Vuangana vua Njambi vuli laza na ku sika. Kaha vuovuno, vua ku alulula viuma ha mavu. Tu hilulenu vimo viuma via cili, vi vu ka tu lingila Vuangana vua Njambi.

1. Vuangana vua Njambi, vu ka hiluisa ciyulo na vuoloke mu mavu ose.

Yesu, Muangana ua Vuangana vua Njambi, a ka nongesa vakua vupi na vinguvulu mu ndzita ya Alemangendo. (Ku-Solola 16:14, 16) Ku ntsimbu yaco, ovu vupolofeto vu ka lipuisamo mu vutuntu: “Muomu kantsimbu lika, kaha mukua vupi ka li ka kalako.” (Visamo 37:10) Ku hitila mu Vuangana vuaco, Yesu a ka linga cose linga mu mavu ose ku ka kale ciyulo na vuoloke.—Tandenu Isaya 11:4.

2. Vati u ka fua muono, omo cizango ca Njambi va ka ci linga ha mavu?

Mu vu ka sika Vuangana vua Njambi, “Vakua vuviuke va ka suana cifuti kaha va ka kalamo ku miaka na miaka ya ya-ye.” (Visamo 37:29) Aci singaniekenu ku yoyela mu mavu a ku linga vose va kalamo, va pua vakua vuoloke kaha va lema Yehova na ku lilema umo na mukuavo! Na umo uahi a ka vavala, kaha vantu vose va ka yoya ku miaka yose.

3. Vika vu ka puisamo Vuangana vua Njambi mu nima ya ku nongesa vakua vupi?

Mu nima ya ku nongesa vakua vupi, Yesu a ka sika naua mu miaka 1000. Mu ntsimbu yaco, neni na vakua ku sika neni 144.000, va ka kuasa vantu vose ha mavu va ka pue va ku tantuluka. Ku ntsongo ya likulukazi lia miaka, mavu ose a ka pua citungu a ku sula na vantu va ndzolela muomu ve ku ononoka Yehova. Kaha mu nima yaco, Yesu a ka hiluisa Vuangana kuli Ise Yehova. Ku ntsimbu yaco, lizina lia Yehova va ka li lelesa mu vutuntu. (Mateo 6:9, 10) Kaha ci ka lisolola naua ha toma ngecize Yehova ua pua Muangana ua cili, uze ua haka seho ku vantu veni. Kaha a ka nongesa Satana na vandemone, na vose ve ku luisa ku sika ceni. (Ku-Solola 20:7-10) Viuma via ku tantuluka vi vu ka linga Vuangana vua Njambi, vi ka kalako ku miaka yose ya ya-ye.

 TANTEKEYENU VIKUAVO

4. Vuangana vua Njambi vu ka tundisako mavuangana ose a vantu

“Muntu umo ali na mpoko kuli mukuavo mu ku lipihisa ivene.” (Ekelesiaste 8:9) Ku hitila mu Vuangana vueni, Yehova a ka sungamesa ovu vuhenge.

Tandenu Ndaniele 2:44, na 2 Tesalonika 1:6-8, kaha simutuilenu ha vihula evi:

• Vika Yehova na Muaneni Yesu va ka linga ku mavuangana a vantu na vaze ve ku a hakuila?

• Vati viuma vi mua lilongesa ku tuala hali Yehova na Yesu via mi hana vusunga ngecize tangua va ka linga vuoloke?

5. Yesu ikeye ua fuila ku pua Muangana

Mu ku pua Muangana ua Vuangana vua Njambi, Yesu a ka linga via vingi mu ku kuasa vaze va a ka sika ha mavu. Talenu VIDEO linga mu mone vati Yesu ua muesa laza ngecize ua kala na cizango ca ku kuasa vantu kaha Njambi ua mu hana ngolo ya ku lingamo.

Mua kele hano ha mavu, Yesu ua muesele mu vundende viuma vi vu ka puisamo Vuangana vua Njambi. Vivezikiso vika vi va na tandanga hano, vi mua lavelela cikuma? Tandenu vinimbu vi na hatako vize via handeka ha vivezikiso viaco.

6. Vuangana vua Njambi vu ka linga viuma via ku komouesa ku lutue

 VI MU NA LILONGESA

Vuangana vua Njambi, vu ka puisamo vutumbe vuavuo. Vu ka alulula mavu ose ku pua citungu ca ku sula na vantu va cili va ka lemesa Yehova ku miaka yose.

Mpupulule

• Vati Vuangana vua Njambi vu ka lelesa lizina lia Yehova?

• Omo lia vika tu hasa ku kala na vusunga ngecize Vuangana vua Njambi vu ka puisamo vikulaheso viose via mu Mbimbiliya?

• Ha viuma viose via cili vi vu ka puisamo Vuangana vua Njambi, vika mua lavelelaho cikuma?