni mwetemwene.—Kengesa Izaiya 11:4.
2. Egumi yehu enakale dhavi efunelo ya Mulugu egakwanehedheya velaboni ya vati?
Kobuwela okalaga mwilaboni muli attu aderetu, animukwela Yehova vina ankwelana muttu na mukwaye! Jijuwene enapadduwe Mumweneni mwa Mulugu ‘attu apama anere okala anya a elabo, akalegemo masiku otene.’ (Masalmo 37:29) Kanakalewo muttu onakalege muredda vina otene anelege okalawo namukalakala.
3. Omwene wa Mulugu onakose eni attu abure agatolotxiwa?
Attu abure agatolotxiwa, Yezu onele olamulela mwari mwa vyaka 1,000. Mwari mwa mudhidhi obo, Yezu na attikitteliwi 144,000 anele olamulela vina anele wakamihedha attu okala oligana. Omamalelo wa vyaka 1,000, elabo yotene enele okala paraizu wokoddela, attu otene anele wagalala sabwani anelege wiwelela malamulo a Mulugu. Yezu onele omwiyihedha Babe Yehova Omweneya. ‘nzina na Mulugu ninele otxenihiwa.’ (Mateu 6:9, 10) Enele woneya wi Yehova mulamuleli onazuzumela attu. Yehova onele omutolotxa Satana na adomonyo aye, vina attu abale anasadduwele Omwene waye. (Ovuhulela 20:7-10) Modhela Omwene wa Mulugu, egumi enele okala yoligana mwa mpaddi wotene vina enele okala yamukalakala.
KASUNZAVI
Koona sabwaya enfwanyelela iyo okuluvela wi Mulugu onele olabihedha Omwene waye, wi akwanihedhe mapikirhelo otene a mBibiliani mwaha wa musogorho.
4. Omwene wa Mulugu onele otolotxa olamulela wa attu
Bibilia onloga wi, ‘attu ena anowapuja akwawa atotelaga otabuwa wawa.’ (Kohelét 8:9) Yehova onele olabihedha Omwene waye wi agomihena obure wotene.
Kengesa Daniyel 2:44 vina 2 Tesalónika 1:6-8, mugamala mutanaalele mavuzo aba:
-
Yehova na Yezu anakosena eni alamuleli vina akamihedhi awa?
-
Wubuwelaga dhotedhene dhisunziliwe mwaha wa Yehova na Yezu, dhinukamihedha dhavi okuluvela wi ottonga wawa onele okala woligana?
5. Yezu Mwene wofwanyelela
Ninga Mwene wa Omwene wa Mulugu, Yezu onele okosa dhilobo dhinji dhaderetu wila akamihedhena attu velaboni ya vati. Karumiha VIDIYU wi wone mukalelo onalabihedhe Yezu guru na owodha onvahile Mulugu wi akamihedhena attu.
Dhilobo dhikosile Yezu bali velaboni ya vati, yotagiha ya dhilobo dhinakosiye ninga mwene wa Omwene wa Mulugu. Maruriho gani anfwanyeya veneva agaziveliwe weyo wona akwanihedheyaga? Kengesani malebo a mBibiliani anloga mwaha wa mareliho aba.
|
VALIYE VELABONI YA VATI, YEZU . . . |
OVENYANA ODHULU, YEZU ONELE . . . |
|---|---|
|
|
|
|
|
|
|
|
6. Omwene wa Mulugu onele odhana murenddele musogorho
Omwene wa Mulugu, onele wavaha attu egumi yaderetu dhahene ninga munfunela Yehova. Attu anelege okala na mukalakala mparaizu velaboni ya vati. Karumiha VIDIYU wila wone enakose Yehova wi akwanihedhe efunelo yaye velaboni ya vati amulabihedhaga Yezu.
Kengesa Masalmo 145:16, mugamala mutanaalele nivuzo ntti:
-
Weyo oniwamo dhavi mwaha wa oziwa wi Yehova “onele wakwanihedha efunelo ya attu otene velaboni ya vati”?
ATTU ENA ANLOGA WI: “Muttu-muttu agakosa epaddi yaye, ninowodha ogomiha makattamiho a mwilaboni.”
-
Makattamiho gani anagomihe Omwene wa Mulugu, abuwene ahinwodheya ogomihiwa na olamulela wa attu?
OGWADDELA
Omwene wa Mulugu onele wira dhotedhene dhinfuna Mulugu wi dhireye. Onele okosiha wi elabo ekale paraizu, attu aderetu anele omwebedha Mulugu na mukalakala.
Kobuwela Dhisunziliwe
-
Omwene wa Mulugu onakoddelihe dhavi nzina na Yehova?
-
Ninfwanyelela eni orumela wi Omwene wa Mulugu, onele wakwanihedha mapikirhelo otene a mBibiliani?
-
Mwa dhilobo dhotene dhinakose Omwene wa Mulugu, elobo gani egaziveliwe weyo wona epadduwaga?
TAMELÁ ONONELAMO DERETU
Kaziwelamo txini entapulela Armagedom.
Kengesa enapadduwe mwari mwa vyaka 1,000 dha olamulela wa Yezu.
“O que Acontecerá no Dia do Julgamento?” (A Sentinela, 1 de Setembro, 2012)
Koona mutanaalelo wa anamudhi bali mparaizu.
Mwari mwa mutoma “Muitas perguntas me perturbavam,” Koona emukamihedhile mulobwana wakosa mpaddi wa politika ofwanya dhowakula dhaye.
