Reʼ runimaal rajaawriik i Dios kʼahchiʼ chik chi taqʼanik. Eh maʼ najt ta chik iraaj chi narukorsam i wach akʼal chi xa holohik chik. Naqilom juʼjun taqeh jalooj narubʼanam i taqʼanik wilih eh chi reʼ hat ne inawuyʼeej taqeh ruukʼ chuʼnchel akʼux.

1. ¿Chajariik narubʼanam i runimaal rajaawriik i Dios reh chi ne inwihʼik tuqkilal eh korik wach bʼanooj wach akʼal?

Pan qʼaqʼinik reh i Armagedón, reʼ Jesús reʼ Rey reh i runimaal rajaawriik i Dios narusacham wach taqeh kʼachareel maʼ holohik ta i kinaʼojbʼal eh jeʼ woʼ i kitaqʼaniik i winaq (Apocalipsis 16:14, 16). Chupaam i qʼiij reʼreʼ narojiik eloq wach i qʼorooj cho rubʼiral pan Santo Laj Huuj chi: «Reʼ taqe i yiibʼ wach kinaʼojbʼal ilookʼ insahchik kiwach» (Salmo 37:10). Chupaam i taqʼanik wilih reʼ Jesús narubʼanam chi reʼ tuqkilal eh i korik wach bʼanooj ne inwihʼik chi jun suut i akʼal (chawil Isaías 11:4).

2. ¿Nikʼwach chik i kʼacharik chi riʼsil i runimaal rajaawriik i Dios?

Chi riʼsil i runimaal rajaawriik i Dios, «reʼ taqeh korik wach kikʼux nakehchaam i wach akʼal eh ar nakikʼachariik chi juneliik» (Salmo 37:29, TNM). ¡Chakapaaj nikʼwach i kʼacharik noq chuʼnchel taqeh kʼachareel holohik chik i kinaʼojbʼal, inkikʼax i Jehová eh inkikʼax kiibʼ chi kiwach! ¿Maj korik chi qʼeʼ holohik? Maʼ ajwach ta chik naruyowabʼjiik eh chuʼnchel nakikʼachariik chi juneliik.

3. ¿Chajariik taqeh kooch naqilom chi riʼsil i runimaal rajaawriik i Dios noq maʼxta chik taqeh i maʼ holohik ta kinaʼojbʼal?

Noq reʼ Jesús rusacham chik kiwach taqeh maʼ holohik ta kinaʼojbʼal narutaqʼaniik chuwach i mil haabʼ. Chuwach i mil haabʼ reʼreʼ, reʼ Jesús eh taqeh 144.000 nakitobʼeem taqeh kʼachareel reh chi maʼ ajmahk ta chik taqeh eh chi ne inwihʼik keh i korik wach kʼacharik. Noq kuxinaq chik i jenaj mil haabʼ reʼreʼ, reʼ akʼal narubʼanam chi xa holohik chik, jenaj yeʼaabʼ nunjinaq chi kʼachareel suq kikʼux ruum chi inkinimaj i rukʼuhbʼaal i Jehová. Je’ reʼ noq reʼ Jesús naruqʼahsam reh i rajaaw Jehová i taqʼanik. Eh reʼ rubʼihnaal i Dios narusaqbʼisjiik wach chi jumpech (Mateo 6:9, 10). Narukʼutiniik chi korik chi reʼ Jehová holohik ajtaqʼaneel eh chi iruchaʼjeej chi korik i rutinamiit. Chi riij i reʼ, reʼ Jehová narusacham wach i ajYahm eh taqeh maʼ atoobʼ laj uxlabʼal eh xa ajwach inkiqʼehtaaj kiibʼ chuwach i rutaqʼaniik (Apocalipsis 20:​7-10). Reʼ taqeh holohik kamanik narubʼanam i runimaal rajaawriik i Dios reh juneliik.

 CHATZʼIR RIIJ I KʼAHCHIʼ ATIJEM

4. Reʼ runimaal rajaawriik i Dios narusacham wach i kitaqʼaniik i winaq

«Wilik taqe i wilik kajaawriik xa reʼ laʼ inkikoj chi jotʼbʼal keh i kas kichaaqʼ» (Eclesiastés 8:9). Reʼ Jehová ruukʼ i runimaal rajaawriik narukorsam wach taqeh maʼ korik ta bʼanooj rubʼanam i winaq.

Chawil taq i Daniel 2:​44 eh 2 Tesalonicenses 1:​6-8, eh tiqʼoroq taq chi riij:

• Jeʼ rukabʼ iruqʼor i texto, ¿chajariik narukʼulariik ruukʼ i kitaqʼaniik i winaq pan qʼabʼ i Jehová eh i Jesús?

• ¿Chʼiklik na akʼux chi reʼ Jehová eh i Jesús pan rubʼehel nakibʼanam i kamanik eh chi maʼ tokoom ta rilariik taqeh kʼachaeel nakibʼanam?

5. Reʼ Jesús jenaj Rey manlik chi qeh

Ruum chi reʼ Jesús Rey reh i runimaal rajaawriik i Dios, kʼih taqeh kamanik narubʼanam reh chi holohik i qakʼachariik ayuʼ wach akʼal. Chawil taq i VIDEO reh runabʼjiik chi reʼ Jesús xraaj rutobʼeem taqeh kʼachareel eh chi reʼ Dios xuyeew rajaawriik reh kitobʼjiik.

Reʼ taqeh xubʼan i Jesús noq xwihʼik wach akʼal jenaj ehtalil chi riij i narubʼanam i runimaal rajaawriik i Dios. Yuʼnaak chakoj rehtaal taqeh irubʼehsaj qeh i Dios pan Santo Laj Huuj, ¿ahaʼ wilik reh taqeh texto wilih inawaaj chi ne inooj eloq wach? Chawil chuʼnchel taqeh texto ahaʼ wiiʼ inreqarik taqeh irubʼehsaj qeh i Dios.

6. Ruum i runimaal rajaawriik i Dios holohik i qakʼachariik naruwihʼiik

 KʼOLOQ PAN AKʼUX

Reʼ runimaal rajaawriik i Dios narubʼanam chuʼnchel i rajwaam i Jehová. Narukorsam chi xa holohik chik i wach akʼal eh narubʼanam chi reʼ taqeh kʼachareel holohik i kinaʼojbʼal, ne inkiyeew ruloqʼil i Jehová chi juneliik.

Reʼ xkahnik pan akʼux

• ¿Chajariik narubʼanam i runimaal rajaawriik i Dios reh rusaqbʼisjiik wach i rubʼihnaal i Jehová?

• ¿Chaaj woʼ reet chʼiklik qakʼux chi reʼ runimaal rajaawriik i Dios narubʼanam chi ne inooj eloq wach chuʼnchel irubʼehsaj i Dios pan Santo Laj Huuj?

• Ruukʼ chuʼnchel taqeh i narubʼanam i runimaal rajaawriik i Dios, ¿ahaʼ wilik i xa inawaaj chik awilom i hat?