JOKWA 33
Nje Janea la Loba di me̱nde̱no̱ bola
Janea la Loba di mábotea janea. Son a ponda, di me̱nde̱ wana mawengisan mande̱ne̱ o wase. Jombweye mambo ma bwam mō̱ weno̱ ná wenge̱le̱ owas’a Janea la Loba.
1. Ne̱ni Janea la Loba di me̱nde̱no̱ wana musango na te̱me̱ la sim o wase e?
Yesu, Kiṅ’a Janea la Loba, a me̱nde̱ ńamse̱ bato ba bobe na manea o bila ba Armagedon. (Bebīsedi 16:14, 16) O ni ponda, din dikaki la Bibe̱l di mabupe̱ di me̱nde̱ londa o mususu: “Son a ponda ninka ńabobe a si mabe̱ pe̱.” (Myenge 37:10) Tongwea na Janea la Loba, Yesu a me̱nde̱ bola ná musango na te̱me̱ la sim ba londe o wase ńe̱se̱ ná pum.—Langa Yesaya 11:4.
2. Ne̱ni longe̱ di me̱nde̱no̱ be̱ ponda jemea la Loba di me̱nde̱no̱ bolabe̱ o wase e?
Owas’a Janea la Loba, “bate̱m na sim ba me̱nde̱ sangwa [wase, nwt-F] na ja oten bebe be̱se̱.” (Myenge 37:29) Dutea te̱ ná we longe̱ o wase wuma bato be̱se̱ beno̱ nde bate̱m ná sim, ba to̱ndino̱ Loba, ba to̱ndo̱ne̱ pe̱! To̱ moto a si me̱nde̱ pe̱ boa, bato be̱se̱ ba me̱nde̱ pe̱ be̱ longe̱ o bwindea.
3. Nje Janea la Loba di me̱nde̱no̱ bola ke̱ di máńamse̱ bato ba bobe e?
Ombusa beńamsedi ba bato ba bobe, Yesu a me̱nde̱ janea ońola ikol’a mbu. O ni pambo a ponda, mo̱ na 144 000 ba maneye̱ mwemba na mo̱ ba me̱nde̱ jongwane̱ bato be o wase o timba ke̱nge̱nge̱. O su la ikol’a mbu, wase ńe̱se̱ e me̱nde̱ timba mudo̱led’a paradisi, bato be̱se̱ ba me̱nde̱ pe̱ be̱ bonam ońolana ba masengane̱ mambenda ma Yehova. Ombusa nika Yesu a me̱nde̱ timbise̱le̱ Sango ao Yehova janea, nde ‘dina la Yehova di [sangisabe̱, nwt-F]’ o dime̱ne̱ di si tano̱ di másangisabe̱. (Mateo 6:9, 10) E me̱nde̱ je̱ne̱ne̱ ná bwē ná Yehova e nde Mudied’a bwam nu mombweye̱ ba be owas’ao. Ombusa nika Yehova a me̱nde̱ bumbise̱ Satan, midī ma bobe na be̱se̱ bena ba po̱si o te̱nge̱ne̱ byanedi bao. (Bebīsedi 20:7-10) Longe̱ la ke̱nge̱nge̱ Janea la Loba di wanno̱ di me̱nde̱ so̱ be̱ o bwindea.
ALA O NJIBA
E̱ne̱ ońola nje jeno̱ ná di be̱ mbaki ná Loba a me̱nde̱ bolane̱ Janea lao o londise̱ makaki ma Bibe̱l me̱se̱ ońola kie̱le̱ ni maye̱.
4. Janea la Loba di me̱nde̱ bo̱le̱ manea ma bato
Moto ‘a manea nune̱ o sebea mo̱ mbeu a ńolo.’ (Mulangwedi 8:9) Yehova a me̱nde̱ bolane̱ Janea lao o bo̱le̱ di si te̱me̱ la sim.
Langa Daniel 2:44 na 2 Tesalonika 1:6-8, nde lo kwaleye pe̱ ońola min myuedi:
-
Nje Yehova na Mun’ao Yesu ba me̱nde̱no̱ bolane̱ manea ma bato na be̱se̱ ba masue̱le̱ babo̱ e?
-
Ne̱ni nje wokono̱ jombwea Yehova na Yesu e mabolano̱ wa mbaki ná nje ba me̱nde̱no̱ bola e te̱nge̱n e be̱ pe̱ bwam e?
5. Yesu e nde Kiṅe̱ ni buki ye̱se̱
Yesu, Kiṅ’a Janea la Loba, a me̱nde̱ jongwane̱ bato be o wase o mbadi jita. Ombwa SINIMA ná we̱ne̱ ná Yesu a málee̱ ná a be̱n ńo̱ngi o jongwane̱ bato na ná Loba a boli mo̱ ngińa o bola nika.
Mambo Yesu a bolino̱ ponda a tano̱ o wase ma lee̱ nje Janea la Loba di me̱nde̱no̱ bola. Oteten a minam mi mabupe̱, njika mo̱ o menge̱le̱no̱ tobotobo e? Langa epas’a Bibe̱l yena e lati na bonam te̱.
KE̱ E O WASE, YESU . . . |
LA MO̱Ń, YESU A ME̱NDE̱ . . . |
---|---|
|
|
|
|
|
|
|
|
6. Janea la Loba di me̱nde̱ wana kie̱le̱ ni maye̱ ńa mańaka
Janea la Loba di me̱nde̱ londise̱ mwano ma Yehova ma bebaedi ońola bato. Ba me̱nde̱ be̱ longe̱ o bwindea o paradisi o wase. Ombwa SINIMA ná we̱ne̱ ne̱ni Yehova eno̱ bolane̱ Mun’ao Yesu o londise̱ mwano mao.
Langa Myenge 145:16, nde lo kwaleye pe̱ ońola min myuedi:
-
Ne̱ni o masengano̱ o bia ná Yehova a me̱nde̱ ‘julise̱ be̱se̱ be longe̱ kaponda mpuli mabu’ e?
BATO BA MAKWALA NÁ: “Di be̱n te̱ manea ma bwam, je ná di bo̱le̱ mitakisan ma wase.”
-
Njika mitakisan mi buki manea ma bato o bo̱le̱, Janea la Loba mo̱ di me̱nde̱no̱ bo̱le̱ e?
EBONGOLO
Janea la Loba di me̱nde̱ bola nje Loba a te̱se̱no̱ ná di bole. Di me̱nde̱ timbise̱le̱ wase ńe̱se̱ paradisi ni londi na bato ba bwam bena ba me̱nde̱ jowe̱ Yehova o bwindea.
Ndimbisedi
-
Ne̱ni Janea la Loba di me̱nde̱no̱ sangise̱ dina la Yehova e?
-
Ońola nje jeno̱ ná di dube̱ ná Janea la Loba di me̱nde̱ londise̱ makaki ma Bibe̱l e?
-
Njika lambo diwo̱ Janea la Loba di me̱nde̱no̱ bola weno̱ o jenge̱le̱ tobotobo e?
BATA WASA
Okwa nje Armagedon e mapulano̱ kwala.
Langa mambo ma me̱nde̱ bolane̱ o pond’a Janea la ikol’a mbu la Yesu na o su lao.
“Nje e me̱nde̱ bolane̱ o buńa ba muka e?” (Njongo a Betatedi, Ńe̱te̱ki 1, 2012)
E̱ne̱ ne̱ni mbia meno̱ ná mi dutea ne̱ni meno̱ mwemba o paradisi.
O myango mi be̱n tema ná “J’étais tourmenté par de nombreuses questions,” e̱ne̱ ne̱ni mot’a politik mō̱ a so̱ino̱ malabe̱ mena a tano̱ a wasa.
“Bibe̱l e matukwa malonge̱” (Njongo a Betatedi, Dimo̱di 1, 2012)