ƝAAKWƐLƐI 33
Yii dɔɔlaa kaa pai gɛi
Yálá ŋɔ Tɔɔlaa aa gɔwɔtɔɔ yɛ ŋaawooɓolaa kɛ. Ɉu ho kea kwea li gaa pai mɛni tamaa maahwalən ɉii lɔi mɛi. Mɛni lɛlɛɛɠaa ya pɛli ə́i ɲɛi kɛ dɔwɔ gu daɠaa kaa.
1. Yálá ŋɔ Tɔɔlaa kaa pai pai ləi a liilaa da mɛni haŋaa kɛɛ lɔi mɛi ?
Zesu ŋɛi a Yálá ŋɔ Tɔɔlaa hu tɔɔmun gaa pai mɛniɲɔngɛnua, da yɛnɛɛ tɔɔlaaɠaa nwun na pilii Harmagedɔn kɔ hu (Kulɔ ponoŋa hɛɓɛ 16:14, 16). Naalowai, Biblə ŋɔ lolowoo ŋɛi laa kaa pai hwɛi kpɔ tɛin-tɛin : “ Naa wolo aa lɛɛ tiikpə, nui hwa Yálá maawiɛ, yɛ pili ” (Maatɛnɛ 37:10). Yálá ŋɔ Tɔɔlaa haalai Zesu kaa pai gɛi liilaa da mɛni haŋaa kɛɛ di lɔi mɛi laahwɛɛ (Esai 11:4 ɓo).
2. Yɛnɛɛ kaa pai kɛi ləi ɓɛlowai Yálá liiɓa kaa pai kɛi la lɔi mɛi ?
Ɓɛlowai Yálá ŋɔ Tɔɔlaa kaa pai ŋaawooɓolaa kɛi la, “ tələnmo nua kaa pai lɔi hɔlɔɓoi, diɛ hee ɉu a yələ kəlee mɛni ” (Maatɛnɛ 37:29). Ə́ kiliŋahiɛ lɔ mɛnii ŋɛi ɓa, yɛ́ ɓo yɛnɛɛ ta hu ɓɛi nu kəlee ŋɔ mɛni lɛlɛɛ laa, nu kəlee yɛ mɛni haŋaa kɛ, nu kəlee yɛ Zehova wɛlilakɛ, ə lɛɛ nu kəlee yɛ məlan nwɛlilakɛ ! Nuta lɔpee hwa kea too a ɲɔn ə lɛɛ nu kəlee kaa pai yiipoo yii kpɛɛ ho ma hɔlɔɓoi.
3. Lə ɓə Yálá ŋɔ Tɔɔlaa kaa pai gɛi mɛniɲɔngɛnua nwun na piliɛ pulu ?
Mɛniɲɔngɛnua nwun na piliɛ pulu, Zesu kaa pai tɔɔlaa kɛi kwəlan 1 000 yee mu. Naalowai tii hu, yaa da nu 144 000 ŋɛi pai tɔɔlaa kɛi, di kaa pai kpɔnmaa tɛɛ nua pɔ lɔi mɛi yii yaan nɛŋɛn və kɛ kea diɛ. Gwəlan 1 000 tii kpɛɛ pulu lɔi mɛi naa kəlee kaa pai kɛi a alizana lɛlɛɛ, ə lɛɛ nukanŋaa kəlee kaa pai kɛi kwəinɛɛ hu maahɔlɔɓo da lɛɛ Zehova ŋɔ tɔnŋaa mu. Yili pulu Zesu kaa pai pənəi ə dɔɔlaa tɛɛ Nan Zehova pɔ, ə lɛɛ Zehova ‘ laa maa kaa pai pənəi ə həɠəi ’ yɛ pələi ho ta kɛ li la (Matie 6:9, 10). Nu kəlee kaa pai gɔlɔn ɉii yɛ ma Zehova ɓə ɓaa ŋaawooɓokɛmun nɛlɛɛ, yii a ŋɔ nukanŋaa maaliihɛlɛn ɉee. Zehova kaa pai Sətana nwun na pilii da ŋɔ ɲinɛnŋaa, ə lɛɛ nua kpɔ di hwa gɛ di ho lɛɛ Zehova ŋɔ ŋaawooɓolaa mu (Kulɔ ponoŋa hɛɓɛ 20:7-10). Ɲɛnɛɛ maahəɠɛɛ tii Yálá ŋɔ Tɔɔlaa kaa pai pai la gaa pai lɛɛ laa a yələ kəlee.
Ə́ WƆ MƐNIKƆLƆNŊAA TA PƐLƐ MA
Mɛniɠaai kpɔ Biblə ə naakwəlamo gaa lə mɛni ɓa gwa pɛli laana guɔ ma Yálá kaa pai gəlee pɔ mɛni kɛi ŋɔ Tɔɔlaa haalai.
4. Yálá ŋɔ Tɔɔlaa kaa pai nukanŋaa di wɔ tɔɔlaaɠaa nwun na pilii
‘ Nu lonnii da hee di ɓəlaa mɛi diɛ di mɔnɔɓo ’ (Kilimaamun 8:9). Mɛniɠaa kpɔ hulu mɛniɠaa daa gala Zehova kaa pai gəlee kpɛtɛi ŋɔ Tɔɔlaa haalai.
Daniɛlə 2:44 da Tesalonikə veelɛ 1:6-8 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Lə ɓə Zehova da Non Zesu di kaa pai gɛi yɛnɛɛ tɔɔɓəlaa diɛ da di yee pɔɠaa ?
-
Mɛniɠaa yaa maakwɛli yɛ hwilɛn na Zehova da Zesu diɛ, da kpɔnmaa tɛɛ ləi ə́ pɔ yɛ́ pɛli laana a neelee yɛ́ ma di kaa pai tuwɔi a ɉaŋaa ?
5. Zesu kaa a Tɔɔmun yii veelɛ ho ma
Zesu ŋɛi a Yálá ŋɔ Tɔɔlaa hu tɔɔmun gaa tinaa pai mɛni lɛlɛɛ tamaa kɛi nukanŋaa diɛ lɔi mɛi. VIDIO kaa yɛ́ pɛli ɲaakaai yɛ́ ma Zesu aa nɛ yɛ ma kpɔnmaa leelee tɛɛ wɛli kaa ma nukanŋaa pɔ ə lɛɛ Yálá aa yili ŋɔ huwala-walalaa tɛɛ bɔ.
Mɛniɠaai Zesu ə gɛ ɓɛlowai ə kɛ la lɔi mɛi ə kɛ lɔ a mɛniɠaai Yálá ŋɔ Tɔɔlaa kaa pai gɛi gɔɔmaaɠaa. Mɛniɠaa ŋɛi moɔ ɓɛ ɉɛɠɛɛ, nɛlɛ kpɔ ɓə ə́ kaa bɔ ə́ gaa bɔ mɛni laa ə hwɛɛ ? Vɛlisɛɛɠaa ŋɛi ɓo, diɛi da kpɔnmaa tɛɛ gu pɔ gu gu wɔ mɛnikɔlɔnŋaa ta pɛlɛ ma yɛ hwilɛn na mɛinɛɛɠaa tii diɛ.
|
ZESU KƐƐ LƆI MƐI. . . |
ZESU KAA PAI LƐƐI YƏLƏKƆLƆN ɈU. . . |
|---|---|
|
|
|
|
|
|
|
|
6. Yálá ŋɔ Tɔɔlaa kaa pai yɛnɛɛ lɛlɛɛ tɛɛ gu pɔ
Ɲɛnɛɛ lɛlɛɛ ŋɛi Zehova ə maa kiliŋahiɛ kɛ nukanŋaa diɛ gɛɛ lɔi kpɛtɛi, Yálá ŋɔ Tɔɔlaa kaa pai ɲɛnɛɛ tii tɛɛ di pɔ. Di kaa pai yiipoo yii kpɛɛ ho ma hɔlɔɓoi alizana hu lɔi mɛi. VIDIO kaa, pələi Zehova kaa tɛɛ la Zesu kɔwɔi yɛ niiɓa mɛniɠaa laahwɛɛ, yɛ́ pɛli gaai.
Maatɛnɛ 145:16 ɓo, ə lɛɛ ka lono kɛ gɛɛmaalən ŋɛi mɛi :
-
Gɛ mɛni ɓa Zehova kaa pai nɔɔn-nɔɔn ɉɛnŋaa kəlee “ [pilɛi] a di liiɓa ”, lə ɓə yili a gɛ yɛ́ ?
NUTAƓAA DA KƐ KƐI MA : “ Gwa ŋaawooɓokɛnua leelee hɔlɔɓo, di kaa pai pɛlii nukanŋaa maamɛni kəlee ɲɛikulɔi. ”
-
Mɛni ləkɛɛɠaa ɓə Yálá ŋɔ Tɔɔlaa kaa pai pɛlii ɲɛikulɔi yii nukanŋaa di wɔ tɔɔlaa hwa pɛli ɲɛikulɔi ?
YII GU GALAN
Mɛniɠaa kpɔ Yálá kaa bɔ ŋɔ Tɔɔlaa ə gɛ, Yálá ŋɔ Tɔɔlaa kaa pai gəlee kɛi. Gaa pai lɔi mɛi naa kəlee kɛi a alizana ɓɛi nuai di wɔ mɛni lɛlɛɛ di kaa pai pɛlii Zehova ɓatoo laa a yələ kəlee da nwɔɔ.
Nɛɛ ə́ kili pɔ
-
Yálá ŋɔ Tɔɔlaa kaa pai pɛlii Zehova laa maa həɠəi ləi ?
-
Yii Biblə a mo lə mɛni ɓa gwa pɛli kɛi ma Yálá ŋɔ Tɔɔlaa kaa pai pɛlii gəlee laahwɛɛi ?
-
Mɛniɠaa Yálá ŋɔ Tɔɔlaa kaa pai gɛi nɛlɛ ɓə kpɔ ə́ kaa bɔ ə́ gaa ?
MƐNI TAKPƐLIƓAA
Gaa yii da kɛ ma Harmagedɔn.
“ Harmagedɔn kɔ hwilɛnŋaa lə ɓa ? ” (Hɛɓɛ yii gaa gwɛli yɛli ɓa)
Mɛniɠaa pai tɛɛi Zesu ŋɔ kwəlan 1000 tɔɔlaa kɛi lowai ə lɛɛ dɔɔlaa tii kpɛɛ pulu di maamɛni ɓo.
“ Lə ɓə pai tɛɛi giti tee holo ? ” (La Tour de Garde, 1er septembre 2012)
Mɛinɛɛɠaa tinaa pai kɛi Yálá ŋɔ tɔɔlaa mu gaa pələi pɛlɛ tɔnɔ mu nua da pɛli di kiliŋahiɛi la ma.
Gaa ɉɛɓɛi ŋɛi hu, yai mɛiwoo kaa kɛi ma “ Kɛɛmaalən damaa ə kɛi níí tɔlɔɓo, ” pələi politikə kɛmun da ə pɛli ŋɔ kɛɛmaalənŋaa mukulaaɠaa hɔlɔɓoi la.
“ Biblə a nua di wɔ yɛnɛɛ maahwalən ” (La Tour de Garde, 1er janvier 2012)
