LEKSION 33
Ano ang Himuon sang Ginharian?
Nagagahom na ang Ginharian sang Dios. Sa indi madugay, may himuon ini nga mga pagbag-o sa duta. Binagbinagon naton ang pila ka maayo nga butang nga matabo sa paggahom sang Ginharian.
1. Paano ibalik sang Ginharian sang Dios ang kalinong kag hustisya sa duta?
Laglagon ni Jesus, nga Hari sang Ginharian sang Dios, ang malaut ukon malain nga mga tawo kag mga gobierno sa inaway sa Armageddon. (Bugna 16:14, 16) Sa sina nga tion, matabo na ang ginpromisa sang Biblia nga “sa indi na lang madugay, madula na ang mga malauton.” (Salmo 37:10) Paagi sa Ginharian, ibalik ni Jesus ang kalinong kag hustisya sa bilog nga duta.—Basaha ang Isaias 11:4.
2. Ano ang mangin kabuhi kon matabo na ang kabubut-on sang Dios sa duta?
Sa paggahom sang Ginharian sang Dios, “ang mga matarong magapanubli sang duta, kag magapuyo sila sa sini sa wala sing katubtuban.” (Salmo 37:29) Imadyina nga ang tanan sa kalibutan matarong kag nagapalangga kay Jehova kag sa isa kag isa! Wala na sing nagamasakit, kag ang tanan mabuhi sing wala katapusan.
3. Ano ang himuon sang Ginharian sang Dios kon malaglag na ang tanan nga malauton?
Kon malaglag na ang mga malauton, magagahom si Jesus bilang Hari sa sulod sang 1,000 ka tuig. Sa sina nga tion, ang mga tawo sa duta mangin perpekto paagi sa bulig ni Jesus kag sang kaupod niya nga 144,000 nga manuggahom. Sa katapusan sang 1,000 ka tuig, ang duta mangin paraiso kag ang mga tawo mangin malipayon kay nagatuman sila sa mga kasuguan ni Jehova. Dayon ibalik ni Jesus ang paggahom sa iya Amay nga si Jehova. Sa sina nga tion, ‘mapakabalaan gid ang ngalan’ ni Jehova. (Mateo 6:9, 10) Pamatud-an gid sini nga si Jehova maayo nga Manuggahom nga nagaulikid sa iya mga sakop. Dayon laglagon ni Jehova si Satanas, ang mga demonyo, kag ang tanan nga wala nagapasakop sa Iya paggahom. (Bugna 20:7-10) Ang perpekto nga kahimtangan nga himuon sang Ginharian sang Dios magapadayon sing wala katapusan.
USISAA PA GID
Usisaon naton kon ngaa makasalig kita nga gamiton sang Dios ang Ginharian para matabo ang tanan nga promisa sang Biblia sa palaabuton.
4. Laglagon sang Ginharian sang Dios ang mga gobierno sang tawo
“Ginagamhan sang tawo ang iya isigkatawo sa iya kahalitan.” (Manugwali 8:9) Paagi sa Ginharian, dulaon ni Jehova ang tanan nga halit sang inhustisya.
Basaha ang Daniel 2:44 kag 2 Tesalonica 1:6-8, dayon binagbinaga ini nga mga pamangkot.
-
Ano ang himuon ni Jehova kag sang iya Anak nga si Jesus sa mga gobierno sang tawo kag sa mga nagasuporta sini?
-
Base sa imo natun-an parte kay Jehova kag kay Jesus, ngaa makasalig ka nga ang ila himuon husto kag matarong?
5. Si Jesus ang pinakamaayo nga Hari
Bilang Hari sang Ginharian sang Dios, madamo sing himuon si Jesus para sa kaayuhan sang mga tawo sa duta. Tan-awa ang VIDEO para makita mo nga gusto gid ni Jesus buligan ang mga tawo kag ginhatagan sia sang Dios sing gahom para mahimo ini.
Sang ari si Jesus sa duta, ginpakita niya kon ano ang himuon sang Ginharian. Diin sa sini nga mga pagpakamaayo ang gusto mo gid makita? Basaha ang mga bersikulo parte sa sina nga mga pagpakamaayo.
|
SANG ARI SI JESUS SA DUTA . . . |
SI JESUS ARA SUBONG SA LANGIT. SA ULIHI . . . |
|---|---|
|
|
|
|
|
|
|
|
6. Paagi sa Ginharian sang Dios mangin matahom ang palaabuton
Paagi sa Ginharian, himuon ni Jehova ang iya orihinal nga katuyuan para sa mga tawo. Magakabuhi sila sing wala katapusan sa paraiso sa duta. Tan-awa ang VIDEO kon paano himuon ni Jehova ang Iya katuyuan paagi sa iya Anak nga si Jesus.
Basaha ang Salmo 145:16, dayon binagbinaga ini nga pamangkot:
-
Ano ang masiling mo kay sa ulihi ‘ihatag ni Jehova ang handum sang tagsa ka buhi nga butang’?
KON MAGSILING ANG IBAN: “Kon magbuligay lang kita, masolbar gid naton ang mga problema sa kalibutan.”
-
Ano nga mga problema ang masolbar sang Ginharian sang Dios nga indi masarangan sang mga gobierno sang tawo?
SUMARYO
Himuon sang Ginharian sang Dios ang katuyuan sini. Mangin paraiso ang bilog nga duta nga pagaistaran sang maayo nga mga tawo nga magasimba kay Jehova sing wala katapusan.
Rebyu
-
Paano pakabalaanon sang Ginharian sang Dios ang ngalan ni Jehova?
-
Ngaa makasalig kita nga himuon sang Ginharian sang Dios ang mga promisa sang Biblia?
-
Ano ang gusto mo gid makita nga himuon sang Ginharian?
DUGANG NGA IMPORMASYON
Hibalua kon ano ang Armageddon.
Hibalua kon ano ang matabo sa tion kag sa tapos sang 1,000 ka tuig nga paggahom ni Jesus.
“Ano ang Matabo sa Adlaw sang Paghukom?” (Ang Lalantawan, Septiembre 1, 2012)
Tan-awa kon paano maimadyin sang mga pamilya ang ila kabuhi sa Paraiso.
Sa eksperiensia nga “Madamo Ako sing Ginpaligban nga Pamangkot,” hibalua kon paano nasabat ang mga pamangkot sang isa ka rebelde sa gobierno.
“Ang Biblia Nagapabag-o sang Kabuhi” (Ang Lalantawan, Enero 1, 2012)
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
