Tohkohsrahi luhn God kol tari. Ke pacl na sa ma inge ac fah oruh eklac na luhlahp fin facluh. Kuht ac fah lutlutkihn ma wo ma Tohkohsrahi luhn God ac fah oruh.

1. Tohkohsrahi luhn God uh ac fah use mislac ac nuhnuhnkuh suwohs fin facluh fuhkah?

Jesus, suc Tohkohsrah se ke Tohkohsrahi luhn God, el ac fah kuhnahoslah mwet kuluk ac government nuhkewa ke mweun se pahngpahng Armageddon. (Fwackyuk 16:14, 16) In pacl sacn, wuhlelah se ma oasr in Bible inge ac fah ahkpwacyeyuck: “Ac tiac paht mwet koluk fah wacngihnlac.” (Psalm 37:10) Jesus el ac orekmakihn Tohkohsrahi uh in oasr mislac ac nuhnuhnkuh suwohs fin facluh nohfohn.​—Riti Isaiah 11:4.

2. Moul lasr ac fah oacna meac ke pacl se ma luhngse luhn God orek fin facluh?

Ye kolyuck luhn Tohkohsrahi luhn God, “mwet suwohswohs fah usrui acn uh [“facluh,” BMK], ac elos ac fah muhta fac ma pahtpaht.” (Psalm 37:29) Srihke nuhnkuh lah mwet nuhkewa suc muhta fin facluh elos suwohswohs, ac mwet nuhkewa inge luhngse Jeova ac sie sin sie! Wacngihn mwet ac fah sun mas, ac mwet nuhkewa ac fah moul ma pahtpaht.

3. Meac Tohkohsrahi luhn God ac fah oruh tukun mwet kuluk wacngihnlac?

Tukun mwet kuluk nuhkewa kuhnahosyucklac, Jesus el ac fah kol oacna sie Tohkohsrah ke lusen 1,000 yac. In pacl sacn, el ac mwet 144,000 suc ac fah weluhl kol ac fah kahsruh mwet uh in eklac mwet suwohswohs. Ke sahflahiyen 1,000 yac, facluh nohfohn ac fah eklac nuhke sie pacruhtais na kahto. Mwet nuhkewa ac fah engan mweyen elos ahkos masap luhn Jeova. Na Jesus el ac fah sang Tohkohsrahi nuh sin Pahpah tuhmwacl, Jeova. In pacl sacn, inen Jeova ac fah “ahkmuhtahlyeyuck.” (Matthew 6:9, 10) In pacl se inge, ac fah ahkpwacyeyuck lah Jeova el sie Mwet Kol na wowo suc nuhnkuh ac karihngihn mwet nuhkewa lal. Tukun pacl sac, Jeova el ac fah kuhnahosuhllah Satan ac demon nuhkewa lal, ac mwet nuhkewa sahyac suc sulaclah in lain kolyuck Lal uh. (Fwackyuk 20:7-10) Ma wo nuhkewa ma Tohkohsrahi luhn God uh ac fah oruh fin facluh ac fah oan na nwe tok ma pahtpaht.

 AHKYOHKYE LUTLUT LOM

4. Tohkohsrahi luhn God uh ac fah ahksahfyelah government nuhkewa luhn mwet uh

“Kuhtuh mwet uh fuhnmweti kuhtuh.” (Ecclesiastes 8:9) Jeova el ac orekmakihn Tohkohsrahi lal in ahkwacngihnyelah orekma sesuwohs uh.

Riti Daniel 2:44 ac 2 Thessalonica 1:6-8, ac tohkohyang sramsramkihn kihsen siyuck inge:

• Meac Jeova ac Jesus, Wen nahtuhl, ac fah oruh nuh sin government luhn mwet uh ac nuh selos suc kahsruh ma inge?

• Ma kom lotwelah kacl Jeova ac Jesus oruh kom in luhlahlfongi lah elos ac fah oruh ma wo ac ma suwohs fuhkah?

5. Jesus el Tohkohsrah suc wo emeet

Oacna Tohkohsrah ke Tohkohsrahi luhn God, Jesus el ac fah oruh ma pucspucs in kahsruh mwet fin facluh. Liye VIDEO se in lotwelah lah Jesus el luhngse na pwacye in kahsruh mwet uh, ac God el sang nuh sel kuh in oruh ma inge.

Ke pacl Jesus el oasr fin facluh, el ahkkahlwemye lah meac Tohkohsrahi uh ac fah oruh. Piyac kac mwe insewowo ma sihmlac inge kom luhngse na pwacye? Riti fuhs ekahsr inge ma ahkkahlwemye ke mwe insewowo inge.

6. Tohkohsrahi luhn God ac fah use pacl fahsruh na wo

 MA KUHT LOTWELAH

Tohkohsrahi luhn God uh ac fah ahkpwacyeye oakwuck luhn Jeova ke facluh. Ma inge ac fah oraclah facluh nohfohn nuhke sie pacruhtais ac mwet wo suc alu nuh sin Jeova ac fah muhta fac ma pahtpaht.

Kalweni

• Tohkohsrahi luhn God ac fah ahkmuhtahlye fuhkah inen Jeova?

• Efuh kuht kuh in luhlahlfongi lah Tohkohsrahi luhn God ac fah ahkpwacyeye kahs in wuhlelah in Bible?

• Piyac kac ma Tohkohsrahi luhn God uh ac fah oruh kom luhngse na pwacye in liye?