Kararatuangu Mawu seng měpẹ̌parenta. Seng mal᷊ighạ Kararatuang ene měkoạ pẹ̌bawal᷊ui gěguwạ su dunia. Mahịe měmanda piram baụ hal᷊ẹ̌ mapia sarung koatengu Kararatuangu Mawu.

1. Kerea Kararatuangu Mawu sarung mapakarěntang pẹ̌darame dingangu kal᷊aadilẹ̌ su dunia?

Yesus, Datung Kararatuangu Mawu, sarung měminasa taumata ral᷊akị dingangu pěmamarenta ral᷊akị su perang Armagedon. (Wahyu 16:​14, 16) Su tempo ene, dianding Alkitapẹ̌ ini sarung kahěngang-hěngang maghanapẹ̌: ”Seng mal᷊ighạ tempone, taumata ral᷊akị sarung matadise.” (Mazmur 37:10) Lumiung Kararatuangu Mawu, Yesus sarung mapakarěntang pẹ̌darame dingangu kal᷊aadilẹ̌ su patikụ dunia.​—Basa Yesaya 11:4.

2. Kerea pěbawiahu taumata mạeng kapulung Mawu seng mariadi su dunia?

Su tempong Kararatuangu Mawu mẹ̌parenta, ”taumata naunge matul᷊idẹ̌ sarung kapusakatengu dunia, kụ i sire sarung mẹ̌tanạ sene sarang karěngụe”. (Mazmur 37:29) Kěnang pẹ̌tiněna mạeng kěbị taumata su dunia měkẹ̌koạ barang nihino, makěndagẹ̌ si Yehuwa, dingangu makěndagẹ̌ su taumata wal᷊inẹ. Seng tawẹ apa taumata masakị kụ kěbị sarung měbiahẹ̌ sarang karěngụe.

3. Su apang taumata ral᷊akị seng niwinasa, apa sarung koatengu Kararatuangu Mawu?

Su apang taumata ral᷊akị seng niwinasa, Yesus sarung makoạ Datu kụ mẹ̌parenta karěngụe 1.000 su taunge. Su kanandụu tempo ene, i sie dingangu 144.000 taumata apang mẹ̌parenta sěngkasio dingange sarung mẹ̌tul᷊ung taumata su dunia tadeạu makoạ masukụ. Su pěngěngsuengu sěhiwu su taunge, dunia sarung makoạ firdaus masadadạ, kụ kěbị taumata sarung mal᷊uasẹ̌ ual᷊ingu i sire timuhụ manga hukung i Yehuwa. Bọu ene, Yesus sarung měnarakang pěmamarenta si Amange, Yehuwa. Kụ, areng i Yehuwa sarung ’ipakasusi’. (Matius 6:​9, 10) Ene sarung měnodẹ Yehuwa kai Měngangawasa kapaelange kụ mapadul᷊i su kěbị apang tụtuhụ si Sie. Bọu ene, Yehuwa sarung měminasa Setang, manga rohkẹ̌ dal᷊akị, dingangu kěbị apang němile limawang pěmamarenta-Ne. (Wahyu 20:​7-​10) Keadaan mapaelẹ̌ ini sarung matahang sarang karěngụe.

 BANGKA PAKARAL᷊UNG

4. Kararatuangu Mawu sarung měminasa pěmamarentang taumata

”Taumata měngẹ̌ngawasa taumata hakị u ene makạrugi watangeng i sire hala.” (Pengkhotbah 8:9) Lumiung Kararatuang’E, Yehuwa sarung mapakailang hal᷊ẹ̌ tawẹ adile ene.

Basa Daniel 2:​44 dingangu 2 Tesalonika 1:​6-8, bọu ene bisarai manga kakiwal᷊o ini:

• Apa sarung koateng i Yehuwa dingangu Ahus’E, Yesus, su pěmamarentang taumata dingangu su taumata apang němile pěmamarentang taumata?

• Su apang bọu něngěndung soal i Yehuwa dingangi Yesus, kawe nụe i kau mangimang apa sarung koateng i rẹ̌dua ene maadilẹ̌?

5. Yesus kai Datu kapaelange

Yesus, Datung Kararatuangu Mawu, sarung měkoạ lawọ hal᷊ẹ̌ kụ piạ gunane su rakyate su dunia. Putarẹ̌ VIDEONE gunang měmanda kerea i Yesus seng něnodẹ i sie mapulu mẹ̌tul᷊ung taumata, kụ Mawu seng něgělị si sie kawasa gunang měkoạ ene.

Manga hal᷊ẹ̌ nikoạ i Yesus su tempong su dunia něnodẹ apa sarung koatengu Kararatuangu Mawu. Bọu manga al᷊amatẹ̌ nilahẹ su daftarẹ̌, sude sěbạe lẹ̌ampal᷊engu? Basạe manga ayatẹ̌ nělahẹ manga al᷊amatẹ̌ ene.

6. Kararatuangu Mawu sarung měkoạ pěbawiahẹ̌ su tempo mahi mal᷊uasẹ̌

 RINGKASAN

Kararatuangu Mawu sarung měkoạ apa ikẹ̌kapulung Mawu. Kararatuang ene sarung měmal᷊ui dunia makoạ firdaus kụ mapenẹu taumata mapia měnẹ̌němbah si Yehuwa sarang karěngụe.

Apa seng nikaěndungangu?

• Kerea Kararatuangu Mawu mapakasusi areng i Yehuwa?

• Kawe nụe i kitẹ mangimang Kararatuangu Mawu sarung měngganapẹ̌ dianding Alkitapẹ̌?

• Bọu kěbị hal᷊ẹ̌ mapia sarung koatengu Kararatuangu Mawu, sude sěbạe lẹ̌ampal᷊engu?