WIRIKAPAI 33
Gupai Kindo Nika Mangaha
Ga Mbori Kindo nazogarago azoga awere. Barambeda, si nika manga bakere aˈariapai auru kpotosende. Ani bingo gu bete weneapai rengbe mo ka ngera tipa ha kumbatayo tiibe gu zogarago nga ga Kindo.
1. Waigu ga Mbori Kindo nika karaga zereda gbiati rurupai ku auru kpotosende?
Yesu, nga Bakindo ga Mbori Kindo, nika gbarasa gbegberẽ aboro gbiati azogarago rogo gu vura nga Aramegido. (Yugoti 16:14, 16) Ti gu regbo re, agi akidohe nga ga Baibiri du re nika digiso tihe dunduko: ‘Fuo rago ngbutuko, gbegberẽ boro adú nga ho berewe te.’ (Atambuahe 37:10) Vurube gu Kindo re, Yesu nika sa gupai nga zereda gbiati rurupai hiisi kpotosende.—Mo gedi Yesaya 11:4.
2. Raka nika du wai ho gupai Mbori akpinyemuhe nikaa mangaha ni auru kpotosende?
Tii gu zogarago nga ga ga Mbori Kindo, ‘ruru aboro adía kumbo ringara, ki nyeanye kindi.’ (Atambuahe 37:29) Mo berẽnga gupai nga mo naraka rogo gu zegino du aboro dunduko ni ruru yo na i dunduko nakpinyemu Yekova na kini kpinyemu akurayo! Boro ho nika woka te, na aboro dunduko nika raka nyeanye kindi.
3. Ginipai ga Mbori Kindo nika mangaha tingbafuo gbarasa yo gbegberẽ aboro?
Tingbafuo i gbarasi gbegberẽ aboro, Yesu nika zogarago ni Bakindo tipa agarã 1,000. Ti gu regbo re, ko gbiati agu aboro nika zogarago nako du bange yo nga 144,000 nika undo aboro auru kpotosende i da ni rengberengbe yo zanga ingapai. Ti digido gu regbo re, i nika sa kpotosende kurogo bawene paradizo, nga gu nika hii be aboro ngbarago nga aguyo nika gbia undo mbiko giayo sangba ga Yekova andiko. Tifuo gure tie, Yesu nika karaga zogarago berewe fu Bako, nga Yekova. Rimo Yekova nika du ni ‘irisi irisihe’ susi gu nidu mbata. (Matayo 6:9, 10) Si nika yugotihe ayugo nga Yekova nga wene bazogo nangera angerafuo gako azogo. Si du tie, Yekova nika gbarasa Satana, adaimona, gbiati ai agu aboro nasia ka samungu kuti Gako zogarago. (Yugoti 20:7-10) Gu weneapai nika ye vurube ga Mbori Kindo nika nyeanye kindi.
MO WIRIKI KURA DUNGU APAI
Mo bingo gu ndupai rengbe ani ka kido ti ni nga Mbori nika mangasunge na gako Kindo tipa ka digiso agu akidohe dunduko nga ga Baibiri tipa rani kumbatayo.
4. Ga Mbori Kindo nika digiso ga aboro zogarago
‘Boro nidu ni gbia ku ri kura ni ka imisa ni.’ (Batungusipai 8:9) Yekova nika mangasunge na gako Kindo tipa ka digiso iraira mangaapai.
Mo gedi Daniere 2:44 na 2 ATesaroniko 1:6-8, na tifuoho, mo ki sakipai tipa agi asanahe re:
-
Ginipai aYekova na Yesu nika mangaha na gu zogarago nga ga aboro gbiati agu aboro nasongodaha?
-
Waigu agu apai mo nawirikihe tipa Yekova gbiati Yesu akido ro nga gayo mangapai nika du ni ruruhe na ni wenehe?
5. Yesu nga wene Bakindo
Wangia Yesu Bakindo ga Mbori Kindo, ko nika manga dungu apai tipa ka undo aboro auru kpotosende ane. Mo bi gu VIDIO re tipa ka bi wai Yesu ayugo gupai nga ko na nyemu ka undo aboro na Yekova ima fu ome fuko tipa ko mangihe wo.
Ho Yesu adu ni auru kpotosende, ko ayugu gu bete apai Kindo nika mangaha. Gini amaku i natangara paha ane mo angera tipa ha gbe kumbatayo? Mo gedi agu averesi ngbefuo agu amaku re nga gu naundo rani ani ini dungu apai tipa agu amaku re.
HO YESU ADU NI AURU KPOTOSENDE, KO . . . |
NGBANGBATURŨ YO YESU NIKA . . . |
---|---|
|
|
|
|
|
|
|
|
6. Ga Mbori Kindo nika ye na weneapai kumbatayo
Kindo nika manga agu apai dunduko nangia ga Yekova bambata ringbisapai tipa aboro. I nika raka nyeanye kindi rogo paradizo auru kpotosende. Mo bi gu VIDIO re ka bi wai Yekova amangasunge vurube Wiriko nga Yesu, tipa ka digiso Gako ringbisapai.
Mo gedi Atambuahe 145:16, na tifuoho, mo ki sakipai tipa gi sanahe re:
-
Pa ino mo gupai nga Yekova nika ‘mbisa gu nyemuhe nga ga unga ahe dunduko’ nasa ro mo du wai?
GU KURA ABORO NAPE GUPAI NGA: “Ka ani amanga apai dunduko kina sa, ani ima rengba ka mbakada agu akpakarapai du rogo zegino.”
-
Gini akpakarapai ga Mbori Kindo nika mbakadaha nga gu gu zogarago nga ga wiri aboro arengbanga ka mangaha ya?
GINIPAI MO NAWIRIKIHE?
Ga Mbori Kindo nika manga gupai amanga ko aida si mangihe. I nika sa kpotosende naabaha kurogo paradizo nga gu nika hii be wene aboro nga aguyo nikaa iriso Yekova nyeanye kindi.
Fugöpai
-
Waigu ga Mbori Kindo nika ziasi rimo Yekova?
-
Tipagine rengbe ani ka ida ti ni kuti gupai nga ga Mbori kindo nika digiso agu akidohe nga ga Baibiri?
-
Dagba agu apai Kindo nika mangaha, ginigu mo angera kumbatayo gbe tipaha?
MO WETEKE GU KURA APAI
Mo bingo gupai gu fugo nga Aramegido yo ayugoho.
“Gine Nga gu Vura Nga Aramegido?” (Gu kekeapai du rogo gaani bangiriba nga ga Internet)
Mo wisigingo gu goapai nika manga ti regbo ga Yesu zogarago na ti digido gako zogarago tipa agarã kutu.
“Ginipai Nika Manga ti Rago Sapangbanga?” (Ngbaõbambu Sinziri, Mbirinvuo 1, 2012)
Mo bingo wai rengbe aborokporo ka berã kina sa kurii agu amaku nga ga Kindo du kumbatayo.