ToTeotsij iTlanauatijkayo ya pejki tekichiua ne iluikak, uan nechka kipatlas miak tlamantli ipan Tlaltipaktli. Ma tikitakaj tlake kuajkuali tlamantli kichiuas toTeotsij iTlanauatijkayo uan kenke uelis tijchias nopa tlamantli ika miak pakilistli.

1. ¿Tlake kichiuas toTeotsij iTlanauatijkayo uan kiampa kuali tiitstosej?

Ipan Armagedón, Jesús, katli eli Tlanauatijketl ipan toTeotsij iTlanauatijkayo, kintsontlamiltis tlanauatianij uan nochi maseualmej katli kichiuaj tlen amo kuali (Apocalipsis 16:14, 16). Ipan nopa tonali moaxitis tlen kiijtoua Biblia: “Ayok uejkauas noja itstosej axkuajkualmej” (Salmo 37:10). Ika nopa tlanauatijkayotl, Jesús kichiuas nochi maseualmej kuali ma itstokaj uan san ma mochiua tlen kuali (xijpoua Isaías 11:4).

2. ¿Kenijkatsa tiitstosej kema mochiuas tlen toTeotsij kineki ipan Tlaltipaktli?

Biblia kiijtoua kema toTeotsij iTlanauatijkayo tekichiuas, maseualmej katli “itstokej xitlauakej iixpa toTeko moaxkatisej nopa tlali”, uan “itstosej para nochipa” (Salmo 37:29). Ximoiljui kenijkatsa tiitstosej kema nochi maseualmej kichiuasej tlen kuali, kiiknelisej Jehová, moiknelisej, amo aka mokokos uan itstosej nochipa. ¿Mitspaktiskia tiitstos kema kiampa panos?

3. ¿Tlake panos kema toTeotsij iTlanauatijkayo ya kintsontlamiltijtos katli kichiuaj tlen amo kuali?

Kema ya kintsontlamiltijtosej katli kichiuaj tlen amo kuali, Jesús tlanauatis Mil xiuitl. Jesús uan nopa 144 mil kinpaleuisej maseualmej ayokmo ma kipiakaj tlajtlakoli. Kema tlamis nopa Mil xiuitl, nochi Tlaltipaktli elis se yejyektsi xochimili uan nochi maseualmej yolpakisej pampa kineltokasej Jehová itlanauatiljuaj. Jesús san tlanauatis Mil xiuitl uan teipa Jehová peuas tekichiuas. Ipan nopa tonali, moueyichiuas Jehová itoka (Mateo 6:9, 10). Uan nochi kiitasej Jehová kuali tlanauatia uan kinmokuitlauia itekipanojkauaj. Teipa, kintsontlamiltis Satanás, amo kuali ajakamej uan nochi katli kiijixnamikisej iTlanauatijkayo (Apocalipsis 20:7-10). ¡Nochi tlen toTeotsij iTlanauatijkayo kichiuas ipan Tlaltipaktli, uejkauas nochipa!

 KUALI XIMOMACHTI

4. ToTeotsij iTlanauatijkayo kintsontlamiltis nochi tlanauatianij

“Tlakamej tlauel kipiaj chikaualistli para mochiuilisej tlen axkuali se ika seyok” (Eclesiastés 8:9). Jehová kitekiuis iTlanauatijkayo uan kiampa kitlamiltis nochi tlamantli tlen amo kuali tlen kichijtokej tlanauatianij.

Xijpouakaj Daniel 2:44 uan 2 Tesalonicenses 1:6-8 uan xijnankilikaj ni tlajtlanili:

• ¿Tlake kichiuasej Jehová uan Jesús ika tlanauatianij uan maseualmej katli kinpaleuiaj?

• ¿Kenke tlen tijyekojtok tlen Jehová uan Jesús mitspaleuia ximotemachi tlen kichiuasej elis xitlauak uan kinextisej amo techikoitaj?

5. San Jesús kuali tlanauatis

Jesús, katli eli Tlanauatijketl ipan toTeotsij iTlanauatijkayo, kinpaleuis maseualmej ipan miak tlamantli. Xikitakaj nopa VIDEO kampa tikitas Jesús nelia kineki kinpaleuis maseualmej uan uelis kiampa kichiuas pampa Jehová kimakatok miak chikaualistli.

Nochi tlen Jesús kichijki kema itstoya ipan Tlaltipaktli kinextik tlake kichiuas toTeotsij iTlanauatijkayo. ¿Tlake tlamantli tlen namantsi tikitasej tlauel mitspaktiskia ma mochiua? Xijpouakaj nochi nopa textos kampa kiijtojtok tlen toTeotsij kichiuas.

6. ToTeotsij iTlanauatijkayo kichiuas kuali ma tiitstokaj

 TLEN TIMOMACHTIJKEJ

ToTeotsij iTlanauatijkayo kichiuas tlen Jehová kineki uan kichiuas Tlaltipaktli ma eli se xochimili kampa itstosej maseualmej katli kichiuasej tlen kuali uan nochipa kiueyichiuasej Jehová.

¿Tlake tijyekok?

• ¿Kenijkatsa toTeotsij iTlanauatijkayo kiuejkapantlalis Jehová iToka?

• ¿Kenke timotemachiaj toTeotsij iTlanauatijkayo kichiuas tlen Jehová techtenkauilijtok?

• ¿Tlake tlamantli tlen kichiuas nopa Tlanauatijkayotl tlauel mitspaktiskia ma mochiua?