CƐ̃́Ɛ́-ÐƐ̀ 34

Xwɛ̀ À Ɓɛ́ìn À Ðɛ̀ɓɛ̀ìn-Ðɛ̀ɓɛ̀ìn Ɓó Jɛhova Bììɛɛ Tɛ̀mɛ̀ìn Nyɛ́?

POƐ KŨ̀À GBO

M̀ ɖà Geɖepɔɔ bũ̀in xwɛ̃́ìn cáà sɔ̀ìn ti m̀ de ma Baɓoɔ cɛ̃́ɛ gbɔ kɛ gboò? Nì muɛ mɔ́ùnǹ ɓɛ́ m̀ ké gbo-kpɔ̃ìn-kpɔ̃ìn nìà m̀ kè ɔ kè pṹa kɛɛ dyi kùìn kánáá puù? Ɔ dyi ná nììn, ɔ mɛ nì m̀ hwìɖìi kà Jɛhova muà nì ɖɛ̀ɓɛ̀ìn-ɖɛ̀ɓɛ̀ìn ɓó ɔ bììɛɛ kɔ̃ kpáa dyéìn nyɛɛ, kàà ɔ mu m̀ mú ɖɛ̀ɓɛ̀ìn, ké ɔ mu nì jè gbo kɔ̃̀ùn mìɔ. Xwɛ̀ m̀ ɓɛ́ìn ɔ dyí tɛ̀mɛ̀ìn kà m̀ ɖɛ̀ɓɛ̀ ɔ múɛ́?

1. Xwɛ̀ à nyuɛ Jɛhova dyí tɛ̀mɛ̀ìn kà à ɖɛ̀ɓɛ̀ ɔ múɛ́?

À tɛ̀mɛ̀ìn kà à ɖɛ̀ɓɛ̀ Jɛhova múɛ dyììn ɖé ɔ wuɖu nyu-nyu mú. (Zà 1 Jɔ̃́ɔ́ 5:3 wuɖuún.) Ɔ ní kpɔ̃̀ìn nyɔ ɖò ganaún ɓɛ́ ɔ ké ɔ wuɖu nyu. Kɛɛ, ɔ nyí à ɖò-ɖò séín ti, ɓɛ́ à kéɛ gã kɛbì à mu ɔ wuɖu nyuùn mɔɔ à se ɔ wuɖu nyuɛ́ mu ní. Xwíníínɔ̀ nyɛ́ kɔ̃̀ jèɛ́? Jɛhova mɔ́ ɓɛ́ à ‘hwòɖò ké wɔ̃́ ɓɛ́ à ké ɔ wuɖu nyu.’ (Wóɖómà 6:17) Ɔ xwíníín mɔ̀, ɔ se mɔ́ ɓɛ́ m̀ ké ɔ wuɖu nyu, sepoɛɖe m̀ kɔ̃̀ m̀ kéɛ nyu jè, kɛɛ m̀ mɛ nyuɛ, sepoɛɖe m̀ ɖɛ̀ɓɛ̀ ɔ mú jè. Wa poìn céè-ɖɛ̀ nìà kɛɛ Ge-Mú 3 kè 4 xwaún, ɓɛ́ wa ké m̀ gbo kpá ɓɛ́ m̀ ké nì ɖɛ̀ɓɛ̀ìn-ɖɛ̀ɓɛ̀ìn ɓó Jɛhova bììɛɛ tɛ̀mɛ̀ìn dyììn ɖé ɖɛ ɓè dè ɔ hwìɖìiɛɛ nyu-nyu mú, kè ɖɛ ɓè se ɔ hwìɖìi dèɛɛ dyí ɓaɖàìn-ɓàɖàìn mú.

2. Xwíníínɔ̀ nyɛ́ kɔ̃̀ jè ɔ ɓɛ́àìn mú kàmà ɓɛ́ à kéà à ɖɛ̀ɓɛ̀ìn-ɖɛ̀ɓɛ̀ìn ɓó Jɛhova bììɛɛ tɛ̀mɛ̀ìn nyɛ́?

“Gà-ɖɛ̀ ɓè ɓɛ́ dyí-sɛ́ɖɛ́ìn-nyɔ̀ ɓèɔ̀ dyé dyíɛɛ ɓɛ́ìn dyí vòɛ̀.” (Wɛ́ɖɛ́ 34:19) À dyé gà ɖé à mìɔùn nììn nàmàùn ɓè xwaún. Ké wíɖí gà ɓɛ́ìn à kɔ̃ kpáa, mɔɔ à ɓɛ́ìn se-dyí-sɛ́ɖɛ́ìn-ɖɛ̀ kè fũ̀à-fṹá-ɖɛ̀ tɔ̀ɔ̀ ɓè dyí dyéɛ. À dyi ti-kàmàùn-kàmàùn ɓè dyí dyéɛ nììn, ɔ ɓɛ́ìn mú kàmàà ɓɛ́ à ké Jɛhova wuɖu nyu. Ɔ nì ná, sepoɛɖe ɖɛ gbà nyu-nyu ɓɛ́ìn xwa fɛ̃́ɛ̀n. Kɛɛ, ɔ jù ké m̀ dyi ɖɛ Jɛhova cɛ̃ m̀ gboɛɛ nyu ní, nì muɛ tɛ̀mɛ̀ìn kà m̀ ɖɛ̀ɓɛ̀ ɔ mú ké ɔ zi ɖɛ séín ɖò dyíɛ. Ké nì muɛ tɛ̀mɛ̀ìn kà m̀ kpɔ̃ ɔ jè gboi kóɖó-kóɖóɛ. Nìí, ɔ mu nì jè gboi kpɔ̃ùn kóɖó-kóɖó. Ɔ se m̀ dyi táà mu fɔɔ.—Zà Wɛ́ɖɛ́ 4:3 wuɖuún.

ÐE ÐƐ MÚIN CÁ

Cɛ̃́ xwíníín kɔ̃̀ jè nì wuɖu-nyu-nyu kpaà ɖɛ ɖé Jɛhova gboɛ, kè ɖɛ ɓɛ́ìn m̀ gbo kpáa ɓɛ́ m̀ ké ɔ jè gboi kpɔ̃ kánáá puɛ.

3. Zaa ɓɛ́ ɔ ɓá m̀ dyíɛ

Ðé Jóɓò-cèè-ɖɛ̀ɔ̀ múɛɛ, Sétɔ̃̀ nyu ma zaa-dè-dè ɖò ɓɛ́ ɔ ɓá gàa mɔ̀ ma kà Jóɓò kɛ dyíɛ, kɛɛ ɔ ɓá nyɔ tɔ̀ɔ̀ séín ɓè ɓɛ́ wa mɔ́ Jɛhova ɓièɛ dyiɛɛ dyí ɖekè. Zà Jóɓò 1:1, 6–2:10 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Kà Sétɔ̃̀ nyuɛ ma kà cɛ̃ɛ kɛɛ, xwíníínɔ̀ nyɛ́ kɔ̃̀ jè Jóɓò nyu ma Jɛhova wuɖu kɛ́? —Dyé Jóɓò 1:9-11.
Ðɛ́ Sétɔ̃̀ cɛ̃ ma ɓá nyɔùn séín kè mɔ̀ùn jè dyíɛ́?—Dyé Jóɓò 2:4.

Zà Jóɓò 27:5 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

Xwɛ̀ Jóɓò nyuɛ ma tɛ̀mɛ̀ìn kà ɔ ɖɛ̀ɓɛ̀ ma Jɛhova mú jàà kɛ́?

Jóɓò tɛ̀mɛ̀ìn ma kà ɔ ɖɛ̀ɓɛ̀ ma Jɛhova múɛ dyììn ɖé ɔ jè gboi-kpɔ̃-kpɔ̃ mú kánáá pu

À tɛ̀mɛ̀ìn kà à ɖɛ̀ɓɛ̀ Jɛhova múɛ dyììn ɖé ɔ jè gboi-kpɔ̃-kpɔ̃ mú kánáá pu

4. Dè Jɛhovaa hwòɖòɔ̀ dyi

Zà Nɔ́ɔ́ 27:11 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Xwɛ̀ Jɛhova hwòɖòɔ̀ nyu nìɛ̀ ɔ jù ké m̀ dyi hwòɖò fɔ̀nɔ̀, ké m̀ dyi ɔ wuɖu nyu níɛ́? Xwíníínɔ̀ nyɛ́ kɔ̃̀ jèɛ́?

5. M̀ ɓɛ́ìn Jɛhova jè gboi kpɔ̃ɔ kánáá pu

À ɖɛ̀ɓɛ̀ìn-ɖɛ̀ɓɛ̀ìn ɓó Jɛhova bììɛɛ po à kpéí, ɓɛ́ à ké ɔ jè nyɔ tɔ̀ɔ̀ ɓè gbo cɛ̃. À ɖɛ̀ɓɛ̀ìn-ɖɛ̀ɓɛ̀ìn ɓó ɔ bììɛɛ po à kpéí, ɓɛ́ à kéɛ náa nyu kɛbì ɔ mɛ kàmà múɛ. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ ɓè kɔà ɓó dyíɛɛ dɔ́ɔ́ kɔ̃in dèìn.

VÍÐÒ: Cɛ̃ Nì Hwìɖìì-Taɓa-Taɓaɔ̀ Jè Kɛbì Wa Mɛ Vɔ̃ M̀ Gboɛ (5:09)

Ɔ kàmà mú ɓɛ́ m̀ ké Jɛhova jè nyɔ tɔ̀ɔ̀ ɓè gbo cɛ̃ɛ̀?
Ðé víɖòɔ̀ múɛɛ, ɖɛ́ kpá ma Géɖésɔ̃̀ùn gbo ɓɛ́ ɔ ké ma fã̀à wɔ̃ zi kɛ́?

Ɔ fɛ̃́ìn xwa ɓɛ́ nyɔ ké Jɛhova jè gboi kpɔ̃ ɔ jù ké à dyi ɖɛ ɔ ɖɛ̀ɓɛ̀ múɛɛ mú ɖɛ̀ɓɛ̀, ké à dyi ɖɛ ɔ nyɛ́ múɛɛ mú nyɛ́ ní. Zà Wɛ́ɖɛ́ 97:10 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Ɓá ɖɛ ɓè m̀ ɖàà cɛ̃ kɛ jè dyíɛɛ, ɖɛ́ mɔ̀ ɖɛ ɖíɛ́ ɓè ɓɛ́ Jɛhova ɖɛ̀ɓɛ̀ múɛ́? Ðɛ́ mɔ̀ ɖɛ ɖíɛ́ ɓè ɓɛ́ ɔ nyɛ́ múɛ́?
Xwɛ̀ m̀ ɓɛ́ìn cɛ̃́ɛ ɓɛ́ m̀ ké ɖɛ mɔ̀ ɖɛ nɔ̀mɔ̀ dyíin nyɛɛ mú ɖɛ̀ɓɛ̀, kè ɓɛ́ m̀ ké ɖɛ mɔ̀ ɖɛ gbà kɛɛ mú nyɛ́ kɛ́?

6. À dyi Jɛhova wuɖu nyu ní, à dyé kpáná

Jɛhova wuɖu nyu-nyu kpa ɖɛ ti séín. Zà Àzédyà 48:17, 18 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

Nì hwòɖò ɖá à ɓɛ́ìn hwòɖò kɔ̃ dèɛ̀ kà Jɛhova dyuò ɖɛ mɔ̀ ɖɛ nɔ̀mɔ̀ dyíin ɓó à bììɛ dyí ti séín nyɛɛ̀? Xwíníínɔ̀ nyɛ́ kɔ̃̀ jèɛ́?
Xwɛ̀ Baɓoɔ cɛ̃́-cɛ̃́ kè Jɛhova mɔ̀à jàà Geɖepɔɔ kɛɛ jè cɛ̃́-cɛ̃́ ɖà m̀ kpáná dyí nyuɛ́?

NYƆ ÐÍƐ́ ƁÈ ÐÁ: “Ní nyuu-ɖɛ̀ ɓè jè se ɖɛ ɖò cá ɖé Geɖepɔɔ gbo.”