Em̦õj an Aelõñ eo an Anij jino irooj im tõl. Ejjabto jãn kiiõ enaaj kõm̦m̦ani oktak ko rel̦l̦ap ilo lal̦ in. Jen etale jet iaan men ko rem̦m̦an kwõmaroñ reim̦aanl̦o̦k ñani ium̦win tõl eo an Aelõñ eo.

1. Ewi wãween an naaj Aelõñ eo an Anij bõktok aenõm̦m̦an im ekajet jim̦we ñan lal̦ in?

Jesus, Kiiñ eo an Aelõñ eo an Anij, enaaj ko̦kkure armej ro renana im kien ko an lal̦ in ilo tarin̦ae eo etan Armagedon. (Revelesõn 16:14, 16) Ilo naaj iien in, enaaj lukkuun jejjet kũtien kallim̦ur in ilo Baibõl̦ me ej ba: “Bwe jidik wõt iien, im eo enana enaaj jako.” (Sam 37:10) Ikijjeen Aelõñ eo, Jesus enaaj kõm̦m̦an bwe en wõr aenõm̦m̦an im ekajet jim̦we ilo aolepen lal̦ in.​—Riit Aiseia 11:4.

2. Enaaj ewi wãween mour ãlikin an jejjet ankilaan Anij kõn lal̦ in?

Ium̦win tõl eo an Aelõñ in Anij, “ro rem̦m̦an renaaj jolõt [lal̦ in], im jokwe ilowaan ñan indeeo.” (Sam 37:29) Pijaikl̦o̦k m̦õk am̦ mour ilo juon lal̦ me aolep armej rej kõm̦m̦ani men ko rem̦m̦an im jim̦we, im aolep rej yokwe Jeova im yokwe doon! Ejjel̦o̦k juon enaaj nañinmej, im aolep renaaj mour ñan indeeo.

3. Ta eo Aelõñ eo an Anij enaaj katõprake ãlikin an ko̦kkure ro renana?

Ãlikin an ko̦kkure ro renana, Jesus enaaj tõl ãinwõt Kiin ium̦win 1,000 iiõ ko. Ilo tõre in, e im ro 144,000 me renaaj tõl ippãn, renaaj jipañ armej ro ioon lal̦ bwe ren oktak im weeppãn im ejjel̦o̦k aer jerawiwi. Ilo jem̦l̦o̦kin tõre in, lal̦ in enaaj juon pedetaij eaiboojoj me eobrak kõn armej ro rem̦õn̦õn̦õ im rej bõk tokjãn jãn kien ko an Jeova. Innem Jesus enaaj karo̦o̦ll̦o̦k maroñ eo ñan tõl ñan eo Jemãn, Jeova. Ilo iien in, el̦apl̦o̦k an naaj “kwõjarjar [etan]” Jeova. (Matu 6:9, 10) Enaaj kam̦ool bwe Jeova ej juon ri-Tõl em̦m̦an me el̦ap an kea kõn armej ro doon. Innem, Jeova enaaj ko̦kkure Setan, enjel̦ ro renana, im jabdewõt armej me rej kããlõt ñan jum̦aik tõl eo an. (Revelesõn 20:7-10) Aolep men ko rem̦m̦an im jejjet me Aelõñ eo an Anij enaaj bũktoki renaaj pãd ñan indeeo.

 KAM̦WILAL̦L̦O̦K AM̦ MEL̦EL̦E

4. Aelõñ eo an Anij enaaj bõktok jem̦l̦o̦kin aolep kien ko an armej

“Armej ewõr an maroñ ioon bar juon bwe en kõjorrããne.” (Ekklisiastis 8:9) Ikijjeen Aelõñ eo an, Jeova enaaj n̦amejal̦an aolep jorrããn ko rej wal̦o̦k itok jãn an armej jab kwal̦o̦k ekajet jim̦we.

Riit Daniel 2:44 im 2 Tessalonika 1:6-8, innem bwebwenato kake kajjitõk kein:

• Ta eo Jeova im eo Nejin, Jesus, renaaj kõm̦m̦ane ñan kien ko an lal̦ in im ro rej rejetake er?

• Ikijjeen men ko em̦õj am̦ katak kaki kõn Jeova im Jesus, ewi wãween an men kein kaalikkar ñan eok bwe enaaj em̦m̦an im jim̦we kõm̦m̦an ko aerro?

5. Jesus ej juon Kiiñ elukkuun em̦m̦an

Ãinwõt Kiiñ in Aelõñ eo an Anij, elõñ men ko Jesus enaaj kõm̦m̦ani ñan jipañ armej ro ijin ioon lal̦. Kõjo̦e PIJAIN ALWÕJ eo ñan lale wãween ko em̦õj an Jesus kaalikkar bwe ewõr ippãn kõn̦aan eo ekoba kajoor im maroñ eo jãn Anij ñan jipañ armej.

Ke ear pãd ijin ioon lal̦ Jesus ear kwal̦o̦k ta ko Aelõñ eo enaaj katõpraki. Ewi iaan jeraam̦m̦an kein em̦õj kõllaajraki el̦ap am̦ reim̦aanl̦o̦k ñane? Riiti eoon ko rej kwal̦o̦k kõn jeraam̦m̦an kein.

6. Aelõñ eo an Anij enaaj bõktok juon ilju im jekl̦aj elukkuun em̦m̦an

 TARLEP IN KATAK EO ILO TUKADU

Aelõñ eo an Anij enaaj kajejjeti karõk ko an Jeova. Enaaj kõm̦m̦an bwe aolepen lal̦ in en erom juon pedetaij im obrak kõn armej ro rem̦m̦an me renaaj kabuñ ñan Jeova ñan indeeo.

Ãlij

• Ewi wãween an naaj Aelõñ eo an Anij kokkwõjarjare etan Jeova?

• Etke jemaroñ tõmak bwe Aelõñ eo an Anij enaaj kajejjeti kallim̦ur ko ilo Baibõl̦?

• Iaan aolep men ko rem̦m̦an Aelõñ eo enaaj katõpraki, ewi iaan men kein el̦aptata am̦ reim̦aanl̦o̦k in lo an jejjet kũtien?