LĒSONI 33
Ko e Meʻa ʻE Fakahoko ʻe he Puleʻangá
Kuo ʻosi pule ʻa e Puleʻanga ʻo e ʻOtuá ʻi hēvani. ʻOku vavé ni ke ne pule mai ki he māmaní pea ʻai ʻa e māmaní ke lelei ange. Te tau lāulea ki he ngaahi meʻa lelei ʻe lava ke ke fakatuʻotuʻa ki ai ʻi he pule mai ʻa e Puleʻangá.
1. ʻE anga-fēfē hono toe fakafoki mai ʻe he Puleʻanga ʻo e ʻOtuá ʻa e melinó mo e fakamaau totonú ki he māmaní?
Ko Sīsū, ʻa e Tuʻi ʻo e Puleʻanga ʻo e ʻOtuá, te ne fakaʻauha ʻa e kakai koví mo e ngaahi puleʻangá ʻi he tau ʻo ʻĀmaketoné. (Fakahā 16:14, 16) ʻI he taimi ko iá, ko e talaʻofa ko eni ʻi he Tohi Tapú ʻe fakahoko kakato: “ʻOku toe siʻi pē, pea ʻe ʻikai toe ʻi ai ʻa e kau fulikivanú.” (Saame 37:10) Fakafou ʻi he Puleʻangá, ʻe fakapapauʻi ʻe Sīsū ʻe fonu ʻa e māmaní ʻi he melinó mo e fakamaau totonú.—Lau ʻa e ʻAisea 11:4.
2. ʻE fēfē ʻa e moʻui ʻi he māmaní ʻi he taimi ʻe fakahoko ai ʻa e finangalo ʻo e ʻOtuá?
ʻI he pule mai ʻa e Puleʻanga ʻo e ʻOtuá, “ko e kau māʻoniʻoní te nau maʻu ʻa e māmaní, pea te nau nofo ai ʻo taʻengata.” (Saame 37:29) Sioloto atu ki he nofo ʻi ha māmani ʻa ia ko e tokotaha kotoa aí ʻoku māʻoniʻoni pea ʻoku nau ʻofa kotoa kia Sihova pea ʻoku nau feʻofaʻaki! Ko e tokotaha kotoa te nau moʻui taʻengata, pea ʻe ʻikai ha taha ʻe toe puke.
3. Hili hono fakaʻauha ʻa e kakai koví, ko e hā ʻe fakahoko ʻe he Puleʻanga ʻo e ʻOtuá?
Hili hono fakaʻauha ʻa e kakai koví, ʻe pule ʻa Sīsū ko ha Tuʻi ʻi he taʻu ʻe 1,000. Lolotonga ʻa e taimi ko iá, ko Sīsū mo hono kaungāpule ʻe toko 144,000, te nau tokoniʻi ʻa e faʻahinga ʻo e tangata ʻi he māmaní ke nau hoko ʻo haohaoa. ʻI he ngataʻanga ʻo e taʻu ʻe 1,000, ʻe liliu ʻa e māmaní ko ha palataisi fakaʻofoʻofa, ʻo fonu ʻi he kakai fiefia ʻa ia ʻoku nau maʻu ʻaonga mei he talangofua ki he ngaahi lao ʻa Sihová. ʻE fakafoki leva ʻe Sīsū ʻa e tuʻunga-pulé ki heʻene Tamaí, ʻa Sihova. ʻE fakamāʻoniʻoniʻi ʻa e huafa ʻo Sihová ʻo lahi ange ʻi ha toe taimi. (Mātiu 6:9, 10) ʻE fakamoʻoniʻi ai ko Sihová ko ha Pule lelei ʻokú ne tokanga ki hono kakaí. ʻE fakaʻauha leva ʻe Sihova ʻa Sētane, ko e fanga tēmenioó mo ha taha pē ʻoku nau fili ke anga-tuʻu ki Hono tuʻunga-pulé. (Fakahā 20:7-10) Ko e ngaahi tuʻunga haohaoa ʻe ʻomai ʻe he Puleʻanga ʻo e ʻOtuá ʻe tuʻuloa.
KELI LOLOTO ANGE
Fakakaukau ki he ʻuhinga ʻoku lava ai ke tau falala ʻe ngāueʻaki ʻe he ʻOtuá ʻa e Puleʻangá ke fakahoko kotoa ʻa e ngaahi talaʻofa ʻa e Tohi Tapú ki hotau kahaʻú.
4. ʻE fakangata ʻe he Puleʻanga ʻo e ʻOtuá ʻa e ngaahi founga-pule fakaetangatá
ʻI he pule “ha tangata ki ha tangata ko e kovi pē ʻokú ne ʻomi kiate iá.” (Tangata Malanga 8:9) ʻE fakaleleiʻi ʻe Sihova ʻa e fakamaau taʻetotonu ko ení fakafou ʻi hono Puleʻangá.
Lau ʻa e Taniela 2:44 mo e 2 Tesalonaika 1:6-8, pea lāulea leva ki he ongo fehuʻi ko ení:
-
Ko e hā ʻe fai ʻe Sihova mo hono ʻAló, ʻa Sīsū, ki he ngaahi puleʻanga fakaetangatá mo honau kau poupoú?
-
Makatuʻunga he meʻa kuó ke ako fekauʻaki mo Sihova mo Sīsuú, ko e hā ʻokú ke tui ai ʻe fakahoko ʻi he fakamaau totonu mo e taʻefilifilimānako ʻa ʻena ngāué?
5. Ko Sīsū ʻa e Tuʻi lelei tahá
ʻI he tuʻunga ko e Tuʻi ʻo e Puleʻanga ʻo e ʻOtuá, ʻe fakahoko ʻe Sīsū ʻa e ngaahi meʻa lelei lahi ʻaupito maʻá e kakai ʻi he māmaní. Huluʻi ʻa e VITIOÓ pea sio ki hono fakahaaʻi ʻe Sīsū ʻokú ne loto ke tokoniʻi ʻa e kakaí pea mo hono ʻoange ʻe he ʻOtuá kiate ia ʻa e mālohi ke fai peheé.
Ko e meʻa naʻe fai ʻe Sīsū ʻi heʻene ʻi he māmaní ko e fakatātā ia ʻo e meʻa ʻe fai ʻe he Puleʻangá. Ko fē ʻa e tāpuaki ʻi heni ʻokú ke hanga vēkeveke atu ki aí? Lau ʻa e ngaahi konga Tohi Tapu ʻoku lave ki he ngaahi tāpuaki ko iá.
|
ʻI HE MĀMANÍ . . . |
MEI HĒVANÍ . . . |
|---|---|
|
|
|
|
|
|
|
|
6. ʻE ʻomai ʻe he Puleʻanga ʻo e ʻOtuá ha kahaʻu fisifisimuʻa
ʻE fakahoko kakato ʻe he Puleʻangá ʻa e muʻaki taumuʻa ʻa Sihova ki he faʻahinga ʻo e tangatá. Te nau moʻui taʻengata ʻi ha māmani palataisi. Huluʻi ʻa e VITIOÓ ke sio ki he anga hono ngāueʻaki ʻe Sihova hono ʻAló, ʻa Sīsū, ke fakahoko ʻEne taumuʻá.
Lau ʻa e Saame 145:16, pea lāulea leva ki he fehuʻi ko ení:
-
ʻOku anga-fēfē hoʻo ongoʻí ʻi he ʻilo ʻe hanga ʻe Sihova “ʻo fakatōliʻa ʻa e holi ʻa e meʻamoʻui kotoa”?
ʻOKU PEHĒ ʻE HE NIʻIHI: “Ko ha puleʻanga fakaetangata lelei ange ʻoku lava ke ne solova hotau ngaahi palopalemá.”
-
Ko e hā ʻa e ngaahi palopalema ʻe solova ʻe he Puleʻanga ʻo e ʻOtuá ka ʻoku ʻikai lava ia ʻe he ngaahi puleʻanga fakaetangatá?
FAKANOUNOU
ʻE fakahoko ʻe he Puleʻanga ʻo e ʻOtuá ʻa ʻene taumuʻá. Te ne liliu ʻa e māmaní ko ha palataisi ʻoku fonu ʻi he kakai lelei ʻa ia te nau tauhi kia Sihova ʻo taʻengata.
Fakamanatu
-
ʻE anga-fēfē hono fakamāʻoniʻoniʻi ʻe he Puleʻanga ʻo e ʻOtuá ʻa e huafa ʻo Sihová?
-
Ko e hā ʻoku tau tui ai ko e Puleʻanga ʻo e ʻOtuá te ne fakahoko ʻa e ngaahi talaʻofa ʻi he Tohi Tapú?
-
ʻI he kotoa ʻo e ngaahi meʻa lelei ʻe fakahoko ʻe he Puleʻangá, ko fē ʻa e taha ʻokú ke fakatuʻotuʻa atu ki aí?
AKO LAHI ANGE
Sio pe ko e hā ʻa ʻĀmaketone.
Lau fekauʻaki mo e meʻa ʻe hoko lolotonga mo e hili pē ʻa e pule taʻu ʻe 1,000 ʻa Sīsū ko e tuʻí.
“Ko e Hā ʻE Hoko ʻi he ʻAho Fakamāú?” (Ko e Taua Leʻo, ʻOkatopa 1, 2012)
Sio ki he fakalaulauloto fakataha ha fāmili ki he ngaahi tāpuaki ʻo e Puleʻangá he kahaʻú.
ʻI he kupu “Naʻe Fakahohaʻasi Au ʻe ha Ngaahi Fehuʻi Lahi,” ako ki hono maʻu ʻe ha tokotaha anga-tuʻu ʻa e fakaleleiʻanga naʻá ne kumi ki aí.
“Liliu ʻe he Tohi Tapú ʻa e Moʻuí” (Toʻo mei he Ko e Taua Leʻo)
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
