Le Devleskero kraľišagos imar vladňinel. So neksigeder dikhaha, so šukar kerela la phuvaha. Akanake peske phenaha, so lačho the tut užarel tel adi vlada.

1) Sar le Devleskero kraľišagos visarela pale pre phuv o smirom the o lačhipen?

O Ježiš sar kraľis andro Devleskero kraľišagos odčhivela nalačhe manušen the lengere vladi andro baro mariben, so pes vičinel Armagedon. (Zjavenie 16:14, 16) A akor pes ačhena le Devleskere lava: „Imar nabut a o nalačhe imar na ena.“ (Žalm 37:10) O Ježiš prekal o kraľišagos kerela, kaj dojekh amendar te dživel bije dar a kaj te zadživel ča lačhipen. (Pregen Izaiáš 11:4)

2) Savo dživipen ela pre phuv, te pes kerela oda, so kamel o Del?

Tel Devleskero kraľišagos „o spravodliva manuša chudena e phuv a dživena pre late pro furt.“ (Žalm 37:29) Phand o jakha a rozmišľin, sar ela rajikanes, te sako ela lačho, kamela le Jehovas a sako kamela jekh avres! Ňiko imar na nasvaľola a dojekh šaj dživela pro furt.

3) So kerela le Devleskero kraľišagos pal oda, sar odčhivela o nalačhipen?

Paľis, sar ela odčhido o nalačhipen, o Ježiš mek vladňinela 1 000 berš. Prekal ola berša, o Ježiš the 144 000, so leha vladňinena, pomožinena le manušenge pre phuv, kaj te en terne, saste the bijo binos. Sar predžala ola 1000 berš, la phuvatar ela šukar rajos a savore, so odoj dživena, ena bachtale, bo šunena le Jehovaskere lava. Paľis o Ježiš visarela o kraľišagos peskere Dadeske le Jehovaske. Pal ajci berša ela „barardo [le Jehovaskero] nav!“ (Matúš 6:9, 10) Aleha pes sikavela, savo lačho vladcas hino o Jehovas a sar jilestar del peskere nipenge oda, so kampel. O Jehovas paľis pro furt odčhivela le Satan le demonenca the olen, so džan proci le Jehovaskera vladake. (Zjavenie 20:7–10) Le Devleskero kraľišagos kerela, hoj pro furt ela pre caľi phuv o rajos.

 DODŽAN TUT BUTER

4) Le Devleskero kraľišagos thovela tele manušikane vladi

„O manuš vladňinel upral o manuš ča pre bida.“ (Kazateľ 8:9) O Jehovas prekal o kraľišagos zaačhavel oda trapišagos.

Pregen Daniel 2:44 the 2. Tesaloničanom 1:6–8 a paľis vakeren jekhetane:

• So kerela o Jehovas le Ježišoha le manušikane vladenge the olenge, so peske ola vladi kidne avri?

• Tu imar džanes, savo hino o Jehovas the o Ježiš. Paťas lenge, hoj savoro, so kerena, ela čačes mištes?

5) O Ježiš hin oda nekfeder kraľis

O Ježiš sar kraľis andro Devleskero kraľišagos kerela but lačhipena le manušenge, so dživena pre phuv. Mukh o VIDEJO, kaj te dikhes, hoj o Ježiš na ča kamel, aľe tiš chudňa le Devlestar zor te pomožinel le manušenge.

Sar sas o Ježiš pre phuv, sikaďa ča vareso olestar, so kerela prekal le Devleskero kraľišagos. Pre soste tut našťi doužares? Pregenen jekhetane biblicka teksti, so hine andre tabuľka pal oda, so amen šukar užarel.

6) Le Devleskero kraľišagos kerela la phuvatar o rajos

 SO SIKHĽIĽAM

Le Devleskero kraľišagos kerela savoro, so o Del kamel. Kerela pre phuv o rajos, kaj dživena manuša, so jilestar šunena le Jehovas pro furt.

So bi phenehas

• Sar kerela le Devleskero kraľišagos, kaj te el barardo le Jehovaskero nav?

• Soske šaj paťas, hoj le Devleskero kraľišagos kerela pal o lav, so diňa o Del?

• So tu nekbuter kames te zadživel olestar, so amenge anela le Devleskero kraľišagos?