An Ginhadian han Dios nagmamando na. Hirani na ito magpahinabo hin dagku nga mga pagbag-o ha tuna. Usisahon naton an pipira nga mag-opay nga butang nga papahinaboon ha pagmando han Ginhadian.

1. Ano an bubuhaton han Ginhadian han Dios basi magkaada utro kamurayawan ngan hustisya ha tuna?

Bubungkagon ni Jesus, nga Hadi han Ginhadian han Dios, an magraot nga tawo ngan an mga gobyerno ha girra han Armagedon. (Pahayag 16:14, 16) Hito nga panahon, ini nga saad han Biblia bug-os nga matutuman: “Diri na mag-iiha, ngan an magraot mawawara na.” (Salmo 37:10) Pinaagi han Ginhadian, sisiguruhon ni Jesus nga magkaada kamurayawan ngan hustisya ha bug-os nga tuna.—Basaha an Isaias 11:4.

2. Ano an magigin kahimtang kon matuman na an kaburut-on han Dios dinhi ha tuna?

Ha pagmando han Ginhadian han Dios, “an magtadong magtatag-iya han tuna, ngan maukoy hira dida ha waray kataposan.” (Salmo 37:29) Imadyina nga maukoy ka ha kalibotan diin an ngatanan nga tawo matadong ngan nahigugma kan Jehova ngan ha usa kag usa! Waray na magkakasakit, ngan an ngatanan mabubuhi ha waray kataposan.

3. Ano an bubuhaton han Ginhadian han Dios katapos bungkagon an magraot?

Katapos bungkagon an magraot, hi Jesus magmamando sugad nga Hadi ha sulod hin 1,000 ka tuig. Hito nga panahon, bubuligan niya ngan han 144,000 nga kaupod niya ha pagmando an mga tawo dinhi ha tuna basi magin perpekto. Ha kataposan han 1,000 ka tuig, an bug-os nga tuna magigin makaruruyag nga paraiso, ngan an ngatanan nga tawo magigin malipayon kay nasugot hira ha mga balaud ni Jehova. Katapos, ibabalik ni Jesus an pagmando ngadto ha iya Amay, hi Jehova. Hito nga panahon, bug-os nga ‘babaraanon an ngaran’ ni Jehova. (Mateo 6:9, 10) Mapapamatud-an na nga hi Jehova usa nga maopay nga Magmarando nga nahigugma ha iya mga sakop. Katapos, bubungkagon ni Jehova hi Satanas, an mga demonyo, ngan an iba pa nga magrirebelde ha Iya pagmando. (Pahayag 20:7-10) An perpekto nga mga kahimtang nga papahinaboon han Ginhadian han Dios magpapadayon ha waray kataposan.

 DUGANG NGA USISAHA

4. Bubungkagon han Ginhadian han Dios an mga gobyerno han tawo

“Ginmamandoan han tawo an iya igkasi-tawo ha iya ikakadaot.” (Eclesiastes 8:9) Gagamiton ni Jehova an iya Ginhadian basi tapuson ini nga kawaray-hustisya.

Basaha an Daniel 2:44 ngan 2 Tesalonica 1:6-8, katapos, hisguti niyo ini nga mga pakiana:

• Ano an bubuhaton ni Jehova ngan han iya Anak nga hi Jesus ha mga gobyerno han tawo ngan ha mga nasuporta hito?

• Paonan-o ka napasarig han imo nahibaroan mahitungod kan Jehova ngan kan Jesus nga magigin patas hira ngan waray pinaurog?

5. Hi Jesus an pinakamaopay nga Hadi

Sugad nga Hadi han Ginhadian han Dios, bubuligan ni Jesus an mga tawo dinhi ha tuna ha damu nga paagi. I-play an VIDEO basi mahibaroan kon paonan-o iginpakita ni Jesus nga karuyag niya buligan an mga tawo ngan gintagan hiya han Dios hin gahum ha pagbuhat hito.

Han nakanhi hi Jesus ha tuna, nagpakita hiya hin sampol kon ano an bubuhaton han Ginhadian. Hain ha mga bendisyon nga nakasurat dinhi an imo gud ginpapamulat? Basaha an kaupod nga mga teksto basi mahibaro hin dugang mahitungod hito nga mga bendisyon.

6. An Ginhadian han Dios magpapahinabo hin maopay gud nga kabubuwason

 SUMARYO

Tutumanon han Ginhadian han Dios an katuyoan han Dios. Hihimoon hito nga paraiso an bug-os nga tuna, ngan dida maukoy an mag-opay nga tawo nga magsisingba kan Jehova ha waray kataposan.

Repaso

• Paonan-o babaraanon han Ginhadian an ngaran ni Jehova?

• Kay ano nga makakasarig kita nga tutumanon han Ginhadian han Dios an mga saad ha Biblia?

• Ha mga butang nga papahinaboon han Ginhadian, hain hito an ginhihingyap mo gud?