Diospa Gobiernoga ña mandaunmi. Ñallami cai Allpata alichinga. Cai Gobierno imata pactachingarauta ricushun. Diospa Gobierno cungaraushcata cushiyasha chapangui.

1. Cai Allpaibi cungailla, alita rasha causangahua Diospa Gobierno imatata ranga

Armagedon guerraibi, Diospa Gobiernoibi mandac Rey Jesus, mana ali runagunata, runa gubirnugunata tucuchinga (Apocalipsis 16:14, 16). Chi timpuibi Biblia rimashca huin pactaringa: “Ñallami mana alita rac runaguna mana tiangauna” (Salmo 37:10). Jesus mandashca gobiernoibi, tucui sami runaguna cai Allpaibi cungailla, alita causangauna (Isaias 11:4​ta leipai).

2. Cai Allpaibi Dios munashca pactaricpi imasata causashun

Diospa Gobierno mandashcaibi, “alita raccunami allpata apingauna. Paigunami chibi huiñaibac causangauna” (Salmo 37:29). Caita yuyari, tucui runaguna alita rasha, Jehovata llaquisha, paigunapura llaquinacusha causangauna. Chi causanaga ima gustucharianga. Mana pihuas ungusha huañungachu, huin runaguna huiñaibac causangauna.

3. Mana ali runagunata tucuchishca huasha Diospa Gobierno imatata ranga

Mana ali runagunata tucuchishca huasha, Jesusca 1.000 huataraicu Mandac Rey tucunga. Chi timpuibi, Jesus y 144mil paihuan gobiernac runaguna, uchamanda lugaryangahua runagunata yanapangauna. 1.000 huata tucurishca huasha, cai Allpa gustu paraiso tucunga. Chi gustu paraiso Allpaibi huin runaguna Jehovata casusha cushilla causangauna. Chi huasha, Jesusca chi gobiernota paiba Yaya Jehovamallata cutichinga. Chi timpuibi, Diospa shuti Jehova mas balichishca anga (Mateo 6:9, 10). Casnami, Jehova mas ali mandac acta, pai llactata cuirashcata ricuchinga. Chi huasha, Jehovaga supaita, demoniogunata huinda tucuchinga. Chasnallata, paiba gobiernohuan contra tucuc runagunatas tucuchinga. Diospa Gobierno cushca sumac causanaga huiñairaicu manga (Apocalipsis 20:7-10).

 CAIMANDA MASTA YACHAI

4. Diospa Gobiernoga runa gobiernogunata huinmi tucuchinga

“Runaguna paigunapura mandanacuc ashcamanda turmintu causanaun” (Eclesiastes 8:9). Jehova paihua gobiernohuanmi runaguna tucui huaglichishcagunata alichinga.

Daniel 2:44 y 2 Tesalonicenses 1:6-8​ta leichi, huasha cai tapuigunamanda cuintanacuichi:

• Jehova y Jesus runa gubirnugunata imatata rangauna.

• Jehova y Jesus tucui runagunata alita, pariulla mandangaraushcata yachanaga canda imasata sintichitucungui.

5. Jesusca ali Mandac Rey man

Jesus Diospa Gobiernoibi mandac Rey ashcamanda, cai Allpaibi causac runagunaraicu aligunata rasha pactachinga. VIDEOTA ricuichi, Jesus runagunata yanapana munashcata yachangahua. Diosca chita pactachingahua paita ursata cushca.

Jesus cai Allpaibi rashcagunaga Diospa Gobierno ima pactachingaraushcatami ricuchira. Dios cusha nisha rimashcagunamandaga maican pactarishcata ricunata munangui. Dios cungaraushca tucui textogunata leichi.

6. Diospa Gobiernoga cushi causaita cunga

 IMATA YACHASHCANGUI

Diospa Gobiernoga pai munashcata pactachinga. Tucui Allpami paraiso tucunga. Chibi, ali runagunaga Jehovata huiñaibac adorangauna.

Yachashcata cuintai

• Diospa Gobierno Jehovahua shuti balichishca achun, imatata ranga.

• Imahuata quirinchi Diospa Gobierno Jehova cusha nishcata pactachingaraushcata.

• Diospa Gobierno cungaraushcamandaga, maicandata masta ricunata munangui.