33 NU GÈ NÒ
Nú E Boǹ Méné Bàrì É Náa
Boǹ Méné Bàrì dì ea gé bẹ̀l kátogóí. Póì ńkem̀ tṍó àla, àé palàge nyaaná bá ló boo kunukẽ̀í. Naa mè é ló bel boo sìgà gbò lé nú eo é láá ẹ̀bmà dẽè gè dé kpéè ló kèbá bẹbẹ̀l Bàrì.
1. Mósĩ́ deè ní e Boǹ Méné Bàrì é náa kọọ̀ fẹ́ẹ́-fẹẹ̀ ló nè lé bèèla á di boo kunukẽ̀í ẽ́?
Jíízọ̀s ea dú Méné boo Boǹ Méné Bàrì é kyọsĩ́ gbò pọ́lọ́ lab dògò nè gbò kpóó bẹbẹ̀l tṍó bé Àmágidòn. (Kùùà Nù 16:14, 16) Tṍóá zìgànù ea di mm̀ Kpá Káí ea kọọ̀: “Pọ́ì ńkem̀ tṍó àla, gbò pọ́lọ́ náa é di nà,” é gbóó mm-má. (Psalm 37:10) Tení dú ló Boǹ Ménéá, Jíízọ̀s é náa kọọ̀ fẹ́ẹ́-fẹẹ̀ ló nè lé bèèla á di boo kunukẽ̀í.—Bugi Àìzáíà 11:4.
2. Dùm é meà naa vàẹ tṍó e bùlà Bàrì ni nááá boo kunukẽ̀í ẽ́?
Kèbá bẹbẹ̀l Bàrì, “gbò lé lab dògò ní e bàé tõó boo kunukẽ̀í ẽ́, vaá bàé tõó boo dọ̀ọ̀mà dè-dè.” (Psalm 37:29) Ni doomà dẽe ló kọ ò diè mm̀ bàlà boo e kọ̀láá nen dú gbò lé lab dògò vaá bà vulè Jìhóvà nè dõòna gbò! Kpá ló tọ́ọ̀ nen náa é zọ, vaá kọ̀láá nen é tõó dùm dọ̀ dè-dè.
3. Éé ní e Boǹ Méné Bàrì é náa tṍó ea ni kyọsĩ́ gbò pọ́lọ́ lab dògò e?
Tṍó ea ni dú gè kyọ̀sĩ́ gbò pọ́lọ́ lab dògò lọ̀l, Jíízọ̀s é gbóó bẹ̀l dú Méné mm̀ 1,000 gbáá. Tṍóá, ẹlẹ nè 144,000 nen e bàé zọ́ẹ bẹ̀la é gbóó nvèè bá nè gbò e bà di boo kunukẽ̀í kọ bàá gbõoma. Tṍó e enè tõ̀ò gbááá ni íná kùbmà, boo kunukẽ̀í é gbóó dú páladaìs, vaá nyíè dénè nen é ẹ́ẹ boo béè kọọ̀ bà gé gbantṍ ló gbò log Jìhóvà. Tṍóá sõò, Jíízọ̀s é gbóó lọ̀à bẹbẹ̀l bá nè a Tẹ̀ ea dú Jìhóvà. “Béè [Jìhóvà é gbóó] di káí” èlmà bé ea dì naa. (Máátìù 6:9, 10) Dénè nen é gbóó nyimá kọọ̀ Jíhóvà dú lé Neǹ Ge Bẹ̀l ea ólò bùlà nú ea kil ló gbò ea gé bẹl boo. Jìhóvà é gbóó kyọ̀sĩ́ Sétàn, gbò zọ, nè kọ̀láá nen ea lọl togó kèbá a bẹbẹ̀l. (Kùùà Nù 20:7-10) Gbò lé dìtõ̀ò e Boǹ Méné Bàrì é dómá é di dọ̀ dè-dè.
KPÁÁ NÓ BỌ̀Ọ̀VẸ̀
Nó nú ea náa vaá èé láá dẹlẹ nyíé boo kọọ̀ Bàrì é ḿm̀-mè gbò zìgànù ea kil ló dì deèsĩ́ ea di mm̀ Kpá Káí tení dú ló a Boǹ Méné.
4. Boǹ Méné Bàrì é nveè kùbmà ló bẹbẹ̀l gbò nen
“Nen a bẹl nen mm̀ sĩ́deè ea nveèe kom ló.” (Ẹ̀klìzíástìs 8:9) Jìhóvà é tú a Boǹ Méné nvèèmà kùbmà ló pọ́lọ́ bèèlaí.
Bugi Dániẹ̀l 2:44 nè 2 Tẹ̀sàlónaikà 1:6-8, vaá ò gbóó aalai gbò bíbví:
-
Éé ní e Jìhóvà nè a Sã́áná Jíízọ̀s é náa gbò e bà gé bẹl nè gbò e bà nveè va sãa kúm ẽ́?
-
Mósĩ́ deè ní e gbò nú eo ni nó ea kil ló Jìhóvà nè Jíízọ̀s náa kọ ó àgala boo kọọ̀ bàé náa nu mm̀ sĩ́deè ea lelà vaá dú lé é?
5. Jíízọ̀s dú Méné ea dú lé lọ̀l vaá à lee
Dì belí Méné ea é bẹl boo Boǹ Méné Bàrì, Jíízọ̀s é náa gã́bug nú ea é dọ bélè nè gbò ea é bẹl boo. Bìlà VÍDIÒÍ kọbé ò mon bé e Jíízọ̀s ni zógè kọọ̀ à íèè tàn nè kpóó ea aa bá Bàrì gè nvèèmà bá nè gbò nen naa.
Tṍó e Jíízọ̀s beè di boo kunukẽ̀í, a beè naa gbò nú ea zógè gbò nú e Boǹ Méné Bàrì é náa. Mókà gbò tã́áná deè báí ní eo gé palàge ẹ̀bmà dẽe gè dé kpéè ló é? Bugi gbò dọ̀ Kpá Káí ea nyoone ea náa kọ é kpáá palàge dã́tẽ́ ló gbò tã́áná dee báá.
TṌÓ E JÍÍZỌ̀S BEÈ DI BOO KUNUKẼ̀Í, A BEÈ . . . |
GBẸÁ KÁÁLA, JÍÍZỌ̀S É BEÈ . . . |
---|---|
|
|
|
|
|
|
|
|
6. Boǹ Méné Bàrì é dómà kà lé dì deèsĩ́
Boǹ Méné Bàrì é ḿm̀-mè tóm̀ bùlà e Jìhóvà beè ié kilma ló gbò nen. Bàé tõó dùm dọ̀ọ̀mà dè-dè mm̀ páladaìs boo kunukẽ̀í. Bìlà VÍDIÒÍ kọbé ò nyímá bé e Jìhóvà gé tú Jíízọ̀s ea dú a Sã́áná siimá tóm mm̀ ge mm-mè a tóm̀ bùlà naa.
Bugi Psalm 145:16, vaá ò gbóó aalai nakà bíbví:
-
À tõó ní ló naa vàẹ gè nyimá kọọ̀ Jìhóvà é ‘ḿm̀-mè tàn dénè nú ea di dùm’ ẽ?
SÌGÀ GBÒ KỌ́Ọ̀: “Be è gbá siá tóm, èé láá kpoogè dee ló gbò tã̀àgã̀ ea di bàlà booí.”
-
Mókà gbò tã̀àgã̀ ní e Boǹ Méné Bàrì é kpóògè dee ló e bẹbẹ̀l gbò nen náa é láá kpoogè dee ló é?
NÚ E NI NÓ
Boǹ Méné Bàrì é náa gbò nú e Bàrì gbĩ́ kọ á naaá. Àé náa kọọ̀ boo kunukẽ̀í á dú páladaìs e áá gbò e bà gé fã Jìhóvà ní e bàé tõó boo dọ̀ dè-dè e.
Ge Òòa Boo
-
Mósĩ́ deè ní e Boǹ Méné Bàrì é náa kọọ̀ béè Bàrì á di káí é?
-
Éé ní ea náa vaá èé láá zìgà kọọ̀ Boǹ Méné Bàrì é ḿm̀-mè gbò zìgànù Bàrì ea di mm̀ Kpá Káí é?
-
Gbàà dénè gbò lé nú e Boǹ Méné Bàrì é náa, mókà ea di zẹ̀ẹ̀ ní ea é palàge tàn ni gè dé kpéè ló é?
KPÁÁ GBĨ́ TẼ́ LÓ
Gbĩ́tẽ́ ló nú e Àmágidòn dú.
Bugi nú ea kil ló gbò nú ea é nááá tṍó e Jíízọ̀s é bẹl mm̀ 1,000 gbáá nè tṍó ea ni bẹl lọ̀l.
“What Will Happen on Judgment Day?” (Kpá Tọ Kùdẽe Ló, September 1, 2012)
Nyimá bé e pá tọ é láá gbá dòòmà dẽe ló gbò tã́áná dee bá e bàé dé kpéè ló mm̀ Boǹ Méné Bàrì naa.
Mm̀ nòòtẽ́ ea togó bel kọ́ọ̀ “I Was Troubled by Many Questions,” nyimá bé e enè nen ea ólò naa uú boo kpóó ea gé bẹl beè láá mòn nú ea géè gbĩ̀ naa.
“The Bible Changes Lives” (Kpá Tọ Kùdẽe Ló, January 1, 2012)