LESEN 33
Ol Samting Kingdom Bai Mekim
Kingdom Bilong God i kirap mekim wok pinis. Klostu nau em bai mekim ol bikpela senis long graun. Bai yumi stori long ol gutpela samting yumi ken wet long lukim taim Kingdom i bosim graun.
1. Olsem wanem Kingdom Bilong God bai kamapim gen bel isi na stretpela pasin long graun?
Jisas, em King bilong Kingdom Bilong God, bai bagarapim ol man nogut na ol gavman long pait bilong Armagedon. (Revelesen 16:14, 16) Long dispela taim, dispela tok promis bai kamap tru: “I no longtaim na bai ol man nogut i no stap moa.” (Buk Song 37:10) Long rot bilong Kingdom, Jisas bai mekim na bel isi na stretpela pasin bai pulap long olgeta hap.—Ritim Aisaia 11:4.
2. Sindaun bilong ol man bai wanem kain taim laik bilong God i kamap long graun?
Taim Kingdom Bilong God i bosim graun, “ol stretpela man bai kisim graun olgeta, na ol bai stap oltaim long en.” (Buk Song 37:29) Piksaim olsem yu stap long graun we olgeta man i stretpela man na ol i laikim Jehova na narapela narapela! I no gat wanpela i sik, na olgeta i stap oltaim.
3. Kingdom Bilong God bai mekim wanem bihain long ol man nogut i bagarap?
Bihain long ol man nogut i bagarap, Jisas bai mekim wok King inap 1,000 yia. Long dispela taim, Jisas na 144,000 bai helpim ol manmeri i kamap gutpela olgeta na no gat sin. Long pinis bilong dispela 1000 yia, graun olgeta bai kamap paradais na i pulap long ol man i stap amamas na bihainim ol lo bilong Jehova. Bihain, Jisas bai givim wok king i go bek long Papa bilong em, Jehova. Na “nem bilong [Jehova bai] i stap holi,” winim olgeta taim bipo. (Matyu 6:9, 10) Dispela bai kamapim klia olsem Jehova i gutpela King i save tingim tru ol manmeri i stap aninit long em. Jehova bai bagarapim Satan, ol spirit nogut, na ol man em long laik bilong ol yet ol i sakim wok bos bilong Em. (Revelesen 20:7-10) Ol gutpela samting Kingdom Bilong God i kamapim bai stap oltaim oltaim.
KISIM SAMPELA SAVE MOA
Skelim wai na yumi ken bilip olsem God bai yusim Kingdom long inapim tru olgeta tok promis bilong Baibel long ol samting bai painim yumi long bihain.
4. Kingdom Bilong God bai pinisim olgeta gavman bilong ol man
“Man i bin bosim man na i bringim hevi tasol long em.” (Eklisiastis 8:9) Long rot bilong Kingdom bilong em, Jehova bai pinisim ol pasin i no stret.
Ritim Daniel 2:44 na 2 Tesalonaika 1:6-8, na stori long ol dispela askim:
-
Jehova na Pikinini bilong em, Jisas, bai mekim wanem long gavman bilong ol man na ol lain i sapotim ol?
-
Olsem wanem save yu kisim long Jehova na Jisas i helpim yu long bilip tru olsem ol samting ol bai mekim i stret na i fea?
5. Jisas em i gutpela King
Jisas em i King bilong Kingdom Bilong God, olsem na em bai mekim planti samting bilong helpim ol manmeri bilong em long graun. Pilaim VIDIO na lukim hau Jisas i soim pinis olsem em i gat laik long helpim ol manmeri na God i givim em strong long mekim olsem.
Ol samting Jisas i mekim taim em i stap long graun i piksa tasol bilong ol samting Kingdom bai mekim. Wanem ol gutpela samting long dispela lista em yu laik tru long lukim? Ritim ol skripsa i stap klostu long en i stori long ol dispela gutpela blesing.
|
TAIM JISAS I STAP LONG GRAUN, EM I BIN . . . |
LONG HEVEN, JISAS BAI . . . |
|---|---|
|
|
|
|
|
|
|
|
6. Kingdom Bilong God bai kamapim gutpela sindaun long bihain
Kingdom bai mekim olgeta samting em long pastaim tru Jehova bin tingting pinis long mekim long ol man. Ol bai stap oltaim long Paradais long graun. Pilaim VIDIO na lukim olsem wanem Jehova i mekim wok long Pikinini man bilong em, Jisas, long kamapim ol samting Em i bin tingting pinis long mekim.
Ritim Buk Song 145:16, na stori long dispela askim:
-
Yu pilim olsem wanem taim yu kisim save olsem Jehova bai “inapim laik bilong olgeta samting i gat laip”?
SAMPELA MAN I TOK: “Sapos yumi olgeta i wok bung wantaim, yumi inap stretim olgeta hevi bilong graun.”
-
Kingdom Bilong God bai stretim wanem ol hevi em ol gavman bilong ol man i no inap stretim?
OL BIKPELA POIN
Kingdom Bilong God bai inapim wok bilong en. Em bai mekim graun olgeta i kamap paradais i pulap long ol gutpela manmeri i lotuim Jehova inap oltaim oltaim.
Riviu
-
Olsem wanem Kingdom Bilong God bai mekim holi nem bilong Jehova?
-
Bilong wanem yumi ken bilip tru olsem Kingdom Bilong God bai inapim tru olgeta tok promis bilong Baibel?
-
Wanem wanpela bilong ol samting Kingdom bai mekim em yu laik tru long lukim?
MEKIM WOK PAINIMAUT
Kisim save long mining bilong dispela tok Armagedon.
“Pait Bilong Amagedon Em Wanem Samting?” (Atikol long websait)
Ritim stori bilong ol samting bai kamap taim Jisas i mekim wok king insait long 1,000 yia na wanem samting bai kamap long pinis bilong en.
“Wanem Samting Bai Kamap Long De Bilong Kot?” (Wastaua, Septemba 1, 2012)
Lukim hau ol famili i ken piksaim olsem ol i stap wantaim long Paradais.
Long atikol “Mi Gat Planti Askim Tru Long Ol Samting,” ritim stori bilong wanpela man i bikhet long gavman i kisim bekim long ol samting em i laik save long en.
“Baibel i Save Senisim i Stap Bilong Man” (Wastaua, Janueri 1, 2012)
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
