IREN MEHN KASUKUHL 33
Dahme Wehin Koht Pahn Wia?
Wehin Koht tepidahr kakaun. Ni ahnsou keren e pahn wiahda wekidekla laud kan nin sampah. Kitail pahn tehkpene ekei soahng mwahu kan me ke kak kasikasik sang kaundahn Wehio.
1. Ia duwen Wehin Koht eh pahn kapwurehdo popohl oh pwung pahrek nin sampah?
Sises, me wia Nanmwarkien Wehin Koht pahn ketin kasohrehla aramas suwed oh koperment suwed kan ni mahwen en Armakedon. (Kaudiahl 16:14, 16) Ni ahnsowo, inoun Paipel wet uhdahn pahn pweida: “Ahnsou keren aramas suwed kan pahn sohrala.” (Melkahka 37:10) Sises pahn ketin doadoahngki Wehio pwehn uhdahn kahrehiong wasa koaros nin sampah en mie popohl oh pwung pahrek.—Wadek Aiseia 11:4.
2. Ia pahn mwomwen mour ni ahnsou me kupwuren Koht pahn pweida nin sampah?
Pahn kaundahn Wehin Koht “me pwung kan pahn koukousoan nan sahpwo oh re pahn sapwenikihla [“mour,” NW] kohkohlahte.” (Melkahka 37:29) Medewehla momour nan sampah ehu me aramas koaros kin pwung, poakohng Siohwa oh kin poakpene! Sohte me pahn soumwahuda oh koaros pahn mour kohkohlahte.
3. Dahme Wehin Koht pahn wia mwurin me suwed kan ar kasohrala?
Mwurin me suwed kan ar pahn kasohrala, Sises pahn ketin kaunda nin duwen Nanmwarki erein sounpar 1,000. Erein ahnsowo, ih oh ienge meh 144,000 ko pahn sewese aramas akan nin sampah ren unsekla. Ni imwin sounpar kido, sampah pwon pahn wiahla paradais kaselel ehu oh aramas koaros pahn nsenamwahu pwehki ar kin peikiong sapwellimen Siohwa kosonned kan. Mwurin mwo, Sises pahn patohwan kapwurelahng Wehio rehn Semeo, Siohwa. ‘Mwaren Siohwa [pahn] sarawihla’ ni ahl ehu me saikinte wiawi sangete mahso. (Madiu 6:9, 10) Met pahn kadehdehda me Siohwa ketin wia Kaun mwahu men me kin ketin nsenohki sapwellime kan. Siohwa eri pahn ketin kasohrehla Sehdan, ngehn suwed kan oh meteikan me pilada ren uhwong sapwellime kaunda. (Kaudiahl 20:7-10) Wehin Koht pahn kihsang kahpwal en sampah koaros kohkohlahte.
KALAUDEHLA OMW ESE MET
Tehk dahme kahrehda kitail kak kamehlele me Koht pahn ketin doadoahngki sapwellime Wehio pwehn kapwaiada mehkoaros me Paipel inoukihda ong ni ahnsou kohkohdo.
4. Wehin Koht pahn katokehdi koperment en aramas akan
Paipel mahsanih: “Ekei aramas ahneki manaman, a ekei kin wie lokolok pahn ar manaman.” (Eklesiasdes 8:9) Siohwa pahn ketin doadoahngki sapwellime Wehio pwehn katokehdi soahng kan me kohsang wiewia sapahrek.
Wadek Daniel 2:44 oh 2 Deselonika 1:6-8, oh mwuri koasoiapene peidek pwukat:
-
Dahme Siohwa oh sapwellime Ohlo, Sises, pahn ketin wiahiong kaunen aramas akan oh me kin utung irail?
-
Ni omw medewe dahme ke sukuhlkier duwen Siohwa oh Sises, ke kamehlele me sapwellimara wiewia kan pahn pwung oh pahrek?
5. Sises ketin wia Nanmwarki mwahu men
Nin duwen Nanmwarkien Wehin Koht, Sises pahn ketin sewese aramas akan nin sampah ni soangen ahl tohto. Kilang KISIN KASDO pwe ken kilang ia duwen Sises eh ketin kasalehdahr me e kupwurki sewese aramas akan oh me Koht ketikihongehr manaman en wia met.
Soahng kan me Sises ketin wiahda nin sampah kasalehda dahme Wehin Koht pahn wia. Mehnia rehn kapai pwukat me ke keieu kasikasik? Wadek iren Paipel kan me koasoia duwen kapai pwukat.
|
NI SISES EH KETIKET SAMPAH, E . . . |
SANG NANLENG SISES PAHN . . . |
|---|---|
|
|
|
|
|
|
|
|
6. Wehin Koht pahn wahdo ahnsou kaselel ehu ni ahnsou kohkohdo
Wehio pahn kapwaiada dahme Siohwa ketin kupwurki ong aramas nin tapio. Re pahn mour kohkohlahte nan paradais nin sampah. Kilang KISIN KASDO pwe ken kilang ia duwen Siohwa eh kin ketin doadoahngki sapwellime Ohlo, Sises, pwehn kapwaiada kupwure kan.
Wadek Melkahka 145:15, 16, oh mwuri koasoiapene peidek wet:
-
Ia omw pepehm ni omw ese me Siohwa pahn ketin ‘kaitarala en me momour kan anahn koaros’?
EKEI ARAMAS KIN NDA: “Ma kitail koaros doadoahkpene, kitail kak kamwahwihala kahpwal en sampah.”
-
Soangen kahpwal dah kan me Wehin Koht pahn kamwahwihala me koperment en aramas akan sohte kak?
DAHME KE SUKUHLKIER
Wehin Koht pahn kapwaiada dahme Koht ketin kupwurki wia. Wehio pahn kaparadaisihala sampah pwon oh aramas mwahu kan me kin kaudokiong Siohwa pahn koukousoan loale kohkohlahte.
Kousapahl
-
Ia duwen Wehin Koht eh pahn kasarawihala mwaren Siohwa?
-
Dahme kahrehda kitail kak kamehlele me Wehin Koht pahn kapwaiada inoun Paipel kan?
-
Nanpwungen soahng mwahu kan me Wehio pahn wahdo, mehnia me ke keieu kasikasik?
PIL TEHK
Kilang dahkot Armakedon.
Tehk soahng kan me pahn wiawi erein oh mwurin sounpar 1,000 me Sises pahn ketin kakaun nin duwen Nanmwarki men.
“Dahme Pahn Wiawi ni Rahnen Kadeiko?” (Kahn Iroir, October 1, 2012)
Kilang ia duwen peneinei kan ar kak medewehla ar pahn mihmihpene nan Paradais.
Kilang ia duwen ohl emen me kin uhwong koperment eh diarada pasapeng me e raparapahki nan oaralap me koasoia “I Was Troubled by Many Questions.”
