Ịpyị-Adịrahụ nya Ohe juwa kpeji lẹẹlẹẹ lẹ. Lụka o-kpii, ọ ka yẹ ang ịlẹpwụ nya odehe wuu da. Ahị kụ ẹhị yẹ ang ịnyịịla-ịnyịịla ịhyẹ ịlẹ kahị ka yẹhị rịrị gbe e-ekpeleji nya eji ọkpakpa nya Ịpyị-Adịrahụ nya Ohe wẹẹ.

1. Ányị Ịpyị-Adịrahụ nya Ohe à tị́ ka bwu tịrị okpunyi bala eje ọ-chị kpakpa ẹkpẹ wẹ odehe?

IJisọsị, Adịrahụ nya Ịpyị-Adịrahụ nya Ohe, ka tọ alabwẹla inyibyi bala eji ọkpakpa nya odehe ọlẹ ayịreji lụka nya ẹwụ nya Amagẹdọn. (Ọwụrụụ-wụrụ 16:14, 16) Ụka ọọwa, ọmwụ ọyẹyẹ ọlẹpwụ nya ịBayịbụụ ọlẹ ka họ jịra: “Ọ́ nọ pyịnyẹng kịlahị, alabwẹla onyobyi-í ka ji kaka.” (Eje Ọnyịịla 37:10) Bwula Ịpyị-Adịrahụ nya Ohe, iJisọsị ka họ okpunyi bala eje ọ-chị kpakpa ka ji ẹga myị́ ẹga nya odehe wuu.—Wa Ayịsaya 11:4.

2. Ányị ọhịhị à tị́ ka la ụka ká irya nya Ohe ka họ jịra odehe?

E-ekpeleji nya eji ọkpakpa nya Ịpyị-Adịrahụ nya Ohe, “alabwẹla ọnyịịla à ka la ọpyị ọlẹ lẹ, ị ka kụ am̀ gbe oyi myi oyi.” (Eje Ọnyịịla 37:29) Kụ irya jaabwọ kọ ka la nyọka hịhị odehe ọlẹ kọ myị̀ la alabwẹla ịnyịịla bala angịlẹ kị la ọháha ha iJihova kem wẹẹ!

3. Ịyẹ Ịpyị-Adịrahụ nya Ohe à tị́ ka họ ụka kị tọ alabwẹla inyibyi ayịreji kpá?

Ụka kị tọ alabwẹla inyibyi ayịreji kpá, iJisọsị ka kpeji lala Adịrahụ ẹ-ẹpwụ nya ẹka 1,000. Lụka ọọwa, iJisọsị bala angị 144,000 ịlẹ kị ka kpeji balọọ ka họ ká angịnyị ehe ka la kpẹẹkpẹẹ. Lụka nya ocheju nya eji ọkpakpa ọọwa, odehe wuu ka ri ịParadayịsị ọhụ́hị-hụ́hị, ọng myị́ ọng wuu tị ka chị ọkẹkẹnị chajị nyọlẹ kị ju ihi nya ehile nya iJihova. Ọọwa lẹ, iJisọsị à ka tịrị eji ọkpakpa ẹkpẹ ha iJihova Adamwụ lẹlẹ. IJihova ka “chị ịgọgọ ju ẹnyị [nyamwụ]” ụ-ụgbẹyị ọlẹ kọ họ ẹnẹnẹhẹ lẹka. (ỊMatiyu 6:9, 10) Ụka ọọwa, ọ ka la gede-gede ha ọng myị́ ọng wuu nyori iJihova ri Ọngọ Kpeji ọnyịịla ọlẹ kọ kaa kpahị ju angị ilekpeleji nyamwụ. Ọọwa, iJihova à ka tọ Ohe Onyobyi, alegu inyibyi, bala angịlẹ wuu kị chụ nyọka la egbeju-ọngịrị ta eji ọkpakpa nyamwụ ayịreji gbanggbang lẹlẹ. (Ọwụrụụ-wụrụ 20:7-10) Ang ịnyịịla-ịnyịịla ịlẹ ká Ịpyị-Adịrahụ nya Ohe ka họ ka juwa gboyi myị́ oyi.

 JẸ́ GỤ ỌỌWA

4. Ịpyị-Adịrahụ nya Ohe ka chị eji ọkpakpa nya angịnyị ehe eju

“Angịnyị kpa ọngịrị nyaa yẹ angịnyị ehe aanaa ilekpeleji nyaa ụhị.” (Ọngọlirya 8:9) Bwula Ịpyị-Adịrahụ nyamwụ, iJihova ka chị eje ọ-chị kpakpa-ka nya angịnyị ehe eju.

Wa ịDanẹlụ 2:44 bala 2 Ala ịTẹsalonika 1:6-8, kanụ ya ẹla u-uhye nya ịtọ ẹla ịlẹ:

• Ányị iJihova bala Ọnyị nyamwụ, iJisọsị à tị́ ka họ ẹ-ẹga nya eji ọkpakpa nya angịnyị ehe bala angịlẹ kị chẹkpẹ jwaa?

• Ányị ẹla ọlẹ ká jẹ́ u-uhye nya iJihova bala iJisọsị à tị́ ya ọ-jẹ́ myị̀myị̀ hang nyori ị ka họ ang myị́ ang wuu ụ-ụgbẹyị ọkpakpa?

5. IJisọsị à ri Adịrahụ ọlẹ kọ há gụ wuu ẹẹ

Lala Adịrahụ nya Ịpyị-Adịrahụ nya Ohe, iJisọsị ka họ ang lụmẹ-lụmẹ ha angịnyị ilodehe. Yẹ IFIM ọwẹ nyọka yẹ jaabwọ ká iJisọsị mẹjẹ nyori ọ tịtọ nyọka da angịnyị ụbwọ bala o-ri Ohe Oluhye ya ọngịrị họọ nyọka họ ịnyị.

Ang ịlẹ ká iJisọsị họ ụka kọ jam odehe ri ọ-họ mẹjẹ nya ang ịlẹ ká Ịpyị-Adịrahụ nya Ohe ka họ. Iyina lẹpwụ nya ahị ọwawa ịlẹ kị gu ẹnyị lẹẹ a tị́ yẹhị rịrị gbẹ kị ka họ jịra? Wa ụpwụ ịgọgọ ọlẹ kọ chẹkpẹ ju ọnyọnyọọnyị nya ahị ọwawa ịwẹ.

6. Ịpyị-Adịrahụ nya Ohe ka kpa ijuju ọnyịịla-ọnyịịla wahị

 ẸLỊYẸ A TỊ́ JẸ́?

Ịpyị-Adịrahụ nya Ohe ka họ ang ọlẹ kọ ri irya nyamwụ jịra. Ọ ka yẹ odehe kpátá ka ri ịParadayịsị ọlẹ kọ ka myị̀ la alabwẹla ịnyịịla ịlẹ kị ka gbịgba ha iJihova gboyi myị́ oyi.

Ẹlịyẹ A Tị́ Yụbwọ Chị?

• Ányị Ịpyị-Adịrahụ nya Ohe à tị́ ka chị ịgọgọ ju ẹnyị nya iJihova?

• Ịyẹ tị́ du kahị ka myị ọnụ nyori Ịpyị-Adịrahụ nya Ohe ka họ ehe ọchịchị ịlẹpwụ nya ịBayịbụụ jịra?

• Oyina kpangga lẹpwụ nya ahị ọwawa ịlẹ ká Ịpyị-Adịrahụ nya Ohe ka kpa wahị a tị́ yẹhị rịrị gbẹ kọ ka họ jịra?