Maʼ cayuni mandar Reinu stiʼ Dios guibáʼ. Ne maʼ cadi candaa zuni chaahuiʼ ni Guidxilayú riʼ. Guidúʼyanu xi guiráʼ cosa galán chiguni Reinu riʼ ne xiñee rusiecheʼ ni laanu.

1. ¿Xi chiguni Reinu stiʼ Dios para guibiguetaʼ chuʼ paz ne justicia lu Guidxilayú riʼ?

Lu guerra ni láʼ Armagedón, zunitilú Jesús—ni naca Rey stiʼ Reinu stiʼ Dios—guiráʼ binni malu ne guiráʼ gobiernu nuu lu Guidxilayú riʼ (Apocalipsis 16:14, 16). Ne dxi ca nga gaca cumplir promesa ni zeeda lu Biblia riʼ: «Maʼ xcaadxi si tiempu cayaadxaʼ, ne maʼ qué ziuu binni malu» (Salmo 37:10). Zudxiguetaʼ Jesús paz ne justicia lu guidubi naca Guidxilayú riʼ (biindaʼ Isaías 11:4).

2. ¿Ximodo zabani binni ora gaca ni ná Dios lu Guidxilayú riʼ?

Ora guni mandar Reinu stiʼ Dios, Biblia ná: «Zacaa ca ni biʼniʼ ni jneza guidxilayú ne zabánicaʼ luni para siempre» (Salmo 37:29). ¡Guníʼ ique si ximodo zabáninu lade ca binni ni nadxii Jehová ne nadxiisaacaʼ! ¿Cadi rábiluʼ guizáʼ galán nga la? Qué zaca huará binni ne qué ziuu dxi gatiʼ.

3. ¿Xi guiráʼ chiguni Reinu stiʼ Dios gunitilú si guiráʼ binni malu?

Gunitilú si Jesús guiráʼ binni malu, zuni mandar 1,000 iza. Ne para tiempu ca, Jesús ne 144,000 ni chiguni mandarné zacanécabe binni guidxilayú gácacaʼ perfectu. Ne dxi guiluxe tiempu riʼ, zaca Guidxilayú riʼ ti paraísu sicarú ra zabani binni nayecheʼ purtiʼ ruzuubacaʼ stiidxaʼ Jehová. Ne óraca zudxiguetaʼ Jesús Reinu ca Jehová. Óraca nga zaca santificar lá Jehová lu guidubi naca Guidxilayú (Mateo 6:9, 10). Laaca zahuinni jneza modo runi mandar Jehová ne rapa ca xpinni. Despué zunitilú Jehová Binidxabaʼ ne ca demonio stiʼ, ne tutiica gacalaʼdxiʼ gucaalú gobiernu stibe (Apocalipsis 20:7-10). Ne qué ziuu dxi gusaana de guibani binni galán ne nazaaca ra guni mandar Reinu stiʼ Dios.

 GUIZÍʼDIRUNU JMA

4. Zunitilú Reinu stiʼ Dios guiráʼ gobiernu ni nuu lu Guidxilayú riʼ

Biblia ná: «Binni huayuni mandar binni para si gacanacaʼ» (Eclesiastés 8:9). Zaquiiñeʼ Jehová Reinu stiʼ para guni chaahuiʼ guiráʼ ra maʼ bininá ca gobiernu malu riʼ.

Laguundaʼ Daniel 2:44 ne 2 Tesalonicenses 1:6-8, ne laiquiiñeʼ ca pregunta riʼ para güitu diidxaʼ:

• ¿Xi zuni Jehová ne Jesús ca gobiernu malu nuu lu Guidxilayú riʼ ne ca ni runi apoyar laacaʼ?

• Pur guiráʼ ni maʼ nánnaluʼ de Jehová ne Jesús, ¿xiñee zanda guni creluʼ zúnicabe ni jneza?

5. Gástiruʼ sti Rey casi Jesús

Ora guni mandar Jesús lu Guidxilayú riʼ zuni stale cosa galán para binni. Laguuyaʼ VIDEU riʼ para guietenaláʼdxitu ximodo bisihuinni Jesús racalaʼdxiʼ gacané binni ne maʼ bidii Dios laabe poder para gúnibe ni.

Rusihuinni guiráʼ cosa ni biʼniʼ Jesús dxi guyuu lu Guidxilayú riʼ, xi guiráʼ chiguni Reinu stiʼ Dios. ¿Gunáʼ de ca promesa riʼ maʼ ñuuláʼdxiluʼ ñaca cumplir? Laguundaʼ ca textu ra zeeda ca promesa riʼ.

6. Zabáninu galán dxi guni mandar Reinu stiʼ Dios lu Guidxilayú

 XI BIZÍʼDINU

Zuni Reinu stiʼ Dios guiráʼ ni maʼ gudixhe ique Jehová. Zuni ni Guidxilayú riʼ ti paraísu ra zabani binni nachaʼhuiʼ ni qué zusaana de guni adorar Jehová.

Xi biziidiluʼ

• ¿Xi zuni Reinu stiʼ Dios para gaca santificar lá Jehová?

• ¿Xiñee zanda guni crenu zuni cumplir Reinu stiʼ Dios guiráʼ promesa zeeda lu Biblia?

• De lade guiráʼ cosa ni chiguni Reinu stiʼ Dios, ¿gunáʼ ni maʼ ñuuláʼdxiluʼ ñaca cumplir?