Lo-lɛngɔ Gbia tɛ Nzapa abanda lingɔ kwa wɛ. Angbã dã ni na gbinyangbingɔ alo gba ge lɛ sese. Wa e ba anzɔ̃ kpale mɛ ni na hɛ̃ngɔ e.

1. Ngasia la Lo-lɛngɔ Gbia tɛ Nzapa na kpãngɔ siriri nga na mbilimbili ge lɛ gigi nɛ?

Yezo mɛ du gbia ti Lo-lɛngɔ Gbia tɛ Nzapa na kpɔngɔ asiɔ azi, wa lo nga na gbɛ̃ngɔ aguvɛrnɛma ti gigi olo mɛ zu na to ti Armagedone. (Suma 16:14, 16) Na ngoi niko ko, prɔfɛsi ti Ngbangɔ mɛ na tingɔ na seni: “Angbã yakere ta siɔ zo na diringɔ dungɔ da ma.” (Nzembo 37:10) Na lége ti Lo-lɛngɔ gbia tɛ lo, Yezo na lingɔ ya lɛ sese zu sĩ na siriri nga na mbilimbili.​—Di Yisaya 11:4.

2. Dungɔ lɛ ngɛ̃́ na tingɔ ngasia na ngoi mɛ se bɛ Nzapa na lingɔ tɛrɛ lo gɛ lɛ sese nɛ?

Ngoi mɛ Lo-lɛngɔ Gbia tɛ Nzapa na bandangɔ lingɔ kwa ge tise ko, “azi ti mbilimbili na mungɔ lɛ sese wa ala na dungɔ ka da bwai na bwai.” (Nzembo 37:29) Ni fa ya azi zu na dungɔ mbilimbili; wa ala zu na yengɔ Yehova nga na afɔ̃ la! Ta ngã na dungɔ da ma, wa e zu na dungɔ na dungɔ lɛ ngɛ̃́ ti bwai na bwai.

3. Ye mɛ Lo-lɛngɔ Gbia tɛ Nzapa na lingɔ na pɛ kpɔngɔ asiɔ zi nɛ?

Na pɛ kpɔngɔ asiɔ zi, Yezo na lɛngɔ gbia na pɛ bulu 1 000. Na ya abulu niko, lo nga na azi 144 000 mɛ na lɛngɔ gbia ndoni kɔi na lo, ala na lingɔ ya azi ti na tɛrɛ ti lengbingɔ. Kanda na nda lo-lɛngɔ gbia ti bulu 1 000 ko, lɛ sese zu na tingɔ Paradizo, wa azi zu na tingɔ na dengɔ bɛ na lo mɛ ya ala ndo tɔndɔ ndia tɛ Yehova. Yezo na diringɔ na Lo-Gbia hɛ̃ To lo Yehova. Wa “ili [Yehova na tingɔ] santo” na ndenge mɛndó ta adɛ li tɛrɛ lo ma. (Matie 6:9, 10) Azi zu na hĩngangɔ ya bo Lo-lɛngɔ Gbia tɛ Yehova la du nzɔ̃ni wa lo ndo hĩnga gwɛ̃ tɛ azi tɛ lo. Na pɛni, Yehova na hongɔ Satana, ademɔ̃ nga na azi zu ko la na kɛ̃ngɔ tɔndɔngɔ Lo-lɛngɔ Gbia tɛ lo. (Suma 20:7-10) Anzɔ̃ ye zu mɛ Lo-lɛngɔ Gbia tɛ Nzapa na lingɔ niko, ni na ngbãngɔ bwai na bwai.

 GI HĨNGANGƆ LO MƐNDƐ̃

4. Lo-lɛngɔ Gbia tɛ Nzapa na gbɛ̃ngɔ lo-lɛngɔ gbia tɛ azi

Ngbangɔ tɛnɛ ya: “Zo ndo lɛ gbia ndo fɔ̃ lo na lo ti hɛ̃ngɔ lo pɛnɔ.” (Masakoli 8:9) Na lége ti Lo-lɛngɔ Gbia tɛ lo, Yehova na hãngɔ kpale ti zangangɔ mbilimbili niko zingɔ.

Di Danyele 2:44 nga na 2 Tɛsalionikɛ 1:6-8, wa na pɛni hɛ̃ gbinya ti ahũnda olo mɛ:

• Ye mɛ Yehova na Yezo na lingɔ na lo-lɛngɔ gbia tɛ azi nga na azi mɛ ndo hɛ̃ ti la kaya lo-lɛngɔ gbia ni nɛ?

• Na bangɔ aye mɛ mɔ hĩnga na ndo Yehova na Yezo, nda mɛ mɔ lengbi ti yengɔ na bɛ mɔ kɔi ya ala na lingɔ lo na mbilimbili nɛ?

5. Yezo du nzɔ̃ gbia nvɛ̃ni

Yezo mɛ gbia ti Lo-lɛngɔ Gbia tɛ Nzapa na lingɔ nzɔ̃ kpale gba tɛrɛ azi ge lɛ sese. Ba VIDEO ti nɛngɔ ya mɔ hĩnga se mɛndó Yezo fa na ni ya na lége ti ngunu mɛ Nzapa hɛ̃ lo, lo na zangɔ azi ge lɛ sese.

Ngoi mɛndó lo ge lɛ sese ko, Yezo lindó aye mɛ ndo fa ye mɛ Lo-lɛngɔ Gbia tɛ Nzapa na lingɔ ni. Na ya akapa mɛ, omɛ wa la mɔ ndo kũ ya ali tɛrɛ lo iɔ wa? Di avɛrsɛ mɛ a hɛ̃ mɛ atɛnɛ tɛnɛ ti akapa niko.

6. Lo-lɛngɔ Gbia tɛ Nzapa na hɛ̃ngɔ azi nzɔ̃ dungɔ lɛ ngɛ̃́ na bi mɛ na gangɔ

 NA NDUNU NI

Lo-lɛngɔ Gbia tɛ Nzapa na lingɔ ya se bɛ lo ti na seni. Ni na lingɔ ya lɛ sese ti Paradizo, ndo mɛ awakwa tɛ Nzapa na dungɔ da bwai na bwai.

Bozongeli

• Lo-lɛngɔ Gbia tɛ Nzapa na lingɔ ya ili Yehova ti sãto ngasia?

• Nda mɛ elengbi ti yengɔ na bɛ e kɔi ya akapa mɛ kaya Ngbangɔ na tingɔ na seni nɛ?

• Na ya akapa zu mɛ Lo-lɛngɔ Gbia tɛ Nzapa na lingɔ ya ati na seni, omɛ wa la mɔ ndo kũ ya ali tɛrɛ lo iɔ wa?