DILONGI 33
Mambu yina Kimfumu ya Nzambi kekokisa
Bubu yayi Kimfumu ya Nzambi kena kuyala. Ntama mingi ve yakesoba mambu awa na ntoto. Beto tadila ndambu ya mambu ya mbote yina nge kemona na ntangu Kimfumu yango keyadila ntoto.
1. Yinki mutindu Kimfumu ya Nzambi kevutula kiyenge mpe lunungu awa na ntoto?
Yesu, Ntinu ya Kimfumu ya Nzambi, kekufua bantu ya yimbi mpe baguvernema ya yinza na mvita ya Armagedoni. (Kusonga 16:14, 16) Na ntangu yango, nsilulu yayi melanda ya Biblia kekokisama na mvimba na yau: ‘Yamebikana kaka ntangu fioti, mpe bantu ya yimbi kevuanda diaka ve.’ (Nkunga 37:10) Na nzila ya Kimfumu, Yesu kesala nionso samu kiyenge mpe lunungu fuluka na ntoto.—Tanga Yezaya 11:4.
2. Yinki mutindu luzingu kevuanda ntangu luzolo ya Nzambi kesalama awa na ntoto?
Na yinsi ya luyalu ya Kimfumu ya Nzambi, ‘Bantu ya lunungu kebaka ntoto, mpe bakezinga mvula na mvula na zulu na yau.’ (Nkunga 37:29) Kanisa nge kena kuzinga na yinza yina bantu nionso kele ya lunungu mpe bantu nionso kezolaka Yehova mpe bakena kuzolana kati na bau! Muntu mosi ve kele na maladi, mpe konso muntu kezinga mvula na mvula.
3. Yinki Kimfumu ya Nzambi kesala na manima ya kufua bantu ya yimbi?
Na manima ya kufua bantu ya yimbi, Yesu keyala lokola Ntinu samu na bamvula 1000. Na ntangu yango, yandi mpe bantu 144000 yina keyala kintuadi na yandi, bakesadisa bantu bakuma ya kukoka na nionso kondua masumu. Na nsuka ya bamvula 1000, ntoto kevutukila kitoko na yau lokola paradiso yina mefuluka na bantu ya kiese yina kena baka mambote ya kuzitisa minsiku ya Nzambi. Yesu kevutula Kimfumu na maboko ya Tata na yandi, Yehova. Na ntangu yango ‘nkumbu ya Yehova [kekuma] nlongo’ kuluta na ntama. (Matayo 6:9, 10) Yakemonisa ti Yehova kaka kele Ntuadisi yina kekukibanzaka mbote samu na bisadi na yandi. Yehova kekufua Satana, bademo, mpe bantu yankaka yina ponaka kutelemina luyalu na yandi. (Kusonga 20:7-10) Mambu ya kitoko yina Kimfumu ya Nzambi kenata kezingila samu na mvimba mvimba.
KOTA NA MPINDA
Tadila samu na yinki beto lenda tula ntima ti Nzambi kesadila Kimfumu samu na kukokisa bansilulu nionso ya Biblia na diambu metadila bilumbu kena kuiza.
4. Kimfumu ya Nzambi kekatula baguvernema ya bantu
‘Muntu meyadila muntu samu na kumonisa yandi mpasi.’ (Longi 8:9) Na nzila ya Kimfumu na yandi, Yehova kekatula kukondua lunungu yango.
Tanga Daniele 2:44 mpe 2 Batesalonika 1:6-8, mpe na manima tadila biuvu yayi:
-
Yinki Yehova mpe Muana na yandi, Yesu, bakesala na baguvernema ya bantu mpe bantu yina kepesaka yau maboko?
-
Yinki mutindu mambu nge melonguka na diambu metadila Yehova mpe Yesu kena kundimisa nge ti bakesala mambu nionso na lunungu mpe na mutindu mefuana?
5. Yesu kele Ntinu ya mbote yina mefuana
Lokola Ntinu ya Kimfumu ya Nzambi, Yesu kesala mambu mingi ya mbote samu na bantu awa na ntoto. Tula VIDEO samu na kumona mutindu Yesu monisaka ntangu yandi vuandaka na ntoto ti yandi kele na nsatu ya kusadisa bantu mpe Nzambi pesaka yandi kilendo samu na kusala yau.
Ntangu yandi vuandaka awa na ntoto, Yesu pesaka beto diluaku ya kumona ndambu ya mambu yina Kimfumu ya Nzambi kesala. Yinki balusakumunu yina bametubila awa nge kele na nsatu ti yakokisama na nsualu? Tanga baverse yina kena kutubila balusakumunu yango.
|
NTANGU YANDI VUANDAKA AWA NA NTOTO, YESU . . . |
KATUKA NA DIZULU, YESU . . . |
|---|---|
|
|
|
|
|
|
|
|
6. Kimfumu ya Nzambi kenata mambote na bilumbu kena kuiza
Kimfumu kekokisa lukanu ya ebandeli ya Yehova samu na bantu. Bakezinga mvula na mvula na paradiso awa na ntoto. Tula VIDEO samu na kumona mutindu Yehova kena kusala kintuadi na Muana na yandi, Yesu, samu na kukokisa lukanu na Yandi.
Tanga Nkunga 145:16, mpe na manima tadila kiuvu yayi:
-
Yinki mutindu nge kena kukimona na kuzaba ti Yehova ‘kekokisa nsatu ya konso kisemua yina kele na luzingu’?
BANTU YANKAKA METUBA: “Kana beto nionso mesala kintuadi, beto lenda manisa mambu ya yinza.”
-
Yinki mambu Kimfumu ya Nzambi kemanisa, yina bimfumu ya bantu lenda manisa ve?
BUNKUFI
Kimfumu ya Nzambi kekokisa lukanu ya Nzambi. Yakesoba ntoto ya mvimba samu yakuma paradiso yina mefuluka na bantu yina kesambila Yehova mvula na mvula.
Mvutukulu
-
Yinki mutindu Kimfumu ya Nzambi kekumisa nkumbu ya Yehova nlongo?
-
Samu na yinki beto kendimaka ti Kimfumu ya Nzambi kekokisa bansilulu ya Biblia?
-
Na mambu nionso ya mbote yina Kimfumu ya Nzambi kenata, wapi yina nge kele na nsatu mpenza ya kumona?
SOSA
Sosa kuzaba yina Armagedoni zola tuba.
Tadila mambu yina kesalama ntangu Yesu keyadila ntoto samu na bamvula 1000 mpe yina kesalama na nsuka ya bamvula 1000.
“Nini ekosalema na Mokolo ya Kosambisama?” (Linɔ́ngi ya Mosɛnzɛli ya 1 Septembre 2012)
Tadila mutindu mabuta lenda yindula na mpinda kintuadi balusakumunu yina Kimfumu kenata.
Na kitini “Nazalaki na mituna mingi oyo ezalaki kotungisa ngai,” mona mutindu muntu ya politiki yina vuandaka na butomboki bakaka bamvutu na biuvu na yandi.
“Biblia ebongolaka bato” (Linɔ́ngi ya Mosɛnzɛli ya 1 Janvier 2012)
