LESON 33
Samting wea Kingdom Bae Duim
Kingdom blo God hem rul finis. Klosap nao bae hem changem staka samting lo earth wea bae mekem laef gud tumas. Iumi bae storyim samfala gud samting wea iu savve luk forward for hem, wea Kingdom bae duim.
1. Wat nao Kingdom blo God bae duim for mekem earth garem peace and for evriwan kasem justice?
Lo datfala war Armageddon, Jesus, wea hem King lo Kingdom blo God bae finisim nogud pipol and olketa gavman blo man. (Revelation 16:14, 16) Lo datfala taem, disfala promis lo Bible bae kamap tru. Hem sei: “No longtaem, bae olketa nogud pipol i lus.” (Sams 37:10) Jesus bae iusim datfala Kingdom for mek sure evriwan lo earth garem peace and kasem justice.—Readim Aesaea 11:4.
2. Taem plan blo God for earth kamap tru, laef bae hao?
Taem Kingdom blo God hem rul, “bae olketa stretfala pipol i onam lan . . . an bae olketa stap long hem olowe.” (Sams 37:29) Tingim go firstaem, evriwan wea stap lo earth bae raeteous and evriwan bae lovem Jehovah and lovem each other! No eniwan bae sik, and evriwan bae laef olowe.
3. Wat nao bae Kingdom blo God duim bihaen olketa nogud pipol finis?
Bihaen olketa nogud pipol finis, Jesus bae King for 1,000 year. Lo datfala taem, hem and 144,000 wea rul witim hem bae helpem pipol wea stap lo earth for kamap perfect. Lo end blo datfala 1,000 year, full earth bae kamap paradaes and evri pipol bae hapi bikos olketa obeyim law blo Jehovah. Bihaen datwan, Jesus bae givim go bak Kingdom lo Dadi blo hem, Jehovah. Then nem blo Jehovah bae holy winim enitaem bifor. (Matthew 6:9, 10) Lo datfala taem, bae hem klia Jehovah hem gudfala ruler wea lovem pipol wea worshipim hem. Then, Jehovah bae distroem Satan and olketa demon, and pipol wea againstim rul blo hem. (Revelation 20:7-10) Olketa gudfala samting wea Kingdom blo God duim bae stap for olowe.
DIG GO MOA
Bae iumi storyim why iumi savve trustim hao God bae iusim Kingdom for mekem evri promis lo Bible abaotem future for kamap tru.
4. Kingdom blo God bae finisim olketa gavman blo man
“Taem man rulim narawan hem spoelem hem nomoa.” (Ecclesiastes 8:9, NW) Jehovah bae iusim Kingdom blo hem for finisim olketa nogud samting wea kamaot from diswan.
Readim Daniel 2:44 and 2 Thessalonica 1:6-8, then discussim tugeta olketa kwestin hia:
-
Wat nao bae Jehovah and Son blo hem, Jesus, duim lo olketa gavman blo man and pipol wea sapotim olketa?
-
Hao nao samting wea iu lanem abaotem Jehovah and Jesus mekem iu trustim tufala bae duim samting wea stret and followim justice?
5. Jesus hem best King
Jesus wea hem King lo Kingdom blo God bae helpem pipol lo staka samting. Pleim VIDEO for lukim Jesus hem pruvim finis hem laek for helpem pipol and God givim hem paoa for duim datwan.
Taem Jesus stap lo earth, hem duim olketa samting wea showim wanem Kingdom bae duim. Which wan lo olketa blessing lo next page nao iu luk forward tumas for hem? Readim olketa scripture wea stap for lane abaotem olketa blessing hia.
|
LO EARTH, JESUS . . . |
FROM HEVEN, JESUS BAE . . . |
|---|---|
|
|
|
|
|
|
|
|
6. Kingdom blo God bae mekem iumi garem gudfala future
Kingdom bae mekem iumi garem gudfala laef wea Jehovah laekem iumi for garem. Iumi bae laef olowe lo paradaes lo earth. Pleim VIDEO for lukim hao Jehovah iusim Son blo hem, Jesus, for mekem plan blo hem kamap tru.
Readim Psalm 145:16 (NW), then discussim tugeta disfala kwestin:
-
Hao nao tingting blo iu taem iu savve Jehovah bae “givim lo evri samting wea laef olketa samting wea olketa laekem”?
SAMFALA SAVVE TALEM: “If iumi evriwan waka tugeta, iumi savve stretem olketa problem lo world.”
-
Wat nao olketa problem wea Kingdom blo God bae stretem wea olketa gavman blo man no fit for stretem?
MAIN POINT
Kingdom blo God bae duim samting wea God laekem. Hem bae mekem full earth for paradaes and gud pipol nomoa bae stap insaed wea bae worshipim Jehovah for olowe
Review
-
Wat nao bae Kingdom blo God duim for mekem nem blo Jehovah holy?
-
Why nao iumi sure Kingdom blo God bae mekem olketa promis lo Bible for kamap tru?
-
Which wan lo olketa gud samting wea Kingdom bae duim nao iu luk forward for lukim?
FAENDAOT MOA
Read abaotem wat nao Armageddon.
Read abaotem samting wea bae happen lo taem wea Jesus bae rul for 1,000 year and lo end blo datfala 1,000 year.
“Wanem Nao Bae Happen Long Judgment Day?” (Wastaoa, October 1, 2012)
Lukim hao olketa famili savve imaginim hao olketa bae stap tugeta lo paradaes.
Lo disfala article, “Mi Garem Staka Kwestin,” read abaotem wanfala man wea againstim gavman faendem ansa for olketa kwestin blo hem.
“Bible Changem Laef Bilong Pipol” (The Watchtower, January 1, 2012)
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
