EISHOMO 33
Eki Obukama bwa Ruhanga Buraakore
Obukama bwa Ruhanga bwatandikire kutegyeka. Juba nibwija kureetaho empinduka mpango omu nsi. Ka tureebe ebirungi ebi Obukama bwa Ruhanga buraareete, ebi orikubaasa kugirira ekihika.
1. Obukama bwa Ruhanga nibwija kugaruraho buta obusingye n’oburingaaniza omu nsi?
Yesu, Omugabe w’Obukama bwa Ruhanga, naija kucwekyereza ababi na gavumenti z’abantu, omu rutaro rwa Haramagedoni. (Okushuuruurwa 16:14, 16) Obwire obwo ku buraahikye, eki Baibuli erikuraganisa nikiija kuhikiirira, ngu “bwanyima y’akaanya kakye omubi [naija kuba] atakiriho.” (Zaaburi 37:10) Yesu naija kukoresa Obukama obwo kuhamya ngu ensi yaabamu obusingye n’oburingaaniza.—Shoma Isaaya 11:4.
2. Nihaija kubaho mbeera ki ebi Ruhanga arikukunda ku biraakorwe omu nsi?
Obukama bwa Ruhanga bwaba nibutegyeka ensi omu bwijwire, ‘abahikiriire nibaija kuhungura ensi, bagituuremu ebiro byona.’ (Zaaburi 37:29) Teera akashushani orikutuura omu nsi erimu abantu abahikiriire bonka, abarikukundana kandi abarikukunda na Yehova! Endwara niziija kuhwaho, kandi buri omwe naija kutuuraho ebiro byona.
3. Obukama bwa Ruhanga nibwija kuhikiiriza ki bwanyima y’ababi kucwekyerera?
Yesu yaaheza kucwekyereza ababi, naija kuba Omugabe kumara emyaka 1,000. Omu bwire obwo, Yesu n’abu araategyeke nabo 144,000, nibaija kuhwera abantu omu nsi kuba abahikiriire. Bwanyima y’emyaka 1000, ensi neija kuba eri paradiso nungi munonga, erimu abantu abashemereirwe abarikworobera ebiragiro bya Yehova. Bwanyima, Yesu naija kugarurira Yehova obutegyeki. Kandi eiziina rya Yehova ‘niriija kwezibwa,’ okukira obundi bwona. (Matayo 6:9, 10) Nikiija kuba kyayorekirwe butunu ngu Yehova n’omutegyeki murungi orikufayo aha bu arikutegyeka. Reero Yehova naija kucwekyereza Sitaane, baadaimoni, n’abandi abaraacwemu kuhakanisa obutegyeki bwe. (Okushuuruurwa 20:7-10) Embeera ezihikiriire eziraareetweho Obukama bwa Ruhanga niziija kugumaho ebiro byona.
SHWIJUMA GYE
Yetegyereze ahabw’enki nitubaasa kuhamya ngu Ruhanga naija kukoresa Obukama bwe kuhikiiriza ebi arikuraganisa aha biro by’omumaisho.
4. Obukama bwa Ruhanga nibwija kumaraho gavumenti z’abantu
“Omuntu naayekuriza ahari mugyenzi we kumukora kubi.” (Omubuurizi 8:9) Yehova naija kukoresa Obukama bwe kumaraho obutari buringaaniza.
Shoma Danieli 2:44 na 2 Abatesalonika 1:6-8, kubaasa kugarukamu ebibuuzo ebi:
-
Yehova n’Omwana we Yesu, nibaija kufubira bata gavumenti z’abantu n’abarikuzishagika?
-
Ebi oyegire ahari Yehova na Yesu nibikuhamiza bita ngu ebi baraakore nibiija kuba bihikire kandi biri eby’oburingaaniza?
5. Yesu niwe Mugabe ohikire kutegyeka
Yesu Omugabe w’Obukama bwa Ruhanga, naija kukora bingi ebiraagasire abantu omu nsi. Zaana VIDIYO kureeba oku Yesu yaaherize kworeka ngu aine amaani kuruga ahari Ruhanga, n’ekihika ky’okuhwera abantu.
Ebi Yesu yaakozire obu yaabaire ari omu nsi, bikaba nibyoreka eki Obukama bwa Ruhanga buraakore. Aha migisha egi ni guuha ogu oiniire ekihika? Shoma Ebyahandiikirwe, ebirikuhikaana n’emigisha egyo.
|
OBU YESU YAABAIRE ARI OMU NSI . . . |
YESU ARI OMU IGURU, . . . |
|---|---|
|
|
|
|
|
|
|
|
6. Obukama bwa Ruhanga nibwija kureetaho nyentsya nungi
Obukama nibwija kuhikiiriza gye ekigyendererwa eki Yehova yaabaire ainiire abantu omu kubanza. Nibaija kuguma omu nsi eraabe eri paradiso, ebiro byona. Zaana VIDIYO kureeba oku Yehova, arikukoresa Omwana we, Yesu kuhikiiriza ekigyendererwa kye.
Shoma Zaaburi 145:16, kubaasa kugarukamu ekibuuzo eki:
-
Nikikureetera kwehurira ota kumanya ngu Yehova naija ‘kuhaazya ebyetengo bya buri kintu kyona ekihuriire’?
ABAMWE NIBAGIRA NGU: “Twakwatanisa hamwe nitubaasa kuhezaho oburemeezi bw’ensi egi.”
-
Obukama bwa Ruhanga nibwija kwihaho buremeezi ki obu gavumenti z’abantu zitarikubaasa kwihaho?
OMU BUGUFU
Ruhanga naija kukoresa Obukama bwe kuhikiiriza ekigyendererwa kye. Nibwija kuhindura ensi yoona paradiso, eraabe erimu abantu barungi abarikuramya Yehova ebiro byona.
Okweijutsya
-
Obukama bwa Ruhanga nibwija kweza buta eiziina rya Yehova?
-
Ahabw’enki nituhamya ngu Obukama bwa Ruhanga nibwija kuhikiiriza ebi Baibuli erikuraganisa?
-
Aha bintu ebi Obukama bwa Ruhanga buraahikiirize ni kiiha eki oiniire ekihika?
JUMBURA EBINDI
Manya eki Haramagedoni kirikumanyisa.
Yetegyereze ebiraabeho omu myaka 1,000 Yesu yaaba naategyeka na bwanyima y’emyaka egyo.
“Nihaija Kubaho ki aha Izooba ry’Okucwa Orubanja?” (Omunaara gw’Omurinzi, Seputemba 1, 2012)
Reeba oku amaka garikubaasa kuteekateeka hamwe aha migisha eraareetweho Obukama omu biro by’omumaisho.
Omu kicweka “Nkaba Nyine Ebibuuzo Bingi,” reeba oku omuheekyera yaaboine eki yaabaire naasherura.
“Baibuli Neehindura Emitwarize y’Abantu” (Omunaara gw’Omurinzi, Jenwari 1, 2012)
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
