Atu ah Pathian Pennak nih a uk cang. A rauhhlan ah vawlei ah thlennak nganpi a tuah cang lai. Pathian Pennak uknak tangah hmuh dingmi thil ṭha cheukhat kong kha i ruah u sih.

1. Pathian Pennak nih vawleicung ah zeitindah daihnak le dinnak a umter lai?

Pathian Pennak Siangpahrang a simi Jesuh nih miṭhalo pawl le cozah pawl kha Armageddon raldohnak ah a hrawh cang hna lai. (Biathlam 16:14, 16) Caankhat te ah a tanglei Baibal biakam zong hi a tling cang lai: “Luklak ah miṭhalo cu an lo ko lai, na kawl hna hmanhah na hmu kho hna lai lo.” (Salm 37:10) Pennak thawngin Jesuh nih vawleicung ah dinnak le daihnak kha a umter cang lai.—Isaiah 11:4 rel.

2. Vawleicung ah Pathian duhnak tuah a si tikah nunnak cu zeidah a lawh lai?

Pathian Pennak uknak tangah “a dingmi cu ram chungah him tein an um lai i ram cu zungzal in anmah ta a si lai.” (Salm 37:29) Vawleicung pumpi ah mikip cu miding an si i Jehovah le pakhat le pakhat aa dawmi an si tiah na mitthlam ah cuanter hmanh. Ahohmanh an zaw ti lai lo i zungzal in an nung cang lai.

3. Miṭhalo pawl a hrawh dih hna hnuah Pathian Pennak nih zeidah a tuah lai?

Miṭhalo pawl hrawh an si hnuah Jesuh nih Siangpahrang in kum 1,000 chung a uk lai. Mah caan chungah Jesuh le amah he uktu a ṭuanṭi dingmi 144,000 nih vawleicung ah a ummi hna kha sualnak a ngei lomi le mitling an si nakhnga an bawmh hna lai. Kum thongkhat uknak a dih tikah vawleicung pumpi cu aa dawh tukmi paradis ah a cang lai. Mikip cu Jehovah nawlbia an ngaih caah an i nuam lai. Cun Jesuh nih Pennak kha a Pa Jehovah sinah a pek ṭhan lai. Mah tikah Jehovah “min thiang cu upat” a si lai. (Matthai 6:9, 10) Mah nih Jehovah cu a nawl a ngaimi hna a zohkhenhtu Uktu ṭha pakhat a si ti kha a langhter lai. Cun Jehovah nih Satan, khuachia le a uknak a ralchanhmi hna kha a hrawh dih cang hna lai. (Biathlam 20:7-10) Pathian Pennak nih a tuah dingmi thluachuah hna kha zungzal in an i nuamhpi lai.

 TAM DEUH IN HLATHLAI

4. Pathian Pennak nih minung cozah kha a donghter lai

“Minung uknak nih harnak a chuahter.” (Phungchimtu 8:9, NW) A Pennak thawngin Jehovah nih dinlonak vialte kha a donghter dih cang lai.

Daniel 2:44 le 2 Thesalon 1:6-8 rel law mah biahalnak hna hi i ruah u:

• Jehovah le a Fapa Jesuh nih minung cozah le anmah a bawmtu hna kha zeitindah an tuah hna lai?

• Na hlathlaimi ningin Jehovah le Jesuh tuahsernak cu a dingmi a si lai ti kha zeitindah na zumh khawh?

5. Jesuh cu a ṭha bikmi Siangpahrang a si

Pathian Pennak Siangpahrang in Jesuh nih vawleicung i mi pawl kha lam tampi in a bawmh hna lai. Jesuh nih mi pawl bawmh a duh hna ti le cutin tuah khawh awkah Pathian nih ṭhawnnak a pek ti a langhtermi kong kha hngalh awkah, VIDEO kha piah.

Jesuh vawleicung a um lio i a tuahmi thil nih Pathian Pennak nih a tuah dingmi thil kha a langhter. Mah lakah zei thluachuah dah hmuh lai naa ngaih bik? Mah thluachuah kong hna hngalh awkah cherhchanmi Baibal caang hna hi rel.

6. Pathian Pennak nih a ṭha tukmi hmailei a umter lai

 A TAWINAK

Pennak nih Pathian duhnak kha a tlinter lai. Vawleicung pumpi kha paradis ah a canter lai i mi nih Jehovah kha zungzal in an biak lai.

I Ruahṭi Ṭhannak

• Pathian Pennak nih Jehovah min a thian nakhnga zeitindah a tuah lai?

• Pathian Pennak nih Baibal biakam a tlinter lai tiah zeicah kan zumh khawh?

• Pathian Pennak nih a tuah dingmi thil ah zeidah hmuh lai naa ngaih bik?